2009/03/31

> Berria: Prostituzioa > GASTEIZ: PROSTITUZIOA IGO EGIN DA AURTEN

  • Prostituzioa igo egin da Gasteizen aurten
  • Hiriko errealitate hori argitara emateko eta eztabaida sortzeko kanpaina egin du Gizarterako elkarteak
  • Berria, 2009-03-31 # J. Rejado • Gasteiz
Gasteizen prostituzioa igo egin da. Hori ondoriozta daiteke Gizarterako elkarteak emandako azken datuen arabera, datu zehatzak ematea zaila den arren. Prostituzioan aritzen diren emakumeak artatu eta laguntzen dituen elkarte horrek uste du aurten 500 emakume inguru lagunduko dituela, lehen hiru hilabetetako datuak mantenduz gero. Kopuru hori iragan urtekoaren aldean nabarmen handitu da. Izan ere, iaz 300 emakumeri eman zien laguntza.

Prostituzioan jarduten diren emakume askok klub, taberna, errepideetako klubetan edo pisuetan lan egiten dute, baina Gizarterako elkarteak onartu du errazagoa zaiela kalean edo biribilguneetan dauden emakumeetara gerturatzea. Azken toki horiek dira prostituzioaren benetako presentzia agerian utzi dutenak, Chelo Ordejon elkarteko presidentearen ustez. Haren ustez, prostituzioa emakume horiengana jotzen duten gizonak daudelako dago, edo, Ordejonen hitzetan, «prostituitzen dutenak» daudelako.

Prostituzioak Araban duen presentziaren benetako datuen berri izateko Gizarterako elkarteak Gizarte Laneko bi irakaslerengana jo du, gaia iker dezaten. Oraindik lanean ari dira, baina irakasleek jakinarazi dute bezeroek ez dutela ezaugarri zehatzik, eta beren nortasuna ezkutuan mantentu nahi izaten dutela. Maria Jose Barahona irakasleak nabarmendu duenez, bezeroak nor diren jakiten ez den bitartean ezin izango da gizartearen kontzientzia aldatu.

Errealitatea jakinarazi
Gasteizen gertatzen denaren berri emateko kanpaina hasi zuen atzo bertan Gizarterako elkarteak. Prostituzioa = esklabotza? leloa duen kanpainaren asmoa da prostituzioa hirian bertan dagoela erakustea, eta, aldi berean, horren inguruko gogoeta egiteko giltzarriak ematea. Hain zuzen ere, kanpainarekin batera banatuko dituzten eskuorrietan Gasteizen prostituzioan ari diren emakumeen hitzak jasotzen dira.

Kanpainaren bidez, emakumeek jasaten dituzten gehiegikerien berri ematen da. Emakumeen baldintzak oso txarrak direla nabarmendu du Ordejonek, eta bezeroen partetik jasaten dituzten erasoak eta tratu txarrak ohikoak direla gaineratu du. Haien baldintzak emakumeen euren hitzetan azaltzen dira kanpainan. Horrez gain, prostituzioan jarduten diren emakumeak bizi diren inguruaz ohartarazi du Gizarterako elkarteak. Izan ere, elkartera jotzen dutenak emakume pobre eta baztertuak izaten dira.

> Berria: Indarkeria > EHUNKA LAGUNEK MILAGROS SALAZARREN HERIOTZA GAITZETSI DUTE GASTEIZEN

  • Ehunka lagunek Milagros Salazarren heriotza gaitzetsi dute Gasteizen
  • Emakumeen kontrako indarkeria egotzita, sei gizon atxilotu dituzte asteburuan; lau Bizkaian eta bi Gipuzkoan
  • Berria, 2009-03-31 # Jon Rejado • Gasteiz
Ehunka lagun bildu ziren atzo Gasteizen, Milagros Salazarren heriotza gaitzesteko manifestazioan. Emakumeen kontrako indarkeriari aurrea hartu leloa zuen pankartaren atzean, genero indarkeria amaitzeko eta biktima bakar bat gehiago ere egon ez dadila eskatu zuten elkarretaratuek. Helburu horrekin hainbat elkarretaratze egin ziren atzo iluntzean Euskal Herriko hamaika txokotan, eta orotara ehunka lagun bildu ziren protesta ekimenetan. Besteak beste, ehun bat lagun bildu ziren Errenterian. Ermuan, genero berdintasunaren aldeko gizon taldeak deituta, 35 lagun elkarretaratu ziren.

Gasteizko manifestazioaren bukaeran Izaskun Jimenezen erailketaren ondorioz egindako mobilizazioak gogora ekarri zituen Bilgune Feministako eledun batek. «Egoera iluna bada ere, egoera honek irtenbidea duela ziur gaude». Elkartasunaren, autodefentsaren, elkarlanaren eta salaketaren bitartez, erasotzaileak «gune guztietatik kanporatzea» lortuko dela nabarmendu zuen.

Milagros Salazarren heriotza hilaren 23an gertatu zen, Gara egunkariak jakinarazi zuenez. Iturri horren arabera, gaur egun Gasteizen bizi zen emakumea, gizarte zerbitzuen pisu batean, bere hiru semeekin. Salazarren senarrak bi egun lehenago topatu zituen, eta laurak jipoitu zituen. Salazar jipoia jaso eta bi egunera hil zen, Txagorritxu ospitalean, Gara egunkariak azaldu zuenez. Emakumeak gaixotasun larria pairatzen zuen, eta ospitalean artatu zuten sendagileek ezin izan zuten zehaztu heriotza jipoiaren edo gaixotasunaren ondorioz gertatu zen. Gertaera horren aurretik, Arabako Aldundia hiru adingabeen zaintzaz arduratu zen.

Emakumeen Mundu Martxako Plataformak Salazarren heriotza «emakumeon kontrako indarkeria» gisa hartu, eta kasu horietan ohikoa den protokoloa hasi zuen. Gasteizko Udalak, berriz, informaziorik ez duela adierazi du. Heriotza gaitzetsi egin du, baina emakumeen kontrako indarkeriaren biktima dela esateko datuak falta direla uste du.

Sei atxilotu herenegun
Poliziak sei gizon atxilotu zituen herenegun, emakumeen kontrako indarkeria delituak leporatuta. Horietatik lau Bizkaian atxilotu zituzten; bi Bilbon, bat Zallan eta beste bat Getxon. Gipuzkoan egin zituzten beste bi atxiloketak; Tolosan eta Donostian.

Bizkaian eginiko lehen atxiloketa Bilbon egin zuten, herenegun, 03:00ak aldera, Ertzaintzak jaso zuen dei baten harira. Emakume batek deitu zuen jakinarazteko gizon bat etxeko atea gogor jotzen ari zela. Ertzainak heldu zirenean gizona ihes egiten saiatu zela eta atxilotzeko unean ertzain bati eraso ziola adierazi du Poliziak. Deia egin zuen emakumeak jakinarazi zuen gizonak eraso egin ziola beren semearen aurrean. Erasoa baieztatu ondoren, gizona atxilotu zuten. 20:50ak inguruan izan zen Bilboko bigarren atxiloketa, emakume batek bikotekideak eraso ostean ertzain etxera deitu zuen.

Zallan atxilotutako gizonari bikotekide ohiari eta horren egungo bikotekideari makila batekin eraso egin izana leporatu dio Ertzaintzak. 05:00etan izan zen atxiloketa, emakumeak dei baten bidez gertatutakoaren berri eman ostean. Egun berean, 23 urteko gizon bat atxilotu zuten udaltzainek Getxon, bikotekideari labana batekin mehatxatzea egotzita. Erasoa ikusi zuten hainbat lagunek Udaltzaingora deitu zuten. Bikotekideak ez zuen salaketarik jarri nahi izan unean bertan.

Ertzaintzak 33 urteko gizon bat atxilotu zuen Tolosan, 14:30ak aldera, bikotekideari eraso egitea egotzita. Ertzaintzak jakinarazi duenez, emakumea osasun etxera eraman zuten. Ordu horretan bertan, beste gizon bat atxilotu zuen Ertzaintzak Donostian, emaztea jotzea egotzita. Ertzaintzak jakinarazi duenaren arabera, emakumeak azaldu zien gizonaren erasoak ohikoak zirela, baina ordu arte ez zituela erasoak salatu.

