> Berria: Ekainak 28 > MAITASUN IZENEAN MIARRITZEN

• Maitasunaren izenean
• Gay eta lesbianen harrotasun eguna. Giro atseginean milatik gora lagun bildu dira Miarritzeko Gay Pride besta kari, 'Askatasuna, berdintasuna eta senidetasuna' aldarrikatzeko, haurrik ezin ukan eta ezkontzak ukatzen dituen eremuan.
• Berria, 2009-06-21 # Nora Arbelbide · Miarritze

Askatasuna, hau da, bakoitzak ukan dezan, molde askean, ezberdin izateko eskubidea, nahi duenaren maitatzeko eskubidea. Berdintasuna, eskubide aldetik baita, bazterrean uzten direnek eskubide berak ukan ditzaten, bai ezkontzeko, bai haurren ukaiteko edo adoptatzeko, baita odolaren emateko ere. Eta, azkena, Senidetasuna, «herritar gehiegi bazterrean uzten delako, elkarren laguntzea ezinbestekoa delako». Christophe Stephany Miarritzeko (Lapurdi) gay eta lesbianen elkarteko (LGP) lehendakariak hitz hauekin esplikatu du Frantziako Errepublikaren leloa hautatu izana Miarritzen atzo iragan Gay Pride bestaren lelotzat: «Leloak guztiei zuzendua izan beharko luke, baina gaur egun ez da horrela».

Milatik gora lagun bildu ziren bestaren karietara, faroan hasita. Miarritzeko Faroak segitzen baitu leku sinbolikoa izaten. Luzaz homosexualen aurkako errepresioari ihes egiten ziotenen bilgune izan zen. Bederatzigarren aldikotz antolatu dute Gay Pride-a Miarritzen, aldarrikapen sakonak ahoan, baina umorea beti lagun. Adibidez, Betiereko Barkamenaren Seroren elkartekoak plazaz baliatu dira Betty eta Tina bezala, zenbait bikote ezkontzeko: «Tabuak hausteko eta noizbait egiazki ezkontzen ahalko garelakoan», Tinak laburbildurik.

20 bat elkarte eta sindikatu elkartu ditu bestak. CGT, CFDT, EHGAM, Gehitu, SOS homophobie, feminismo aldizkako baten aldeko PAF! elkarte gaztea, baita, mendi ibilaldiak antolatzen dituen Euskal ibiltariak. Sexu aukera guztiei irekia, kirola eta homosexualitatea uztartzea bektore bikaintzat dauka, normaltasunaren bidean: «Ez dugu deus ikaragarririk, denak bezalakoak garela!», ulertarazi nahian, elkarteko Beñat Gachen urruñarra (Lapurdi) bezala. Mendi ibilaldietan askatasun osoz sexu berekoak musuka daitezkeela, adibidez. Homofobiarik jasan gabe.

Homofobiaren arazoa eguneroko bizian oraindik indartsu dagoela salatzeko baliatu dute atzoko eguna, hain zuzen. Bere buruaz beste egiteko arrazoietako bat baita oraino, eta eraso fisikoak errealitate izaten segitzen dutelako. Duela hamar egun Baiona Ttipian ekintza homofobo larri bat gertatu da. Oraindik xehetasunak ez dira publiko egin. Miarritzeko faroan, berriz, apirilaren 14an zazpi bat gaztek gizon bat zanpatu zuten. Larriki zauriturik erietxean egon zen luzaz. Salaketa jarri du auzitegian.

Beste salaketa bat ere izan da aste honetan. Baionako, eta Biarnoko Oloroe eta Leskarreko Marc Aillet apezpikuak Gay Pride-aren antolatzaileen aurka agiri bat idatzi du. Betiereko Barkamenaren Seroren elkartea bestara gomitatu izana «zinezko bidegabekeria» da fede katolikoaren aurka, haren iduriko. Gaitzespen ugariren artean, serora berezi horietako bat den Myrtarena: «Ez du beste egitekorik, ala? Gu errespetu osoz gabiltza. Elizak betetzen ez duen lana betetzen dugu, baztertuei laguntza ekartzen diegu, besteak beste, ihesa duten gaixoei». Didier Borotra Miarritzeko auzapezak ere gaitzetsi du agiria, esanaz apezpikuak ez duela zertan horretaz arduratu.

