> Elkarrizketa: Joxean Zapirain > "HARRIGARRIA DA BI ERREALITATEAK HAN HIRBIL ETA HAIN EZBERDINAK IZATEA"

• Joxean Zapirain · Gehituko Hiesa batzordeko kidea
• «Harrigarria da bi errealitateak hain hurbil eta hain ezberdinak izatea»
• Berria, 2008-07-27 # Aitor Renteria Baiona

Lapurdin, Nafarroa Beherean eta Zuberoan Hiesaren aurkako borrokan diharduen Aides izeneko elkartearen aitzinean zuten hitzordua Gehitu elkarteko kideek. Hiesari buruzko informazioa hedatzea dute helburu udako eguzkiak jendeak hondartzetara bultzatzen dituen garaian. Zuzeneko informazioa zabaltzea eta iritziak partekatzea dute xede. Baina helburu horrekin batera, Aides eta Gehitu elkarteen esperientzia eta jardunak partekatzea dute jomuga. Droga menpekotasunaren aurka diharduen Arit elkartearekin ere ari dira elkarlanean Gehituko kideak. Aides presente egoteak erakundeen babesa duten bermea eskaintzen dio kanpainari.

Nola sortu zen udako kanpaina burutzeko xedea?
Aspaldian Aides elkarteak informazio kanpainak egiten ditu Frantziako hondartzetan. Katalunian ere, Stop Sida elkarteak antzeko ekimenak egiten ditu. Guk Gipuzkoa eta Bizkaiko kostaldera hedatu nahi dugu ekimena, eta horretarako egokia iruditu zaigu bertako esperientziatik ikastea. Lapurdi eta Gipuzkoako egoera, adibidez, arrunt ezberdina da. Bi taldeek esperientzia ezberdinak ditugu, eta trukaketa aberatsa sortzen da horretatik.

Hondartzetara zoazte eta jendearekin harreman zuzenak dituzue. Zein da halako ekimenen bidez lortu nahi duzuen xedea?
Hego Euskal Herrian ez dugu horrelako ohiturarik, baina Iparraldean bai, Frantzian ere bai. Hondartzetan jende mota guztiak atzeman ditzakezu, horien artean gizonekin sexu harremanak izan dituzten gizonak ere bai, homosexualak izan edo ez. Hitz egitean arriskuak aipatu eta trukean ezagutzen ez ditugun errealitateak eta esperientziak ere azaltzen dizkigute. Eta jendeak, oro har, ongi hartzen du urratsa. Mezu argia da, ez du bilatzen nehor epaitzea. Informazioa ematen dugu, eta gero bakoitzak erabakitzen du zer egiten duen. Baina guk ikusi ez ditugun hutsuneak nabarmentzeko ere balio digu, jendearen esperientzietan oinarritua. Goizeko hamarretan hasten gara informazioa hedatzen, eta iluntzeko zazpietan bukatu. Jantzi zuriak daramatzagu soinean, eta nor garen adierazten duten pegatinak. Atzo Seignaxeko hondartzan egon ginen, Landetan, eta gaur Tarnosen egongo gara. Iluntzean afari mintzaldiak egiten ditugu. Atzo Baionan, Aidesen egoitzan, eta gaur Miarritzeko ostatu batean.

Zer dakarkiozue Gehitukoek esperientzia honi?
Espainiako Estatuan beste errealitate bat dago, ohituretan eta bereziki lege mailan. Hegoaldean homosexualek ezkontzeko parada daukate, haurrak adopta ditzakete, eskoletan informazio kanpainak antola ditzakete. Lapurdin ezinezkoa da , pentsaezina. Harrigarria da bi errealitateak hain hurbil egon eta hain ezberdinak izatea. Bi taldeek praktikan ezartzen ditugun komunikazio eta lan estrategiak erkatzeko eta osatzeko parada ematen digute ekimen hauek. Atxikimendu jarrerak gainditu eta elkarlanaren urratsa egin dugu. Eta orain argi ikusten dugu gure esperientziak elkarren osagarriak direla. Ondoko urteetan Gipuzkoan ekimen bera praktikan ezartzeko esperientziak eskainiko dizkigu honek.

Bada Lapurditik Gipuzkoara eraman nahiko zenuketen bertze jarduerarik?
Ipar Euskal Herrian eta Frantzian eragile pribatuen engaiamendu handiagoa dago, eta hori garrantzitsua da. Joan den neguan, adibidez, informazio kanpainak egin ditugu ostatuetan. Jabeek erraztasun guztiak eman zizkiguten. Informazioa agerian jartzen dute ostatuko murruetan, eta jendeari naturala iruditzen zaio gu hurbiltzea. Angeluko sauna batean ere egon ginen neguan. Jendeak ordaintzen du leku horretara joateko, intimitatea atxikitzeko. Baina naturaltasun handiz onartu zuen gure presentzia. Kondoien banaketari dagokionez ere, errealitate ezberdinak daude. Aidesek, adibidez, ekoizleen laguntza dauka eta urririk lortzen ditu. Guk ekoizleenganako urratsa egin behar dugu.

Eta zer dute Lapurdin zuengandik ikasteko?
Bada, baliteke esperientzia militantea izatea, egitura sendoagoak edukitzea. Erakunde eta egitura administratiboekin aritzeko esperientzia handiagoa dugu, baliteke hurbilagokoa izatea ere. Esperientziak trukatuz, guztiek dugu zer irabazi eta, emeki-emeki, gainditzen ditugu trabak.