2009/03/29

> Berria: Indarkeria > GASTEIZ: MILAGROS SALAZARREN HERIOTZA GAITZETSI DU MUGIMENDI FEMINISTAK

  • Milagros Salazarren heriotza gaitzetsi du mugimendu feministak
  • Txagorritxu ospitalean astelehenean hil zen emakumea gogoan, protestak egingo dituzte gaur eta bihar
  • Berria, 2009-03-29 # Erredakzioa • Gasteiz
Astelehenean Gasteizko Txagorritxu ospitalean zendu zen Milagros Salazarren heriotza salatuko du Emakumeen Mundu Martxako Plataformak. Gaur bertan elkarretaratzea egingo dute Gasteizen, 20:00etan, Andra Maria Zuriaren plazan. Bihar, ostera, manifestazioa abiatuko da leku beretik. Beste zenbait hiriburutan ere egingo dituzte elkarretaratzeak bihar: Donostian, 19:30ean egingo dute, Bulebarrean; Iruñean ere 19:30ean elkartuko dira, Udaletxeko plazan; 20:00etan izango da Bilboko elkarretaratzea, Arriagaren aurrean.

«Salazarren heriotza emakumeon kontrako indarkeria kasu gisa» hartzen du Emakumeen Mundu Martxako Plataformak. Horrelako kasuetan ohiko den protokoloa abiarazi dutela jakinarazi dute. Horregatik egingo dituzte protestak. Hiriburuetan ez ezik, beste hainbat herritan ere elkartuko dira gaur eta bihar, Salazarren heriotza gaitzesteko. Gipuzkoan, Arrasate, Azpeitia, Errenteria, Irun, Lasarte, Tolosa eta Zarautzen ere elkartuko dira. Bizkaian, Bilbon ez ezik, Algortan, Portugaleten eta Zornotzan ere egingo dituzte protestak. Nafarroan, berriz, Altsasun eta Lizarran egingo dituzte protestak.

Salazarren heriotza
Iragan astelehenean hil zen Salazar, Txagorritxuko ospitalean, Gara egunkariak jakitera eman duenez. Gasteizko parke batean zorabiatu zen Salazar, eta larrialdi zerbitzuek bihotza geldirik zuela aurkitu zuten. Ospitaleratu eta ordu erdira hil zela jakinarazi dute. Gara egunkariaren arabera, hil baino bi egun lehenago, Salazar jipoitu egin zuen senarrak. Hain justu, senarrarengandik ihes eginda bizi zen Salazar Gasteizen, hiru seme-alabekin. Salazarrek osasun egoera ahula zuela azaldu du Gara egunkariak, eta Arabako Foru Aldundia egin dela seme-alaben kargu.

2009/03/28

> Berria: Arrazakeria > ARRAZAKERIAREN AURKA, HERRI GIZA


  • Arrazakeriaren aurka, herri giza
  • Berria, 2009-03-28
Euskal Herrian inor ez eskubiderik gabe lelopean, hainbat gizarte eragile, sindikatu, kultur talde eta migratzaile kolektibotako kideek Espainiako Gobernuaren Gasteizko ordezkaritzaren aurrean elkarretaratzea egin zuten atzo, 19:00etan. Protesta ekintzara bildutakoek arrazakeriaren eta xenofobiaren aurka herri gisa borrokatzeko eskubidea aldarrikatu dute, eta herri mugimenduek eta herritarrek lan horretan izan behar duten parte-hartzea aldarrikatu dute.

2009/03/27

> Artikulua: Nerea Sancho > GAZTEEN SEXUALITATEAK IKUSTEKO ERAK

  • Gazteen sexualitateak ikusteko erak
  • EuskoNews, Gaztea, 104. alea, 2009-03-27 # Nerea Sancho • Psikologoa eta Sexologoa
Gazte alaiak, emankorrak, osasuntsuak, dibertigarriak nahi ditugu. Zaletasun pertsonalak dituztenak, irakurtzea atsegin dutenak, kirolariak, laguntasuna baloratzen dutenak. Elkar errespetatzen eta maitatzen diren neska eta mutilak, gurasoekin konfiantza dutenak eta zaharrei irribarrea eragiten dietenak.

Belaunaldiak etorri, belaunaldiak joan, badirudi ez dela aldaketa sakonik gertatu: belaunaldien arteko jauzia eta ezulertuak dirau. Helduarora iristerakoan esaldi hau edo honen bertsio bat errepikatzen dugu: “egungo gazteak ez dira batere arduratsuak, gure belaunaldia hobeagoa zen.”

Gazteen sexualitateez (pluralean, bakoitzak bere sexualitate bakarra eta errepika ezina baitu) hitz egiterako orduan zuzenean arriskua datorkigu elkarrizketara: planeatu gabeko haurdunaldiak, infekzioak, abortua, internet bidez gertatutako delituak... Gazteria eta arriskua, dena bat bailitzan tratatzen jarraitzen dugu, a ze nobedadea!

Neska eta mutilen bizitza sexualei buruz mintzatzean nahiko al genuke honakoa entzun? Amodioa, kitzikapena (eszitazioa), zirrara, dibertsioa, erakarpena, bizi–poza, larrua jotzea, biluztasuna, jolas erotikoak, belarrira xuxurlatzea, flirtean ibiltzea, esplorazioak...

Lehenengo eta behin, gazteen sexualitateak era baikor batetan ikusteko, azken hitz zerrenda entzuteko prest eta gogoz egon beharko dugu, nola bestela?

Eta bigarrenik, hori entzuteko, helduok, etxeko–lanak egin beharko ditugu. Zeintzuk etxeko–lan? Sexuen Hezkuntza bermatzea, alegia.

Askotan pentsatzen da sexuen hezkuntzaren helburua EGITEN dutena heztea dela. SENTITZEN dutenari buruz informazioa ematea dela uste da baita ere. Edota duten gorputza, hau da, DUTENA ezagutzea dela. Hiru alor horiek, zaindu beharrekoak dira, bai horixe! Baina gure helburu nagusia beraiek DIRENA eraikitzen laguntzea da. Neska eta mutilak eraikitzea. Gizon eta emakume gisa izan dezaketen aberastasuna lantzea, kultibatzea, heztea. Laburbilduz, euren buruak EZAGUTU ETA ONARTZEA, beraiek diren moduan, gizon edota emakume gisa espresatu ahal izatea. Eta neska eta mutil bakoitzak BERE MODU PERTSONALA izango du.

Heldu arduratsu askok esango luke horrekin ados dagoela, baina non geratzen da prebentzioa?

Bertako eta nazioarteko ikerketa anitzek demostratzen dute gazteen sexuen hezkuntza egokia jasota –txiki–txikitatik baldin bada, askoz hobe– ondorio ezkorrak ekiditen direla. Beste modu batera esanda, hezkuntzaren bitartez euren buruak neska edo mutil gisa behar bezala ezagutzea lortzen badugu, diren bezala euren buruak onartzea eta espresatzeko aske sentitzea lortzen badugu, ez dira arazoetan sartuko. Horrelaxe da, oso sinplea badirudi ere.

Euren burua, gorputza, erreakzioak, sentipenak identifikatzen eta ezagutzen lagundu behar diegu, gauza bakoitzari bere izena emanez: bulba, kitzikapena (eszitazioa), eiakulazioa, masturbazioa, poza, zalantza, beroa, erakartasuna, plazera...

Euren buruak onartzen irakatsi behar diegu: euren gorputzak maitatzen, euren zaletasunak garatzen eta goraipatzen, besteekiko desberdina duten hori errespetatzen eta onartzen... Ondokoak desberdinak direla onartzen eta baloratzen ikasi behar dute.

Eta janzteko era, hitz egiteko modua, dantzatzeko estiloa, kirolaren aukera, jostailuen selekzioa... era duinean eta koherentean bizi dezaten lagundu beharko diegu.

Aurrekoa saiatuz gero, gazteak eta arriskua bereizten hasiko gara. Eta ez da gutxi.

Konfiantzazko sexu aholkularitza zerbitzua hemen topatuko duzu: www.gaztezulo.com

2009/03/26

> Berria: Salaketak > EKINTZA GLOBALERAKO ASTEAK KAPITALISMOA ETA GERRA SALATUKO DITU BILBON

  • Ekintza Globalerako Asteak kapitalismoa eta gerra salatuko ditu Bilbon
  • Larunbatean abiatuko dituzten ekitaldi «bizi eta koloretsuetan» parte hartzeko deia egin dute gizarte eragileek
  • Berria, 2009-03-26 # Miren Korta • Bilbo
Hainbat sindikatuk eta gizarte erakundek kapitalismoaren eta gerraren aurka Ekintza Globalerako Astea egingo dute Bilbon larunbatetik aurrera. Belem do Para hiriko (Brasil) IX. Munduko Gizarte Foroak hala eskatuta, «mundu osoko ekintza eta mobilizazio astearekin bat egitea» erabaki dute antolatzaileek, Euskadiko Gazteriaren Kontseiluko ordezkari David Lopategik aurreratu duenez.

