> Berria: Ekitaldiak > SENTITZEN DUDANAZ

• Sentitzen dudanaz
• 'Maribollotrans' kanpaldia egiten ari dira ostiraletik gaur arte Azkoitian. Sexualitatea natural bizitzearen garrantzia nabarmendu eta gay, lesbiana eta transexualen eskubideak aldarrikatzen ari dira.
• Berria, 2009-09-13 # Ainara Arratibel . Azkoitia

Ander Gisasola zumarragarrak ez du arazorik izan ingurukoei mutilak gustuko dituela esateko. «Egia da badela oso gaizki pasatzen duen jendea, baina ez da hori izan nire kasua». Gakoa, natural jokatzea: «Beti jokatu izan dut natural nire sexualitatearen inguruko gauzak azaltzeko orduan, eta nik uste dut hortxe dagoela gakoetako bat ingurukoek ere natural hartzeko. Horixe da ingurukoei gay, lesbiana edo transexualak direla aitortzea beldur ematen dieteni gomendatuko niekeena». EHGAM Euskal Herriko Gay Askapenerako MugimenduaMaribollotrans kanpaldia egiten ari da Azkoitiko Kukuherri aterpetxean (Gipuzkoa), eta han dago Gisasola, beste ehun lagunekin batera. Ekimen horren bidez, ezberdin bizi, sentitu eta maitatzeko moduak daudela aldarrikatu eta gizarteak horiek errespetatzearen garrantziaz ohartarazi nahi du EHGAMek.

Hemezortzigarren aldia da EHGAMek kanpaldia antolatzen duela. Dena den, aurrenekoz egin dute Azkoitian. Aurreko urteetan Oiartzungo Arritxulo aterpean (Gipuzkoa) bildu dira. Hausnartzeko ez ezik, ondo pasatzeko eta elkar ezagutzeko aukera ere eskaintzen du kanpaldiak. Hala, hiru eguneko egitarau betea osatzen ari dira aurten ere: mendi martxa, yoga saioa, eros masaje saioa, ibilaldi botanikoa, maribollotrans literatur tailerra, bio dantza ikastaroa, tupper sex saioa...

Errespetu eta naturaltasun hori lortzeko giltzetako bat hezkuntzan dagoela uste du Gisasolak. «Oso garrantzitsua da eskoletan izan daitezkeen edozein motatako jarrera homofoboak eta baztertzaileak amaitzea, baina hori bezain garrantzitsua da horiek ez gertatzeko neurriak hartzea. Denak diferenteak gara, eta elkar errespetatzen ikasi behar dugu, hori natural bizitzen».

Sexualitateari behar baino garrantzi handiagoa ematen diote askok, Gisasolaren ustez: «Zer inporta zait niri alboan dudana norekin oheratzen den, edo zer duen hankartean edo bularrean?». Kanpaldia naturaltasun horren isla izatea nahi dute: «Badira uste dutenak gay, lesbiana eta transexualentzat dela bakarrik. Baina ez da horrela. Edonork parte har dezake».

Bide horretan, ghettoetatik ihes egitearen beharra ere ikusten du Gisasolak. «Kasu batzuetan gay, lesbiana eta transexualak izan gara halakoak sortu ditugunak: gay giroko tabernak, adibidez. Halakoekin lortu nahi den naturaltasun hori oztopatzen da neurri batean». Euskal Herriaren kasuan, leku horiek «oso espainolduta» daudela ohartarazi du Gisasolak. «Hori aldatzeko, jabetze eskolak antolatu ditugu. Horien helburua da euskaraz aritzeko orduan segurtasuna lortzea, ondoren hitz egin ahal izateko».

Elizaren «jarrera homofoboen» aurka
Gay, lesbiana eta transexualen eskubideak aldarrikatzea ere badu helburu, sorreratik, kanpaldiak. EGHAMek beti salatu izan du Elizak gay, lesbiana eta transexualekiko dituen «jarrera homofoboak». Gaur ere hala egingo dute, 13:00etan Azpeitiko Loiolako basilikan (Gipuzkoa) egingo duten elkarretaratzean. «Gogorarazi behar da gay, transexual eta lesbianen artean badirela sinestunak. Dena den, ez dugu soilik errespetua eskatuko guretzat, baizik eta gizarte osoarentzat. Izan ere, adibidez, antisorgailuen aurkako jarrerekin gizarte guztiaren aurka ari dira».