• 40 urte borrokan
• Stonewall. LGBT kolektiboen askapen borrokaren abiapuntu jotzen dira New Yorkeko Stonewall tabernaren inguruan orain 40 urte izandako liskarrak. Urteurren hori dela eta ospatzen da gay eta lesbianen harrotasun eguna hilaren 28an.
• Mobilizazioak. Miarritzen atzo egin bezala, heldu den asteburuan manifestazioak izango dira Hego Euskal Herriko hiriburuetan. Donostian hilaren 27rako deitu dute manifestazioa. Gainerako hiriburuetan 28an bertan dira hitzorduak.

> Berria: Homofobia > BAIONAKO APEZPIKUAREN IRITZIA KRITIKATU DU LGP BIARRITZ ELKARTEA

• Baionako apezpikuaren iritzia kritikatu du Ligue [i.e. Lesbian] Gay Pride elkarteak
• Gara, 2009-03-12

Nicolas Sarkozyren Gobernuak proposatu aitamabitxien lege egitasmoaren inguruan Baionako apezpikuak bere iritzia plazaratu zuen larunba- tean, familiari «iraina» dela adieraziz. Marc Ailletek elizbarrutiko webgunean adierazitakoen aurrean Biarritzeko Ligue [i.e. Lesbian] Gay Pridek erantzun publikoa eman du apezpikuaren testua «onartezina» dela agertaraziz.

Norberarenak ez diren haurrak hezitzen dituzten helduei eskubideak eta eginbeharrak eman nahi dizkie legeak. Apezpikuak sexu berdineko bikoteek haurrak adoptatzearen aukera ematea- ren kontra agertu da «bortizki».

LGPk «sinismen giristinoa eta homosexualitatea» bateragarriak direla oroitu nahi izan dio Ailleti, «homosexualitatea eta aitatasuna eta amatasuna» bezala.

> Berria: Hiesa > HIESARI AURRE EGITEKO KANPAINA ANTOLATU DUTE HIRU KOLEKTIBOK

• Hiesari aurre egiteko kanpaina antolatu dute hiru kolektibok
• Lehenengo aldiz Iparraldeko eta Hegoaldeko gay eta lesbianen bi kolektibok bat egin dute
• Berria, 2008-07-24 # Xabier Otamendi · Donostia

Hiesaren arriskuak gutxitzeko kanpaina izena du Ipar Euskal Herrian eta Landetan (Frantzia) egingo duten kanpainak. Aurten lehenengo aldiz, Hego Euskal Herriko eta Ipar Euskal Herriko gay eta lesbianen bi kolektibok bat egin dute. Urtero antolatzen du AIDES Frantziako gobernuz kanpoko erakundeak kanpaina hori. Aurten Gehitu eta LGP Biarritz elkarteko boluntarioak ere parte hartuko dute bertan. Lehengo aldia du Gehituk, eta oso gustura agertu dira.

Uztailaren 24tik 27ra bitartean izango da kanpaina. Ipar Euskal Herriko eta Landetako hondartza eta taberna horiek gizon homosexualen topagune ohikoak dira. Hori dela eta, kanpainaren helburua Hiesa kutsatzeko izan ditzaketen arriskuak murriztean datza.

Horretarako, «elkarrizketa konfidentzialak» antolatu dituzte hiru elkarteetako kideek, haietara joaten den edozein gizonezkorekin informazioa trukatzeko eta haiek balizko arriskuez ohartarazteko. Saio horietan bildutako informazioa eta datuak lana abiatzeko ere erabiliko dituztela jakinarazi dute kanpainako arduradunek. Biltzen dutena proiektu berriak lantzeko baliatzea posible izango dela esan dute.

Koldobike Mujika Gehituko kidearen ustetan, garrantzitsua da Ipar eta Hego Euskal Herriko lesbiana, gay, bisexual eta transexualen elkarteek indarrak batu izana. Hau «lehenengo pausoa» baino ez dela esan dute bi elkarteetakoek. Izan ere, lehenik Donostian eta, ondoren, Baionan egingo duen erakusketa dagoeneko martxan da.