Ekitaldi sorta hasteko, larunbatean elkarretaratze «bizi eta koloretsua» egitera deitu dute, Kapitalismoaren aurka. Premiazkoa da beste mundu bat lelopean. Bilboko Plaza Biribileko BBVAren egoitza parean izango da hori, 20:00etan. Kontzentrazioan bi helburu dauzkate: krisi ekonomikoa salatzea eta G-20 taldeak apirilean Londresen egingo duen bileraren kontra egitea.

Lopategik gogor kritikatu du G-20 taldeak duen jarrera: «Krisiari aurre egiteko abian jartzen diren salbazio plan guztiek logika berbera dute; alegia, mozkin pribatuak bermatzeko, galerak sozializatzea». Aldi berean, gogora ekarri du apirilaren 4an Estrasburgon (Frantzia) NATOk egingo duen bilera. «NATOren 60. urtemugaren harira, guk ez dugu ezer ospatzerik. Bakea ez da inolaz ere armagintza politikaren eta esku-hartze militarra indartzearen ondorio izango», gaineratu du. Aitzitik, «berdintasunean, askatasunean eta justizia sozialean» sakontzeko eskaera egin die Lopategik agintariei.

Ekitaldiz jositako egitaraua
Bizkaiko 30 talde inguruk babestu dute Ekintza Globalerako Astea. Hala, ekitaldi ugari izango dira Bilbon apirilaren 4a arte. Astean, manifestazioak, elkarretaratzeak, tailerrak eta hitzaldiak egingo dituzte, «krisia, gerra, biolentzia eta arrazakeria» salatzeko.

Antolatzaileen artean honako hauek daude, besteak beste: ELA, LAB, ESK, EILAS eta EHNE sindikatuak, Bizkaiko Emakumeen Asanblada, Ekologistak Martxan, SOS Arrazakeria eta Kakitzat, Anitzak eta Harresiak Apurtuz elkarteak.

> Berria: Arrazakeria > ARRAZAKERIAREN AURKA HERRI GISA JOKATZEKO ESKATU DUTE


  • Arrazakeriaren aurka herri gisa jokatzeko eskatu dute
  • Hainbat sindikatu, gizarte eragile eta migratzaile kolektibok elkarretaratzera deitu dute biharko
  • Berria, 2009-03-26 # Eihartze Aramendia • Donostia
«Bada garaia arrazakeria eta xenofobiaren kontrako borrokan herri gisa aurrerapauso bat emateko, gure ikuspegi propio batetik gai honi helduz, eta Estatuen inposaketa eta logika gaindituz». Hori adierazi du Bea Martxueta LABeko kideak beste hainbat sindikatu, eragile sozial, kultural eta migratzaile kolektiboren izenean; hala nola Bilgune Feminista, Euskal Herrian Euskaraz, Euskal Herriak Bere Eskola, Anitzak Ekimena eta Askapena. Joan den martxoaren 21ean izan zen arrazakeria eta xenofobiaren kontrako nazioarteko egunaren haritik, eragile eta kolektibo horiek hausnarketa egin dute gaiaren inguruan.

Euskal Herrian eta Europan «arrazismo instituzionala» dagoela salatu dute, erakundeek dituzten atzerritarren politikei eta legeei erreparatuz. Politika horiek «asilo edo migrazio egoeran dauden pertsonen esplotazio ekonomikoa eta segurtasun errepresiboa» xede dutela iritzi diote eragile eta kolektiboek. Horrez gain, Euskal Herrian «garrantzi handiko beste analisi elementu bat» ere badagoela nabarmendu dute: «Politikoki eta kulturalki gutxitua den gure estaturik gabeko nazio izaeraz ari gara. Ukapen egoera batean gaude, eta horrek eskubide urraketa bikoitza eta berezia pairatzera eramaten gaitu».

Prekarietate egoera
Eragile eta kolektibo horien iritziz, instituzioen atzerritarren legeen bidez, bizileku, herritartasun eta naziotasun eskubideak nori eta zein baldintzatan aitortu erabakitzen da. Hori horrela, Europako Batasunetik kanpo datozen pertsonak egoera eskas eta ahulen aurrean daudela salatu dute. Egoera «paradoxiko eta bitxiak» ere gertatzen direla azaldu dute: «Hegoaldeko zein Iparraldeko herritarrok atzerritartzat hartuak izaten gara, Euskal Herrian egon arren, mugaren zein aldetan gauden kontuan izanik». Jatorria kontuan hartu gabe, Euskal Herrian bizi diren herritarrek erabakitzeko eskubidea dutela aldarrikatu dute, «kanpoko inongo inferentziarik eta inposaketarik gabe».

Ekonomia krisia ere izan dute hizpide eragile eta kolektiboek: «Bizi dugun krisialdi ekonomikoan inoiz baino beharrezkoagoa da erabakitzeko eskubidea bermatzea». Izan ere, euren arabera, kapitalismo globalak eta estatuen gobernuak eskubiderik gabeko pertsonez baliatzen dira lan merkatuaren baldintzak gero eta eskasagoak izateko eta langileen arteko mesfidantza bilatzeko.

Hori guztia salatzeko, eragile sozial, sindikal, kultural eta migratzaile kolektiboek biharko antolatu duten elkarretaratzera deitu dute. Espainiako Gobernuaren Gasteizko ordezkaritzaren aurrean izango da, 19:00etan.

> Berria: Arrazakeria > INMIGRAZIO POLITIKAK SALATZEKO, MARTXA ANTOLATU DU SOS ARRAZAKERIAK


  • Immigrazio politikak salatzeko, martxa antolatu du SOS Arrazakeriak
  • Heldu den igandean izango da ibilaldia, Pasaiatik abiatu eta Donostiako Bulebarreraino
  • Berria, 2009-03-26 # Erredakzioa • Donostia
SOS Arrazakeria elkarteak, Gipuzkoako 51 elkarte eta erakunderen babesarekin, -tartean LAB, ELA, EILAS, Euskadiko Gazteriaren Kontseilua eta EHGAM- arrazakeria eta xenofobiaren aurkako hamabigarren martxa antolatu du. Arrazakeria, xenofobia eta immigrazio gaietan atzerabidezko politiken aurka leloa duen ibilaldia heldu den igandean abiatuko da Trintxerpetik (Pasaia, Gipuzkoa) 11:30ean, eta Donostiako Bulebarrera 13:00ak inguru iritsiko da. Aurten, 2008an erakundeek buruturiko arrazakeria mota guztiak salatuko dituzte.

SOS Arrazakeriako kide Agustin Unzurrunzagak azaldu duenez, «aurten atzerritartasun eta immigrazio gaietan bereziki baztertzaile eta zapaltzaileak diren zuzentarauak eta Europa osoko itunak indarrean jarri dira». Unzurrunzagak gogorarazi du, joan den abenduan ministro kontseiluak Atzerritarren Legearen Erreforma Legearen aurreproiektua onartu zuela, eta hori «eskubideen alorrean atzerapauso bat gehiago» dela salatu du. Horrez gain, atzerritarrentzako zentroetan ezarritako atxiloketa epea luzatzea ere atzerapausotzat jo du: «Atzerapausotzat jotzen dugu etxebizitzarako laguntzak eskatzeko orduan hemen bizi direnen artean desberdintasun eta hierarkiak ezartzea ere; eta pertsonen arteko elkartasun adierazpenak jazartzea eta zigortzea», besteak beste.

Krisiak «kolpatuak»
Ekonomia krisiak bereziki etorkinak kolpatzen dituela adierazi du Unzurrunzagak: «Langabezia igo, gizarte bazterkeria handitu eta langile guztien lan baldintzen prekarietatea areagotzeaz gain, gogortzen ari dira pertsona askoren lan eta egoitza baimenak berritzeko oztopoak». Egoera horrek Europako Batasunekoak ez diren herrialdeetako pertsonei eragiten diela jakinarazi du.

Etzirako, bestalde, Bizkaiko SOS Arrazakeriak manifestazioa antolatu du. Bilboko Arriaga plazatik abiatuko da ekitaldia, 18:00etan.