Elizak sexualitatea ulertzeko duen moduarekin lotzen ditu Gisasolak jokabide horiek. «Elizarentzat sexu harremanen helburua haurrak izatea da. Guretzat, berriz, plazera sentitzeko, maitatzeko eta sentimenduak adierazteko modua dira, besteen artean, sexu harremanak».

• Datuak
• Zer: 'Maribollotrans' kanpaldia.
• Non: Azkoitiko Kukuherri aterpetxean (Gipuzkoa).
• Aldia: 18. aldia du aurten kanpaldiak.
• Parte-hartzaileak: ehun lagun inguru.
• Jarduera nagusiak: Mendi martxa, yoga saioa, eros masaje saioa, ibilaldi botanikoa, 'maribollotrans' literatur tailerra, biodantza ikastaroa, 'tupper sex' saioa...

> Berria: Ekitaldiak > KUKUHERRIN EGINGO DUTE MARIBOLLOTRANS KANPALDIA

• Kukuherrin egingo dute Maribollotrans Kanpaldia
• EHGAMek antolatzen duen egitasmoa irailaren 11tik 13ra izango da, eta izena emateko epea zabalik dago jada
• Urola Kostako Hitza, 2009-08-05 # Aritz Mutiozabal

Azken urteetan Oiartzungo Arritxulo bilgune izan badute ere, Euskal Herriko Gay-Les Askapenerako Mugimenduak (EHGAM) Azkoitiko Kukuherri aterpetxean antolatuko du 18. Maribollotrans Kanpaldia. «Gure errealitatea beste zonalde batzuetara zabaltzeko eta agerian uzteko asmoz, aurten Azkoitian egingo dugu kanpaldia», aditzera eman du EHGAM taldeko kide Xabier Larreinak. Egitasmoa iraileko bigarren asteburuan ospatuko dute, hilaren 11tik 13ra bitartean, eta hainbat jarduera egiteko aukera izango dute parte-hartzaileek: ikastaroak, irteerak, ikuskizunak eta abar.

Jendeak elkar ezagutzeko aukera izateaz gain, les-gay mugimenduaren aurrerapausoak zeintzuk diren eta une honetan zein esparrutan ari diren lanean azaltzea da egitasmoaren helburu nagusia. Larreinaren hitzetan, «kanpaldiaren bitartez, Urola Kostan gure errelitatea ikustea nahiko genuke. Horretarako, festa bat antolatuko dugu aterpertxean bertan, eta elkarretaratze bat Loiolako basilikaren aurrean. Beraz, eskualdeko herrietako jendeak antolatu ditugun ekitaldietan parte hartzea gustatuko litzaguke».

Akanpatzeko bi aukera
Kanpaldian parte hartzeko bi aukera daude: kanpinean edo aterpetxean. Egonaldia kanpinean egin nahi dutenek 53 euro ordaindu beharko dute, eta aterpetxean ostatu hartu nahi dutenek, berriz, 64 euro. Hauek honako kontu korronte zenbakian sartu beharko dute dirua, izen-abizenak jarriz: 3035-0063-82-0630030222 (Euskadiko Kutxa). Informazio gehiago nahi duenak www.ehgam.org webgunean eskura dezake.

Diru sarrera lehenbailehen egitea komeni dela adierazi dute antolatzaileek, izena emateko lekuak mugatuak direlako. «Gure nahia ez da ahalik eta jende gehien biltzea, baizik eta egitasmoa bera egitea. Beraz, 100 lagunetara mugatzen dugu parte-hartzea», dio EHGAMeko kideak. Maribollotrans Kanpaldian festa giroa izaten da nagusi, eta «askok errepikatu» egiten du urtero-urtero.

