> Iritzia: Rikardo Arregi > TRANSFOBIA

• Transfobia
• Deia, 2009-06-17 # Rikardo Arregi

Batzuek erraz galtzen dute lana; langabeziarako bidea autopista zabala eta doanekoa zaie, abiadura handiko trena. Batzuen-tzat lan erregulazio bat izatea ere loteria desiragarria izango litzateke. Maria Jesús Lastrak sei hilabeterako sinatu zuen lan kontratua baina hiru ordu iraun lanean: goizeko hamaiketatik ordu biak arte. Sukaldean laguntzeko zegoen Gasteizen Alde Zaharreko ogitarteko denda batean baina nagusia konturatu omen zen Maria Jesús Lastra transexuala zela (ez galdetu nola) eta bere onerako kaleratu zuen. Bere onerako, bai, bere onerako, inolako asmo txarrik gabe. Nagusiak ez zuen arazorik transexualekin (guztiok gara oso toleranteak, ezta?), baina kontuan harturik Alde Zaharrean gazte mozkor asko dabilela asteburuetan deliberatu zuen hobe zela langileari arazo gehiegi ez ematea eta lan gabe utzi. Bihotz oneko gizona, zalantzarik gabe. Lan Ikuskaritzan salaketak daude, EHGAM-Arabak mobilizazioak antolatu ditu. Ez dakit, lerrook idazten ditudan bitartean, zer aterabidea izango duen arazoak baina bi gogoeta etortzen zaizkit burura oraintxe bertan, transfobia gaitzetsi eta salatzeaz gainera.

Lehendabizikoa enpresaburu, enplegatzaile edo nagusiei buruzkoa: nekatzen nau, nazkatzen nau, entzuteak behin eta berriz pertsona horien laudorio etengabea; badirudi negozioak baino karitatezko festak antolatzen dabiltzala eta egoera ekonomiko txarra sufritu, beraiek sufritzen dutela batez ere.

Bigarrena da gay, lesbiana eta transexualen mugimendu askotan nagusitzen ari den joera normalizatzaile eta lasaigarria, ezin ulertuzkoa dena bazterkeria kasuak eguneroko ogia ditugunean oraindik. Asteon bertan irakurri dut egunkari batean Benidormeko udalak (PP) eta Alikanteko diputazioak (PP) gay turismoa bultzatu nahi dutela gayak "bakezale eta lasaiak" direlako. Agian (agian ez, seguru) hasi-hasierako mugimenduetan zegoen probokazio puntu hura berreskuratu beharko genuke guztiok eta irribarretsu, zintzo eta jatorrak izateari utzi. Aspertu gehiegi dago munduan aspertu gehiago gehitzeko.

> Iritzia: Rikardo Arregi > GASTEIZ GAY FRIENDLY?

• Gasteiz Gay Friendly?
• Diario de Noticias de Alava, 2008-06-27 # Rikardo Arregi

Gasteizko Udalak ideia bitxiak ditu beti, berdin dio zein den agintean dagoen alderdi politikoa. Badirudi udaletxean bizi den mamuren batek gure alkate eta zinegotzien gorputz-gogoak hartzen dituela menpe, eta sorgindu. Gasteizko udalak izan duen azken harrikada hiria gay friendly bezala saltzea da turismo azoketan gidatxo batzuen bitartez. Gasteizko gay komunitatearen parte handi bat barrez lehertu zen hori entzutean, ezaguna baita Gasteizen GLBT+ mugimendua txikitxoa dela (adjektibo txeratsua erabiltzearren). Sejo Carrascosak artikulu barregarri eta aldi berean serioa idatzi zuen horretaz: Aquí no hay Kien Folle, Gasteizen dugun estatua friki hori gogora ekarriz.

Gauzak ez zuela gehiagorako emango pentsatzen nuen nik, baina tren zaharren kutsua duen egunkari bateko gehigarrian, GPS izenekoan, agertu zen pasa den hilabetean artikulu bat, argazkiak eta guzti, gaiari buruz. Izenburua, Vitoria abre el armario, eta idazlea, María Zabaleta. Ni Sitges ni Chueca, horrela hasten da artikulua. Topiko bilduma polita jarraitzen dio hasiera harrigarriari: gayek dirua dutela eta abar. Ziur naiz María guay dela eta noizbehinka esertzen duela gay edo lesbiana bat bere mahaian, baina ez du asmatu. Ezagutzen ditudan pertsona batzuk elkarrizketatzen ditu eta ezagutzen ez ditudanak. Azken horietako bat beste topiko izugarri batekin dator: gay jendeak sentsibilitate berezia duela artearekiko. Ez María, ez, Gasteiz ez da Chueca edo Sitges eta ez da inoiz izango. Zelako ergelkeriak entzun eta irakurri behar ditugunak.

Egia da gasteiztarrek begirunez edo begiratzen dutela begi-bazterraz jende arraroa, eta ez dituztela gayak, lesbianak edo transexualak gehiegi jipoitzen. Bide batez egunkari honetan bertan agertu zen eraso baten berria (berria?) orain dela bi aste edo, nondik-norakoak ilun azalduz. Turista gayak erakartzeko ahalegina absurdua da; Ourense ere gay friendly izango da? Nor engainatu nahi dute Udalekoek?