> Berria: Salaketak > ARABA: ELIZAK ETA PPK JARRERA HOMOFOBOA DUTELA SALATU DU EHGAMEK

  • Elizak eta PPk jarrera homofoboa dutela salatu du EHGAMek
  • Gay, lesbiana, bisexual eta transexualak elkartzen dituen erakundearen adarra sortu dute Araban
  • Berria, 2009-03-26 # Erredakzioa • Gasteiz
«Homofobiaren botoak onartuko ditu alderdi sozialistak Euskal Autonomia Erkidegoan?». Galdera hori eginez aurkeztu zuen bere burua Arabako EHGAMek, atzo, Gasteizen. Talde horretako kide Jaione Martinez de Albenizek eta Aritz Martinezek adierazi dute PPk emakume, gay, lesbiana eta transexualen eskubideei dagokienez daukan jarrera «aski ezaguna» dela. PSE-EEri galdetu diote ea garrantzi handiagoa duen Lehendakaritza eskuratzeak gay, lesbiana eta transexualen eskubideak errespetatzeak baino.

Elizak gay, lesbiana, bisexual eta transexualen aurka daraman «gurutzada» ere salatu du Arabako EHGAMek lehen agerraldian. «Homofobia, lesfobia eta transfobia bultzatzen dituen erakunde antolatua» da Eliza, EHGAMentzat. Hiesa bultzatzea eta sexu joerarengatik zigorrak jarri nahi izatea ere aurpegiratu diote. «Noiz arte jarraituko dute jarduera kriminal horrekin gure gobernuen oniritziarekin eta diru publikoa ere erabiliz?», galdetu dute.

Arabako EHGAM gisa horretako erasoei aurre egiteko sortu dela jakinarazi dute taldeko kideek: «Erasotik sortu gara, homofobiatik; kaletik sortu gara, eta kalean aritzeko». EHGAMek lanean 32 urte daramatzan arren, antolatzen jarraitzeko beharra nabarmendu dute, «orain inoiz baino gehiago». Larunbatean aurkezpen festa egingo dute, 22:00etan, Gasteizko Mur Mur tabernan.

2009/03/12

> Komunikatua: Anitzak Ekimena > MARTXOAREN 21A: ARRAZAKERIA ETA XENOFOBIAREN AURKAKO NAZIOARTEKO EGUNA

  • Martxoaren 21a: Arrazakeria eta xenofobiaren aurkako nazioarteko eguna
  • Euskal Herrian mobilizazio bateratua!
  • Anitzak Ekimena, 2009-03-12
Heltzear den martxoaren 21a izango da ”Arrazakeria eta xenofobiaren aurkako nazioarteko eguna”. Euskal Herrian, beste herrialdeetan bezala, data hori probestu gura genuke mugimendu sozial eta sindikatuok arrazoi politiko, ekonomiko edo dena delakoek behartuta gure herria utzi dugunok pairatzen dugun arrazakeria eta xenofobiaren jatorria salatzeko. Migrazio eta aterpe eskubideari dagozkion politika murriztaileak, kontrol eta kanporatze politikak dira aipatu berri ditugun ondorioen sortzaileak. Eta planetaren ipàrraldeko estatuek hamarkadak daramatzate horiek aplikatzen.

Asilo edo migrazio egoeran gaudenok, esplotazio ekonomikoa eta segurtasun errepresiboa bilatzen duten, eta eskubide oinarrizkoenak urratzen dituzten politiken erdigunean jartzen gaituzte aipatutako neurriek.Politika horien ondorio da kontrola areagotzea eta mendebaldeko demokrazien atzerakada, zeinak gure jatorrizko herrietan eta ingurukoetan esku hartzea justifikatu nahi duen.Europar Batasunaren neurriek eta proiektu ezberdinek eta aterpe eskubideari zein inmigrazioari dagozkien forma atzerakoi berriek, espainiar eta frantziar estatuetan, norabide berean doaz.Arrazakeri instituzional eta ekonomiko hori da egungo arrazakeriaren benetako sortzailea. Hori guztia gutxi balitz, politika horiek era berezian eragiten diete estaturik gabeko nazioei. Horren adibide da euskal nazioa, zeinak ez duen politika horietan eragiteko eskumenik. Aitzitik, ondorio lazgarriak pairatu behar ditu.

Hain zuzen ere, horrexegatik dauka aurtengo martxoaren 21ak esangura berezia Euskal Herrian.Iparraldean zein Hegoaldean kapital transnazionalak eragindako krisi ekonomikoak ez gaitu harrapatuko soilik EBtik kanpoko langile garenok, erabat babesgabetuak esandako politiken ondorioz. Herri honetako langile eta herritar sektoreen arteko kontraesanak ere eragin litzake. Era berean, gure herrian zabaldutako ziklo politiko berria are ziurgabeagoa bihurtuko da. Ez soilik euskal gizartearen gehiengoak aldarrikatzen duen erabakitzeko eskubidea, eskubide sozialak, lanari, kulturari, sindikatuei, pertsonen eskubideei eragingo die era ezin okerragoan. Gure jatorria dena delakoa izanik ere.

Hori dela eta, Anitzak Ekimena, Euskal Herrian migrariak garen pertsonen plataformak, uste dugu herri honetan bizi garen guztiok, hiritar antolatu zein norbanako, bat egin behar dugula gainera datorkiguna eta sistemak hartutako norabidea salatzeko. Esparru hau eta data hau ez diren inoren jabetza. Borroka zelai bat da, onarpen ariketa bat eta gizarte justu eta askeagoa gura dugun eta euskal herritar sentitzen garen indarren bilgunea.

Hori horrela izanik, martxoaren 28an, zapatua, herri honetako hiriburuetan deitutako hitzorduetan zuen indarrak batzera dei egiten dizuegu.

> Berria: Homofobia > BAIONAKO APEZPIKUAREN IRITZIA KRITIKATU DU LGP BIARRITZ ELKARTEA

  • Baionako apezpikuaren iritzia kritikatu du Ligue [i.e. Lesbian] Gay Pride elkarteak
  • Gara, 2009-03-12
Nicolas Sarkozyren Gobernuak proposatu aitamabitxien lege egitasmoaren inguruan Baionako apezpikuak bere iritzia plazaratu zuen larunba- tean, familiari «iraina» dela adieraziz. Marc Ailletek elizbarrutiko webgunean adierazitakoen aurrean Biarritzeko Ligue [i.e. Lesbian] Gay Pridek erantzun publikoa eman du apezpikuaren testua «onartezina» dela agertaraziz.

Norberarenak ez diren haurrak hezitzen dituzten helduei eskubideak eta eginbeharrak eman nahi dizkie legeak. Apezpikuak sexu berdineko bikoteek haurrak adoptatzearen aukera ematea- ren kontra agertu da «bortizki».

LGPk «sinismen giristinoa eta homosexualitatea» bateragarriak direla oroitu nahi izan dio Ailleti, «homosexualitatea eta aitatasuna eta amatasuna» bezala.

2009/03/08

> Komunikatua: Donostiako Koordinadora Feminista > KAPITALISMO MATXISTAREN AURKA: IRAULTZA FEMINISTA!!!

  • KAPITALISMO MATXISTAREN AURKA: IRAULTZA FEMINISTA!!!
  • EHGAM-DOK EUSKARAZ, 2009-03-08 # Donostiako Koordinadora Feminista
Lehenik eta behin manifestazio honetan parte hartzeagatik zoriondu nahi zaituztegu. Aldarrikatzeko kalea okupatzea bera arrakasta da guretzat.

Gaur, martxoaren 8an, feministok kalea okupatu dugu gure bizitza antolatzen duten egitura sozialak salatzeko. Gaur egungo sistema kapitalista salatu nahi dugu bere logika matxista, hierarkiko eta konpetitiboaz indarkerian eta injustizian oinarrituriko baliabideen banaketa sistema ezartzen baitu.

Ez dugu krisi honetan sinisten; etekinak inolako lotsarik gabe mahai gainean jartzen dituzte; ondo zihoala esaten zigutenean ere ez genuen sinisten sistema honetan. Zergatik jarraitu behar dugu entzuten beste sistema ekonomiko batzuk porrot egin dutela? horrek zer esan nahi du, gaur egungo sistema ekonomikoak arrakasta izan duela? Ze ikuspuntutik baloratzen da baikortasunez desberdintasun handiagoak sortu dituen sistema ? Beraienetik; heterosexista ikuspuntutik, hau da gizon-aberats-zuri-heterosexualaren ongizatea kontutan hartuz; emakumeen lan ikusezin eta doakoak sortutako ongizatea hain zuzen ere.

Eta orain, zuen numeroek esaten dizuete sistema hau ez doala ondo? Sistema hau sekula ez da izan justua pertsona guztientzat. Non zeundeten pobreziaren feminizazioa eta jende aberats eta pobrearen arteko aldea salatzen genuenean? Aberastasuna pilatzen, desberdintasuna pilatzen…honek ez du zerikusirik zuen numeroekin, betiko hierarkia patriarkala da hau!!