Bestalde, Homoerotikotasuna atzo eta gaur erakusketa zabalduko du EHGAM taldeak Kukuherri aterpetxean. Irailaren 5etik 26ra bitartean egongo da ikusgai.

• Maribollotrans Kanpaldiko egitaraua
• Azkoitiko Kukuherri aterpetxean egingo dute aurtengo Maribollotrans Kanpaldia, irailaren 11tik 13ra. Hainbat jarduera antolatu dute 3 egunetarako.
  

• Irailak 11, ostirala
• 18:00etatik aurrera. Harrera eta ongietorria.
• 19:00etatik 21:00etara. Nola egin zure bideoak ikastaroa.
• 21:00etatik 23:00etara. Afaria.
• 00:00etatik aurrera. Ondo pasa, denen artean
  

• Irailak 12, larunbata
• 08:30etik 09:30era. Gosaria.
• 10:00etatik 12:30era. Hainbat jarduera aukeran: mendi martxa, Euskaldunon ahalduntzea ikastaroa eta Yoga saioa.
• 12:00etatik 13:30era. Eros masaje saioa.
• 12:30etik 13:30era. Maribollotrans liburuak.
• 14:00etatik 16:00etan. Bazkaria.
• 16:30etik 19:30era. Hainbat jarduera aukeran: BDSM ikastaroa, bio-dantza ikastaroaeta Gazte Topaketa jardunaldia.
• 20:00etatik 21:00etara. Tupper Sex saioa.
• 21:00etatik 23:00etara. Afaria.
• 23:00etatik 23:30era. Perfomance-a.
• 23:30etik 00:00etara. IKS Sex Perfor.
• 00:00etatik aurrera. Maribollotrans Festa: DJ 2-ttor, DJ Yolanda eta DJ Atxur.
  

• Irailak 13, igandea
• 08:30etik 09:30era. Gosaria.
• 10:00etatik. Yoga saioa.
• 11:00etatik 12:30era. Ibilaldi botanikoa.
• Goizean zehar. Edredoning alternatiboa.
• 13:00etatik 14:00etara. Elkarretaratzea Loiolan.
• 14:00etatik 16:00etara. Bazkaria.
• 17:00etan. Agurra.

> Berria: Ekainak 28 > GIPUZKOA: GAY, LESBIANA ETA TRANSEXUALEN ESKUBIDEEN EGUNEAN HIRUKI ARROSA URRETXUKO UDALETXEAN

• Gay, lesbiana eta transexualen eskubideen egunean hiruki arrosa udaletxean
• El Diario Vasco, 2009-06-24 # F.J.A. • Urretxu

Urretxuko Udala, Ehgamek, hau da, Euskal Herriko Gay-Les Askapen Mugimendua, ekainaren 28an ospatuko den Gay, Lesbiana eta Transexualen eskubideen nazioarteko egunerako egindako deialdiarekin bat egin du. Modu honetara, igandean, udaletxeko balkoian hiruki arrosa ikusgai ipiniko duela jakinarazi du.

Jatorria
Dagoeneko jakina da hiruki arrosa ikurra identifikatzailea naziek erabili zutela. Honakoa homosexualak bereizteko kontzentrazio eremuak bereizteko.

Gaur egun, sarraski hura gogorazten digun irudia bilakatu da, eta bide batez, oraindik bete gabe dauden gay, lesbiana eta transexualen eskubideak aldarrikatzeko erabiltzen da lurralde ezberdinetan, munduan zehar.

> Elkarrizketa: Tino Brugos > "FUNDAMENTALISMO ERLIJIOSOAK HOMOFOBIA ZABALDUKO DU BETI"

• Tino Brugos. Xega kolektiboko koordinatzailea: «Fundamentalismo erlijiosoak homofobia zabalduko du beti»
• EHGAMek antolatuta, 'De Stonewll a nuestros días: 40 años de una lucha' hitzaldia emango du Tino Brugos Xegako kideak. Hitzordua gaur izango da, Errenteriako Mikelazulo kultur etxean, 19:30ean.
• Berria, 2009-06-10 # Uxua Larretxea. Donostia

Tino Brugos (Asturias, Espainia, 1958) Xente Gai Astur (Xega) kolektiboko koordinatzailea da. Azken 40 urteetan gayen, lesbianen eta transexualen aldeko mugimenduek izandako garapenaz mintzatuko da gaur, Mikelazulon (Errenteria). Orain arte eskubideen alorrean izugarri aurreratu bada ere orandik lan asko egiteko dagoela aitortu du.