Elkarren arteko harremana
LGP Biarritz elkarteko Kriss Stephany kideak esan duenaren arabera, badute Hegoaldetik zer ikasia: «Adibide batzuk jartzearren, homosexualen arteko ezkontzarik ez dugu, eta ezin dugu homosexualitatearen inguruko kanpainarik egin ikastetxeetan».

Gehituko kideek ere badutela zer ikasi esan dute. Izan ere, Gipuzkoan ez da inoiz horrelako ezer egin. Hartara, Gehituko kideek ikastaro bat egin dute AIDES elkartearen eskutik. Kanpainari begira egin dute ikastaroa batik bat, eta etorkizunean Gipuzkoan ere horrelako kanpaina bat egitea espero dute.

> Berria: Harrotasuna > IPARRALDEA: BIHAR MIARRITZEKO KARRIKAK BERDINTASUN ALDARRIZ BETEKO DIRA GAY PRIDE BESTAREN KARIETARA

• Bihar Miarritzeko karrikak berdintasun aldarriz beteko dira Gay Pride bestaren karietara
• 'Legearen aitzinean herritar guztiak berdintasunean' lelopean aldarria eta jaia uztartuko dituzte
• Berria, 2007-06-15 # Aitor Renteria · Baiona

Urtero bezala, aurten ere gay, lesbiana eta transexualen eskubideak bermatzeko eskatuko dute bihar Miarritzeko karriketan (Lapurdi). Ekimena arratsaldeko lauretan abiatuko da itsasargitik. Legearen aitzinean herritar guztiak berdintasunean izanen da biharko leloa. «Ibilaldi horren bidez erakutsi nahi dugu gay, lesbiana edo transexuala izan, edozeinek dituen eskubide berak ukan behar ditugula, betekizun berberak ditugulako», adierazi du Philippe Lacoste Miarritzeko LGP taldeko presidenteak.

Hiritarrak homofobia eta bereizkeria hezkuntzan oinarritzen direla uste du taldeak. Horri buru egin ahal izateko hezkuntza politika ausarta plantan ezarri behar dela dio LPG taldeak, gazteei zuzendua, sexu ohitura eta gustuen araberako bereizkeria oinarrian ekiditeko. Pertsonen harremanak errespetuan oinarritu behar direla dio LGP taldeak, eta hori eskolan landu behar dela.

Frantziako Gobernuak PACS deritzon kontratua kendu eta elkarbizitza arautzeko egitura berri bat proposatzen du. «Ez dugu proposamen hori onartzen homosexualentzako delako soilik eta ez herritar guztientzako», dio Lacostek. Hiritar guztiak berdinak badira legearen aitzinean, legeak herritarren arteko bereizketarik ezin duela egin uste du. Lacosten iritziz, lege horrek estatu berezia eman nahi die homosexualei, Frantzian hainbertzetan aldarrikatzen duen berdintasun eredua urratuz. PACS legea hobetzeko eskatzen diote Nicolas Sarkozy Frantziako presidenteari. Hala ere, LGPren helburua berdintasun osoa bermatuko duen legea lortzea da, hots, ezkontza eta adopzio eskubidea aitortuko diena.

Sexu bereko bikoteek ez dute haur bat adoptatzeko eskubiderik Ipar Euskal Herrian. Alta, bikoteko partaide batek eskatuz gero, adopzio eskubidea gauzatzen da. Baina legearen aitzinean ez dira bermatzen haurraren edo bikotekokide baten eskubideak. Adopzioa lortu duen pertsonari zerbait gertatzen bazaio, bikotekideak ezin du adopzioa eskatu eta haurrak ere eskubide hroi galtzen du.