Bizi garen sistema ekonomiko eta sozial hau lanaren banaketa sexualean oinarritzen da. Egitura honek familia lehenesten du, emakumeok etxeko lan eta zaintza gehienak egiten ditugun gunea; ordaindu gabeko lana erreprodukzio sistema guztia oinarritzen den indar motorea baita. Karga familiarrak izanik lan merkatuan sartzen garen emakumeok, kanpoan lan egitetik aparte, etxeko guztiaz arduratu beharra izaten dugu: janaria, umeak, adineko eta gaixoen zaintza…jardunaldi murrizketa guretzat zuzenki egina, berriz ere pobreago baina lan gehiagorekin.

Emakumeok lan munduan diskriminatzen gaituzte, bigarren mailako hiritarrak gara, emakume izateagatik gutxiago kontratatzen gaituzte eta, gainera, gutxiago kobratzen dugu.

Oraindik egoera okerragoan gaude langile sexualak, ilegalizaziotik gertu, isiltasuna eta estigma sozialera baztertuak; transexualak, trans eta emakume izateagatik diskriminazio bikoitza jasanez; lesbianak, lan gehienetan armairuan egon beharrekoak; etxeko langileak, ekonomia prekarioan murgildurik; paperik gabeko etorkinak, beraien oinarrizko eskubiderik gabe bizi behar dutenak. Lan ikusezinak, onartu gabeko lanak, ez INEMek ez Langaik ezta Eustatek ere, inork ez daki ezer gutaz!

XXI. mendean, oraindik ere, emakumeok engainatzen gaituzte. Ez gara zifretan agertzen, ezta kontratu ez eskubideetan ere. Eskubide sozialak eskatzen ditugu, eskubide politikoak, eskubide laboralak, gure gorputzaren eskubidea baita ere. Gaur egun, oraindik hemen, abortatzea ilegala da! Gaur egun, oraindik hemen, emakumeen kontrako indarkeria dago!

Gaur kalera atera gara guztiontzat juxtuago izango den mundu feminista exijitzeko; helburu sozialak ez direla moda bat gogoratzeko eta gutxi batzuen botere eta desberdintasun pilaketaren gainetik egon behar dutela aldarrikatzeko.

Emakumeei dei egin nahi diegu antola daitezen eta borroka feministan parte har dezaten sistema matxista eta kapitalista honen kontra. Ez ditzagun sinistu zapaltzen gaituzten diskurtsoak, ez ditzagun eman lortzea hainbeste kosta zaizkigun eskubideak eta jarrai dezagun mundua iraultzen.
  • GORA EMAKUMEON BORROKA!!!
  • GORA BORROKA FEMINISTA

> Berria: Salaketak > HOMOFOBIAREN AURKA ELKARRETARATU DIRA GASTEIZEN

  • Homofobiaren aurka elkarretaratu dira Gasteizen
  • Zinpekoen epaimahai batek Galizian bi gazte gay hil zituen gizona absolbitu izana salatu du EHGAMek
  • Berria, 2009-03-08 # Erredakzioa • Gasteiz
“Homofobia ez Justizian ez inon” lelopean, elkarretaratzea egin zuten dozenaka lagunek atzo Gasteizen, EHGAM Euskal Herriko Gay-les Askapenerako Mugimenduak deituta. Zinpeko epaimahai batek Vigon (Galizia) bi gazte homosexual hil zituela aitortu zuen gizona absolbitu izana salatu dute elkarretaratzean.

EHGAMeko kide batek azaldu zuenez, epaitutako gizonak aitortu egin zuen hilketa; bi gazteei 57 labankada eman zizkiela eta ondoren etxeari su eman ziola azaldu zuen. Ordea, zinpeko epaimahaiak absolbitu egin zuen akusatua, hilketa horiek «eraila edo bortxatua» izateko «gaindiezinezko beldurrak jota» eta «bere buruaren defentsan» egin zituela argudiatuta.

Erabaki hori gogor salatu zuen EHGAMek atzoko protestan. Taldearen irudiko, «epai horrekin, epaimahaiak erailketa homofoboak babesten eta justifikatzen ditu, eta, era berean, zigor gabeko gorrotozko krimenei ateak irekitzen dizkie».

2009/03/07

> Iritzia: Olatz Berastegi > KONTROLA; HEZIKETA

  • Kontrola; heziketa
  • Nerabeen sexu harremanak (III)
  • Berria, 2009-03-07 # Olatz Berastegi - Sexologoa
Pornografia, indarkeria, bortxaketak, geroz eta gehiago entzuten ditugun hitzak dira. Azkenaldian, horrelako hitzekin lotzen dugu sexualitatea. Ez al da susmagarria sexualitatea beti egoera negatiboekin lotzea? Gaurkoan ere, lege proposamena dela edo ez dela, hori ekarriko dut gogora.

Sexualitatea pertsona guztiok dugun ezaugarri bat da. Guztiok, emakume eta gizon izanik, gure gorputza bizitzeko eta sentitzeko era daukagu. Horrela, sexualitateaz hitz egiteak sexualitateak -pluralean- aldarrikatzera eraman beharko gintuzke: zenbat pertsona, hainbat errealitate.

Gure gorputza gurekin daramagu jaiotzetik hil arte, eta etengabe harekin harremana eraikitzen ari gara; hori bai, ezin dugu ahaztu gure bizitzan baditugula memento zailagoak; garai jakinetan, gure gorputzarekiko harremana osasuntsu eraikitzeko, besteen babesa behar dugu, haurtzaroan eta nerabezaroan, adibidez. Haurrak eta gazteak babestu behar ditugu helduok. Haien bizipenak ulertzeko, barneratzeko, norberaren identitatea osatzeko... euskarriak eman behar dizkiegu.

Horretan, beraz, bat nator lege proposamenaren oinarriarekin, hau da, haurrak eta gazteak babestu behar dira, indarkeriarik jasan ez dezaten. Baina hori ez gertatzeko zer-nolako bideak hartu behar diren aztertu beharko genuke. Horregatik, legeak planteatzen duenaren aurrean, hausnartzeko puntu batzuk nabarmenduko nituzke:

1. Legea aplikatzeko gertaera bat aztertuko da, baina nork aztertuko du? Nori dagokio norberaren bizipena aztertzea? Norberaren errealitatearen azterketa egitea norberari dagokio. Besteok, kanpotik begiratzen dugunok, errealitate hori analiza dezakegu, datuak aztertu, baina inola ere ez interpretazio bat eman. Noski, norberari bere errealitatea interpretatzen laguntzeko euskarriak eman diezazkiokegu. Hori bai, besteen errealitatea aztertzeak errespetuzko jarrera eta askatasunean oinarritutako begirada eskatzen dituela ahaztu gabe.

2. Legean aipatutako jarrerak ikusten ditugunean, gure helburua zein da? Epaitzea edo pertsonari hezten laguntzea? Pertsonei hezten lagundu nahi badiegu, bide zuzenena heziketa dela esango nuke, heziketa integralaren bidea. Gaur egungo heziketa sexuala aztertu beharko genuke, hezkuntzan ze tarte eskaintzen zaion, zer-nolako interbentzioak egiten diren, zein adinetan eskaintzen den... Gaur egungo hezkuntzan, esaterako, zer garrantzi dauka gorputzak? Hezkuntza sistemak zein euskarri eskaintzen dizkigu gure jarrerak ulertzeko, geure burua hezteko?

3. Aipatutako egoerak ekiditeko, zer erantzun eraiki nahi ditugu gizartean? Epaiketan oinarritutako interbentzioa? Ez al diogu geure buruari galdetu behar zer gertatzen ari den horrelako egoerak suertatzeko? Indarkeriari aurre egiteko gure sexualitatea kontrolpean eduki behar al da?

4. Sexu harremanak arautzeaz ari garenean, zertaz ari gara? Besarkadak, laztanak, sexu harreman gisa hartzen dira? Horiek arautzeak babesa ematen du? Edo beldurra sortzen du?

5. Horren guztiaren atzean norbaitek planteatzen al du haur edo gazteek zergatik dituzten sexu harremanak?

6. Helduak eta haurrak besarkatzen, musukatzen, masajeak ematen ikusten ditugunean zerbait lizuna egiten ari direla pentsatu behar al dugu?

Pertsonen arteko sexu harremanak errespetuan oinarrituta eraikitzeko, hezkuntza da jorratu beharreko bidea. Legean aipatzen diren egoerak epaitzeko hainbat neurri hartu beharko dira, eta horretarako dirua beharko da. Zergatik ezin dugu diru hori osasun hezkuntza eraginkorra eraikitzen erabili? Hori bai, hezkuntza sexuala eraginkorra izan dadin, ezinbestekoa da gaurko eredua aldatzea. Hau da, gaur egun heziketa sexuala egiten dela esaten da, baina hori oso puntuala da. Heziketa sexuala interbentzio puntualetara mugatzen da, eta askotan praktika sexual batzuen ondorioak ekiditera bideratzen da.

Hezkuntza sexual eraginkorrak geure burua ezagutzera bultzatzen gaitu, neska eta mutil izatea ulertzeko euskarriak eskaintzen dizkigu. Horrez gain, elkar ulertzera, elkarrekin bizitzera eta elkarrekin eraikitzera eramaten gaitu. Heziketa horrek kontuan hartzen ditu haurrak -pertsonak-: haien desioak, beharrak, eta norberaren berezitasunak. Beraz, azterketa bat egingo bagenu, ez da zaila konturatzea, oraindik ere, lan asko egiteke dugula. Ekin diezaiogun lanari, baina ezin dugu ahaztu indarkeria eta bortxaketak ekiditeko ez dugula sexualitatea kontrolpean jarri behar.

2009/03/06

> Iritzia: Imanol Alvarez · EHGAM > DELITUFILIA ETA DELITURASTIA

  • Delitufilia eta deliturastia
  • Nerabeen sexu harremanak (II)
  • Berria, 2009-03-06 # Imanol Alvarez - EHGAM taldeko kidea
Hilaren 17an, Madrilgo Diputatuen Kongresuan, esplotazio eta abusu sexualen aurrean haurrak babestearen beharraz EAJk aurkezturiko legez besteko proposamen bat onartu zen aho batez. Normala. Nor ez dator bat, bada, abusu eta esplotazioaren aurka umeak babestearekin?

Gehiegitan gertatzen den bezala, ordea, proposamen horretan argi-ilun kezkagarriak daude.

Lehenengo eta behin, argitu beharko genuke zer den umea. Ume, nerabe edo gazte gauza bera ote diren. Olabarria jaunak berak, bere ahozko azalpenean, proposamena arrazoitzean, Mari Luz 5 urteko neskatoaren desagerpena eta Marta 17 urteko gaztearen hilketa aipatzen ditu. Txarto hasten gara, bada. Horrek gogora ekartzen digu paradigmatiko bihurtu zen Arny kasua. Pederastiaz eta pedofiliaz hitz egiten zen etengabe, eta ustezko biktima gaixoak 17 urteko mutilak ziren, gaizkile izatetik gertuago zeudenak biktima izatetik baino.

EHGAMen hasiera-hasieratik pentsatu dugu sexu-harremanetarako onespen adina jartzea ez dela, berez, beharrezkoa, nor bere heldutasun sexualera -nolabait esatearren- une diferentean irits daitekeelako. Halere, jartzekotan, zentzuzkoa izan beharko du. Adibidez, 70eko hamarkadan, nesken onespen adina 23 urtekoa zen, eta mutilona 21, gaur egun barregarri suerta dakigukeen arren. Ezkontzeko adina, berriz, 12 urtekoa zen neskentzat, eta 14 mutilontzat; beti ere, jakina, gurasoen oniritziarekin. Hura hipokresia adierazgarria!

PSOEk 12 urte proposatu zuenean 1995ean, zentzuzkoa iruditu zitzaigun, eta, azkenean -PPren presioak medio-, 13 onartzea izugarrizko lorpena zan da. Gu geu gazteak ginen, eta bagenekien zer zen ezin lasai ligatzea ia ia NA eskatzen ibili gabe. Modu berean, 14-16 urteko neska-mutil nahikotxo hurbiltzen ziren gugana, onespen adinaz galdezka edota jaitsarazteko zerbait egin genezan eskatuz.

Ez dugu uste, hortaz, adina igo behar denik. Erabat kontra gaude. Baina, igoko balitz, ezkontzekoa ezingo litzateke beherago ezarri. Bestela, umeak defendatzearen aitzakiaz, ulertuko genuke politikari horiek India aldean eta herri musulmanetan gertatu ohi direnen moduko alaben saltzeak-edo ahalbideratuko dituztela.

Adina gorabehera, EAJk aurkezturiko testuan anbiguotasun beldurgarriak daude, eta batzuetan errepresio absurduaren paroxismora heltzen da:

Behin eta berriro aipatzen du adintxiki eta halako hitzak (adingabe, adin txikikoak...), baina ez du zehazten onespen adinaz ari den ala ez. Gauza bera gertatzen da haur (haur prostituzioa, haur pornografia...) hitzarekin. Interpretatu ahal izateko, lehenengo jakin beharko genuke testu egilearentzat 17 urteko neska bat haurra den edo ez.

Salatuaren heriotza zibila proposatzen da, nola edo hala, besteak beste, kargu publikoa izateko edota lanbidean aritzeko inhabilitazioa ere eskatzen baita.

7. atalean, haur pornografia ikustea bera delitu izan behar duela dio. Hau da, Emulez jaisten baduzu, demagun, Los diez mandamientos (Hamar aginduak) izeneko artxiboa, pelikula ikusteko irrikan zaudelako, baina kasualitatez adar joleren batek (askotan gertatzen den bezala) eduki pornografikoa eskegi badu izenburu horren pean, umerik agertuz gero, akabo! Kartzelara bizitza guztiko. A, noski! Ahaztua nuen, pelikulak jaistea ere bada delitua.

Terminoen indefinizioa profitatuz, 9. atalean esaten du delitua izan behar dela adin nagusi batek adintxiki (?) bati sexu harreman adostuak izateko eskatzea bera.

3. puntuan adingabekoen askatasun eta indemnetasunaren kontrako delituen goraipamena zigortzea eskatzen da. Gu, ados. Baina, zer da goraipatzea? Zeren Konstituzioa aldatzea eskatzea ere Konstituzioaren kontrako delitua litzateke, askoren ustez...

Delituak asmatzeko obsesio paranoide honek izena eduki behar du. Delitufilia, agian? Deliturastia, akaso?

Eztabaida dezagun. Bai, horren guzti horren inguruan. Defenda dezagun, bai, askatasuna. Jazar eta zigor ditzagun, bai, bortxaketak, abusuak, engainuak... edozein adinetan. Are kemenago nahi badugu umeen kasuan, ados. Ez gaitezen ito, ordea, tabu eta beldur atabikoak baino beste oinarririk ez duten debeku eta errepresioetan.
  • Bihar: Olatz Berastegi, sexologoa.

2009/03/05

> Iritzia: Emilio Olabarria > ADINGABEEK BABESA MEREZI DUTE

  • Adingabeek babesa merezi dute
  • Nerabeen sexu harremanak (I)
  • Berria, 2009-03-05 # Emilio Olabarria • EAJko diputatua
Egungo gizarteak duen ezaugarri aipagarrienetako bat honako binomioan oinarritzen da: delitua izan daitezkeen ekintzen aurrean adingabeek duten ahulezia, eta zenbait kolektibo babesteko legedi penalak dauzkan hutsune ugariak; horien artean, konkretuki, ume eta adingabeek osatzen duten taldeari dagokiona. Are gehiago sexualitatearekin zerikusia duten delituak dauzkagunean aztergai.

Kasu hauek arreta berezia eskatzen dute, adingabeak bereziki sentiberak baitira askatasun sexualari eta intimitateari erasotzen zaienean. Gainera, uste baino gehiagotan erasotzailea biktimaren inguruko norbait izan ohi da, eta horrek adingabearengan sentimendu nahasiak sortzen ditu eta salaketa aurrera eramatea zailagoa izaten da. Hori gutxi izango balitz bezala, ez dugu ahaztu behar horrelako ekintzak intimitate ilunean egiten direla eta, beraz, horren adierazgarri diren frogak aurkitzea ez dela izaten erraza.

Horrexegatik, eta orain arte azaldutakoa ikusi ondoren, harritzekoa da Estatuak arazo honen inguruan idatzi diren hainbat lege eta normatiba berretsi ez izana. Hala nola Umeen sexu explotazioaren aurkako babesari buruzko R Aholkua (2001), Ziberdelinkuentziaren Inguruko Hitzarmena (2001eko azaroaren 23an Budapesten sinatutakoa), Europako Kontseiluko gobernuburu eta estatuburuen hirugarren goi bileraren ekintza plana (Varsovia, 2005eko maiatzaren 15ean eta 16an egindakoa), non ume eta adingabeen esplotazio sexualaren aurkako hainbat neurri adostu ziren.