Aldarrikapena eta jai giroa uztartu nahi dituzte bihar. Aldarrikapena legeak eta sistemak ez dituztelako bermatzen eskubide guztiak. Jai giroa, aldiz, gizartearen aitzinean askatasuna erakusteko. «Oraindik jende anitz bada ez dena ausartzen erakustera bere hautua». Karrikara jaitsiz, urtean zehar gorderik dagoen bertze errealitate bat dagoela erakutsi nahi dute, koloretsu gainera. Herri txikietan homosexualitea orandik tabu gisa hartzen dutela salatu eta berdintasun urratsa ematera deitzen du Lacostek gizartea. Ibilaldiak Miarritzeko karrika nagusietatik pasatuko da eta ondoren jai bat antolatu dute Donibane Lohizuneko Mata-Hari diskotekan.

> Berria: Gurasotasuna > SEXU BEREKO GURASOEN ETA GURASOGAIEN ELKARTEA SORTUKO DUTE GAUR MIARRITZEN

• Sexu bereko gurasoen eta gurasogaien elkartea sortuko dute gaur Miarritzen
• Ezkontza eta adopzio eskubideari buruz jarrera har dezaten eskatuko diete hautetsiei
• Berria, 2007-02-17 # Aitor Renteria · Miarritze

Miarritzeko (Lapurdi) gay eta lesbianen elkarteak (LGP) bilkura bat antolatu du gaur Miarritzen sexu bereko guraso eta gurasogaien elkartea sortzeko asmoz. Frantziako presidentziarako hauteskundeen harira, sexu bereko pertsonen ezkontza eta adopzio eskubideari buruz jarrera har dezaten eskatuko diete hautetsi eta hautagaiei. Bederen PSF eta UDFeko ordezkariak presente izanen dira bilkuran.

«Lesbianen %11k eta gay-en %7k haur bat daukate; lesbianen %45k eta gay-en %36k ukan nahi dute», dio Philippe Lacoste LGPko presidenteak. Haurra ukan nahi duten sexu bereko pertsonek Administrazioaren zirrikituak baliatu behar dituzte. Legeak errealitatea onartu behar duela nabarmendu du, sexu bereko pertsonei gainerateko pertsonei onartzen dizkien eskubide berak aitortuz.

Frantziako legeak elkarrekin ezkontzea kalerazten die sexu bereko pertsonei. Ezin dute haurrik adoptatu eta ezin dute lagundutako ernalkuntza baliatu. Norbanakoek haur bat adoptatzea haizu dute. «Hipokresiak agintzen du, gurasoetariko bat kukutu behar delako adopzio prozedura irauten duen bitartean», azaldu du Lacostek.

Lehen traba hori gaindituta ere, legeak inposaturiko hesiak sexu bereko bikoteei ez diete aitortzen gainerateko bikoteek dituzten eskubide berak. Bigarren gurasoa, egunerokoan eragile bada ere, legearen aitzinean ez du eskubiderik. Horrela, haurraren ardura legala duen gurasoari zerbait gertatzen bazaio, bigarren gurasoak ez du haurraren ardura legala eskatzeko aukerarik.

«Gainerateko haurrek dituzten eskubideak ukatu egiten dizkiote sexu bereko gurasoen haurrari», salatu du Lacostek. Oinordetza eskubidea ere debekatzen diote haurrari eta hori jasanezinezko diskriminazioa dela dio.

Diskriminazioa ezabatu
Gurasoen ardura hobesten duen legea, gurasoen eskubide eta eginbeharra finkatzen duen legea bilakatzea eskatzen dute. Haurraren familia liburuan, adibidez, hiru elementu agertzea eskatzen dute: norengandik sortu den, noren haurra den eta zeinek hezi duen.

Informazioa gardena izatea eskatzen dute. «Informazioa gordez haurrari adierazten zaio ezberdina dela, gorde behar duen zerbait duela», azpimarratu du Lacostek. Arduraren etika garatzeko legeak gardentasuna eskaini behar duela uste du LGPk.

Legearen trabak direla eta, sexu bereko bikoteek molde ezberdinak baliatu behar izan dituzte haurrak ukaiteko. «Batzuek aitzineko bikote heterosexualetatik, bertzeek lagundutako ernalkuntza, isilpeko adopzioa edo bertze batzuen parte-hartzea. Legeak borondate naturalari hesia jarri nahi dionean bideak atzematen dira lortzeko». Legearen bermea eskatzen dute.