Europako Kontseiluak ere, orain dela urte eta erdi, Lanzaroten, adingabeen babesa aztergai duen azken tresna juridikoa aurrera atera zuen: umeen sexu esplotazio eta abusuen aurkako babesari buruzko Europako Kontseiluaren hitzarmena. 27 estatuk sinatutako akordioa da hori, eta horien artean ez dago Espainiako Estatua.

Ez da berria, Estatuan, azkenaldian entzundako albisteek frogatzen duten bezala, zoritxarrez, pederastiarekin, ume eta adingabeen esplotazioarekin eta baita haur pornografiarekin ere zerikusia duten mafia eta sare ugari daudela. Horren froga, poliziak haur pornografiarekin salerosketan ibiltzen zen sare oso bat atxilotu zuela gaur esku artean daukagun proposamen hau Madrilen aurkeztu eta osoko bilkuran eztabaidatu eta gainditu zen egun berean.

Guztiok dugu buruan Marta del Castillo gaztearen kasua ere, baita Mari Luz Cortés umearena ere.

Orain arte azaldutakoa kontuan izanik, esan bezala, Kongresuak, talde guztien babesarekin, EAJk aurkeztutako legez besteko proposamena aurrera atera du, zeinak, besteak beste, honako oinarriak dituen: sexu harremanak baimentzeko gutxieneko adina igotzea, adina kontuan hartzea sexu erasoen kasuan, adin txikikoen aurkako sexu erasoen goraipamena juridikoki eta penalki aintzat hartzea, adin txikikoen aurka egindako sexu delituen zigorrak modu nabarmenean gogortzea, haur prostituzioa kontsumitzea delitu gisa hartzea, teknologia berrien bidez haur pornografia ikustea bera delitu gisa hartzea, haurrek parte hartzen duten ikuskizun pornografikoetara joatea delitutzat jotzea, teknologia berrien bidez haurrekin sexu harremanak izatea edo pornografiarako materialak sortzea proposatzea delitutzat jotzea...

Aipatutako oinarri horiek egun ordenamendu juridikoak dauzkan hutsuneak betetzera bideratuta daude. Hutsune horiek, jakina, gizartean alarma handia eragiten dute, babes handiena behar duen taldeak, hau da, gure ume eta adingabeak, orain arte behintzat, babes gabeko egoera batean egon baitira. Egoera horri amaiera jarri behar zaio.
  • Bihar: Imanol Alvarez, EHGAM-eko kidea

> Erreportajea: Sexualitatea > "EZ GARA BURUARINAK"

  • «Ez gara buruarinak»
  • Gizartearen zati batek uste duenaz bestera, nerabeek diote zentzuz jokatzen dutela sexu harremanak izaten dituztenean.
  • Berria, 2009-03-05 # Ainara Arratibel
"Berak daki gehien", esan du mutil batek, irribarrez, gelara sartu den eta ikaskide duen neskatoaz. Irribarre hori isiltasun eta lotsa bihurtu da eztabaidagai izango duten gaia azaltzean: sexualitatea. Olatz, Mikel, Alaitz, Xabier, Miren, Oier eta Leire -asmatutako izenak- dira, Oiartzungo (Gipuzkoa) Haurtzaro ikastolako Derrigorrezko Bigarren Hezkuntzako zazpi ikasle. 14 eta 16 urte artean dituzte. Oraindik izan ez dituzten arren sexu harremanak izateko adina informazio dutela diote. Prest ikusten dute beren burua horretarako. Garbi dute, gainera, sexu harremanak izaten dituztenean neurriak hartuz izango dituztela. «Hala egiten ez duenak beretzat kalte. Gu ez gara buruarinak», aldarrikatu dute. Agurtzane Ormatza sexologoa eta Jaione Ugaldebere irakaslea bat datoz horrekin. «Jende askok uste baino zentzudunagoak dira alor horretan». Hori bai, biek nabarmendu dute nerabezaroa jakin-minez, beldurrez, desioz, fantasiaz eta zalantzaz betetako adina dela eta horrek askotan egoera deseroso eta zailetan jartzen dituela. «Egoera horiek nola gainditu irakastea da kontua», dio Ormatzak. Hori heziketaren bidez lortzen dela uste dute biek, eta horren ardura partekatu egin behar dela guraso, irakasle eta sexu hezitzaileen artean.

EAJren ekimenez, Espainiako Kongresuak legez besteko proposamena onartu zuen duela aste batzuk, sexu harremanak izateko onartutako gutxieneko adina igotzeko. Espainiako Zigor Kodeak 13 urtetan ezarria dauka muga sexu harremanak baimentzeko. Proposamenean ez dute zehaztu zenbat igoko duten, baina EAJk egoki ikusten du 14 urtera igotzea.

Emakundek abenduan aurkeztu zuen Arabako, Bizkaiko eta Gipuzkoako nerabeen inguruko azterketa. Han azaldu zutenez, EAEko nerabeek 15 urterekin izaten dituzte, batez beste, lehen sexu harremanak. «Datu horrek erakusten du, gizartean bestelako ustea dagoen arren, gauzak ez direla horrenbeste aldatu urteei dagokienez. Atzera begiratu, eta ikusiko genuke gure aitona-amonak zein adinekin ezkotzen ziren, eta zein adinekin izaten zituzten sexu harremanak: askotan, 15-16 urterekin. Ikuspegi historiko-antropologiko hori oso garrantzitsua da», dio Ormatzak.

Musuak eta horrelakoak bai, baina zazpi gazteek diote oraingoz ez dutela sexu harremanik izan. Batek, halere, izan dituen lagun bat baduela dio. «Lotsa ematen zion kontatzea, baina azkenean atera egin genion», azaldu du Oierrek. Lehen aldiaz hitz egin berri dute ikastolan afektibitate sexualari buruzko eskoletan, eta gehienek kezka bat dute: «Gaizki pasatzen al da?».

Halako gauzek garbi erakusten dute, Ugaldebereren ustez, oraindik ere mito, beldur eta fantasiaz beteta daudela. Hain zuzen ere, horregatik, Ormatzak garrantzi berezia ematen die hainbat ikastetxetan sexualitateari buruz ematen diren ikastaroei. Berak 15 urte daramatza halako ikastaroak ematen: «Kasu askotan nahasgarria izan arren, gaur egun informazioa mordoa dute sexualitatearen inguruan. Baina sentimenduen alorra ere lantzen dugu eskola horietan. Gaiaren inguruan dituzten beldurrak, nahiak, fantasiak eta zalantzak argitzen eta gainditzen laguntzen diegu. Sexualitatea ez da soilik harreman koitala; sentimenduak ere sexualitatearen parte dira. Hori ez dugu ahaztu behar».

Antisorgailuen erabilera
Emakunderen azterketaren arabera, nerabeen %90ek antisorgailuak erabiltzen dituzte sexu harremanetan. Zazpiek eurek ere hala egingo dutela diote. «Inozoak ginateke hala egingo bagenu. Ni ez nago prest nire gaztaroa pikutara bidaltzeko neurriak ez hartzeagatik. Adin honetan ez gaude prest umeak izateko», dio Olatzek. Ez dituzte ahazten, gainera, sexu bidez kutsatzen diren gaixotasunak.

Hori bai, bakar batek ere ez darama aldean kondoirik. «Aitak harrapatuko banindu, azalpenak eskatuko lizkidake. Gainera, behar izanez gero, tabernetan eta botiketan saltzen dituzte».

Teoria ondo ezagutzen dute, eta, aipatutako datuek erakusten dutenez, praktikan aplikatzen dute. Baina, benetan, horrela al da? Ormatzak baietz iritzi dio. «Nagusi asko baino arduratsuagoak dira. Nahi gabeko haurdunaldien kopurua ikustea besterik ez dago, eta zein adin tartetan gertatzen den abortu gehien: 25-35 urte inguruan. Antisorgailuen erabileran beherakada bat izan bada, ez da izan nerabeen artean».

Baina zer gertatuko litzateke haurdun geratuko balira? Abortuaren gaia ateratzen da orduan, eta denek nabarmendu dute oso kontu pertsonala dela. «Bikotekideen artean erabaki behar duten zerbait da», uste du Leirek. Mikelek dio gurasoei bikotekidea haurdun dagoela ezkutatuko liekeela, «oso agerikoa» izan arte.

Hori guztia kontuan hartuta, zalantzan jartzen dute sexu harremanetarako onartutako adina 13 urtetik gora igotzea. «Adina ez da garrantzitsuena, prestaketa baizik», uste dute. Beste ikuspegi batetik, Ormatzak ere zalantzan jartzen du erabakia. «Nik uste dut halako erabakiak beldurrak eraginda hartzen direla askotan, eta legedia behar baino gehiago sartzen dela intimitateari lotutako gaietan. Ez dut uste, gainera, alor horietan legea oso eraginkorra denik. Hortik harago joan beharko genuke, eta ahaleginak hezkuntzan egin. Arauetan baino gehiago, heziketan dago gakoa».

Heziketaren garrantzia
Masturbazioa izan ohi da ikastaroetan lantzen duten beste gaia. Kasu horretan lotsak agertzen dira, batik bat nesken artean. Hala diote, behintzat, Xabierrek, Mikelek eta Oierrek. «Guk errazago kontatzen ditugu gauzak». Ugaldeberek berretsi egiten du hori. «Mutilek lotsarik gabe esaten dute masturbatu egiten direla; batzuek oso harro, gainera. Neskek ere egiten dute, ziur, baina ezkutatu egiten dute. Lotsa ematen die kontatzea. Urteetako ereduen ondorio da hori».

Bide horretan, hezkuntzaren garrantzia nabarmendu dute Ugaldeberek eta Omartzak. Haien arabera, hezkuntza sistemak ez dio merezi duen garrantzia ematen sexu heziketari. «Ikastetxe bakoitzaren esku uzten dute horretarako ekimena. Saiatzea merezi du, ikasleek asko eskertzen baitute».

Zertxobait aldatzen ari den arren, Ugaldeberek dio egun gurasoek eskolaren esku uzten dutela seme-alaben sexu heziketaren zati handi bat: «Erosoagoa egiten zaie». Hala, aurrerapauso bat emateko eskatu die Ormatzak gurasoei. «Gehienek uste dute gazteek asko dakitela sexualitateaz. Egia da gaur egun informazio asko dutela. Baina esperientzia beraiek dute, eta alor horretan seme-alabei balio batzuk helarazi nahi badizkiete, heziketaren ardura hartu behar dute».

Horretan, halere, aldaketa bat gertatu beharko litzateke. Izan ere, zazpiek diote etxean ez dutela sekula gaiaz hitz egiten. Xabierrek, gainera, nahiago du hala izatea. «Ez baditut sekula nire gurasoak musu ematen ikusi, pentsa zer izango litzatekeen haiekin sexuaz hitz egitea. Ez nintzateke eroso sentituko».

Ormatzaren ustez, egoera horren jatorria topatzeko, atzera egin behar da. «Urteetan desio eta maitasun adierazpenak ezkutuan egon dira, eta zaila da hori aldatzea. Guretzat oso zaila da pentsatzea gurasoak edo aitona-amonak sexudunak direla, sexu harremanak dituztela. Nerabeei ere hori gertatzen zaie». Alderantziz ere izaten da, Ugaldeberen arabera: «Gurasooi kosta egiten zaigu seme-alabak koskortu egin direla eta sexu harremanak izan ditzaketela onartzea. Baina ahalik eta naturalen jokatu behar dugu».

Zer da sexu harremanak izateko onartutako adina?
Legeak sexu harremanak izateko ezarritako gutxieneko adina da. Adin horretatik behera, legearen ikuspegitik, sexu harremanak izateko emandako onarpena ez da nahikoa. Tartean adin nagusiko pertsona bat badago, bortxaketa edo sexu abusuen delitua egingo luke pertsona horrek.
  • EBn sexu harremanetarako onartutako adina
  • Alemania: 14 urte.
  • Austria: 14 urte.
  • Belgika: 16 urte.
  • Bulgaria: 14 urte.
  • Danimarka: 15 urte.
  • Eslovakia: 15 urte.
  • Erresuma Batua: 16 urte.
  • Errumania: 15 urte
  • Eslovenia: 15 urte.
  • Espainia: 13 urte.
  • Estonia: 14 urte.
  • Finlandia: 16 urte.
  • Frantzia: 15 urte.
  • Grezia: 15 urte heterosexualentzat eta 17 gizon homosexualentzat.
  • Herbehereak: 16 urte.
  • Hungaria: 14 urte.
  • Irlanda: 17 urte sarketarako, eta 15 urte bestelako sexu harremanetarako.
  • Italia: 14 urte.
  • Letonia: 16 urte.
  • Lituania: 14 urte.
  • Luxenburgo: 16 urte.
  • Malta: 18 urte.
  • Polonia: 15 urte.
  • Portugal: 14 urte.
  • Suedia: 15 urte.
  • Txekiar Errepublika: 15 urte.
  • Zipre: 17 urte.
Nerabeen %64k bikotekidea izan dute noizbait
Emakundek nerabeen inguruan kaleratutako azken ikerketan parte hartutako Araba, Bizkai eta Gipuzkoako gazteen %64k bikotekidea izan dute noizbait.

14 eta 17 urte bitarteko 970 gaztek hartu zuten parte Emakunderen ikerketan. %90ek esan zuten sexu harremanak izateko orduan neurriak hartu zituztela. Gehienek kondoia erabili zuten.

Fideltasunari dagokionez, mutilek gutxiago erakusten dute. Hala, %12,4k aitortu zuten sexu harremanak izan zituztela ezagutu berri zituzten pertsonekin.

Gainera, neskek garrantzi handiagoa ematen zioten bikotekide egonkorra izateari harremanak izateko garaian.

> Berria: Sexismoa > HIZKUNTZA BAINO, HIZTUNA BERA DA SEXISTA, LLEDO FILOLOGOAREN HITZETAN

  • Hizkuntza baino, hiztuna bera da sexista, Lledo filologoaren hitzetan
  • Gara, 2009-03-05 # Janire Arrondo
Gehitu Euskal Herriko Lesbiana, Gay, Transexual eta Bisexualen elkarteko lesbianen sailak antolatuta, hitzaldia emango du bihar Eulalia Lledo Cunill filologoak Donostiako Arrasate kaleko Kutxa aretoan iluntzeko zortzietan. «Lengoaia ez sexista» du izenburu hitzaldiak eta bertan hizlaria hizkuntza sexista eta emakumeen aurkako indarkeriari hedabideetan zein trataera ematen zaion azaltzen saiatuko da.

Lledo Filologia Erromanikoan doktorea da eta Derrigorrezko Bigarren Hezkuntzako irakasle eta Tarragona eta Lleidako hainbat unibertsitaterekin lanean aritua da. Urteak daramatza hizkuntzaren erabilera aztertzen eta hizkuntza komunikaziorako tresna baino zerbait gehiago dela ikasi du.

Filologoak hizkuntzaren erabilera androzentriko eta sexistaren zergatia aztertu du. Lledok GARAri adierazi zionez, «hizkuntza ez da baztertzailea edo sexista, erabiltzen duen pertsona baizik». Bestalde, pertsonen ideologia edo pentsaera «erakusten» du hizkuntzak hizlariaren ustez. «Izan ere, inor arrazista, homofobo edo sexista bada, hautatzen dituen hitz eta esamoldeetan nabarmenduko zaio».

«Arazoa emakumeak itzalpean uzten dituen esamoldeak erabiltzen direnean agertzen da», adierazi du filologoak. Maiz, genero maskulinoaren erabilera lehenesten da, genero femeninoa baztertuz. Hiztegia hautatzerakoan maskulinoa hautatzen bada, ordea, «gizartearen erdia albora uzten ari gara», Lledoren iritziz. Beraz, ez da hautaketa soil bat, hor «diskriminazioa» gertatzen da.

Bestalde, emakumeak gizartean duen papera aldatzen joan den heinean, «hizkuntzan isla izan du horrek» hizlariaren esanetan. Hala ere, oraindik «gizonezkoaren papera nagusiagoa da», azaldu zuen. Lledoren hitzetan, «emakumea lan munduan egotea ez da berdintasunerako tresna», izan ere, oraindik «etxeko kargak emakumeen gain jarraitzen du».

Komunikabideak
Orokorrean, gizartearen pentsaera aldatzen joan den moduan, komunikabideetako hizkuntzaren erabilera ere aldatuz joan da. Lledok hedabideek emakumeen kontrako indarkeriaren gaineko albisteei zer-nolako trataera ematen dieten ere aztertu du. Filologoaren ustez, hainbat aurrerapauso eman dira alor horretan. Esaterako, «'pasio krimen' esamoldea alde batera utzi eta 'genero indarkeria' erabiltzen dute orain».

Alabaina, oraindik ere «badira bazterrean uzten diren informazioak», Lledoren ustez.