Hitzaldia Vicente Vadillo Santamaria Francis-en heriotza oroituz abiatuko duzu. Zer garrantzia izan zuen gertaera horrek homosexualen eta transexualen eskubideen aldeko borrokan?
1979. urtean jazo zen gertaera, Errenterian (Gipuzkoa). Nik orduan 20 urte nituen, eta arretaz entzun nuen gertaturikoa. Hedabideek gertaera horren berri eman zuten, eta hurrengo egunean greba orokorra antolatu zen heriotza salatzeko. Finean, gaiaz normal hitz egin zen. Halere, heriotza horrekin ohartu nintzen panorama zaila genuela.

Orain arte asko aurreratu da gayen, lesbianen, eta transexualen eskubideen onarpenean. Nola ikusten duzu egungo egoera?
1969an Stonewall erreboltak gertatu zirenetik egundaino izugarri aurreratu da, aldaketa sakonak izan dira. Hein handi batean ez zen posible izan iraultza, baina egunerokotasunean eragina izatea lortu genuen, bai homosexualen eta transexualen artean bai gizartean orokorrean. Lehen onartzen ez zen gizarte subjektu bat eraiki dugu urte hauetan guztietan. Horretarako, gogor borrokatu gara, baina gauza bat argi daukagu: gelditzeko etorri gara. Onerako zein txarrerako agenda politikoetan gaude.

Globalizazioak ez al dizue erraztu mugimendu guztien arteko harremana eta elkarlana?
Globalizazioak gure mezua munduan zehar zabal dadin eta elkarren berri izan dezagun lagundu digu. Halaber, mugimendu guztien batasuna oso zaila da, herrialde bakoitzeko egoera sozio-politikoa eta kulturala oso desberdina delako. Mugimendua plurala bilakatu da, eta horrek zatiketa dakar, baina, era berean, gizarte klase guztietan eragina izaten ari dela ere erakusten du, eta hori baikorra da.

Aurrerantzean zein alderdi geratzen da bereziki lantzeko?
Espainian legezkoa dena gizarte eremu guztietan arrunt bilakatzea da erronka, eta sozialki onargarria izan dadin borrakatzea. Arruntasun hori gizartearen osotasunera zabaldu behar dugu. Nolanahi ere, jabetzen gara fundamentalismo erlijiosoak beti homofobiak zabalduko dituela. Bestalde, transexualen eskubideen aldeko borrokan lan asko egiteko dago; adibidez, gizarte segurantzak sexu organuen kirurgia operazioak ordain diezaion lortu behar dugu, eta gizartean euren integrazia bultzatu. Bisexualen aldarrikapenak ere lantzeko ditugu.

Ez al dira egun sozialki gayak eta lesbianak transexualak baino hobeto onartzen?
Marketina dago horren atzean. Urte hauetako borroka bereziki gizonezkoek garatu dute, eta, ondorioz, nolabaiteko errespetua lortu dute. Lesbianak ere errespetatzen direla esango nuke, baina hori ez da horren agerikoa. Gayen, lesbianen eta transexualen alde mugimenduetan gizonezkoak monopolioa izan dute, eta hori aldatu behar dugu.

Gizartea kontzientziatua ikusten duzu homosexualen eta transexualen gaien inguruan?
Gizarte sektore bati behin eta berriz jakinarazi behar zaie gure eskubideak bermatzea ez duela euren eskubideen gutxitzea ekartzen, ez gaudela eri, ez garela lehen baino gehiago, baizik eta ageriago gaudela, eta abar. Eztabaida hori gizartera eraman eta iraunarazi behar dugu. Hezkuntzak zeresan handia dauka horretan, eta, horrenbestez, gaia eskolan etengabe landu behar da urtez urte. Gazteek bizi duten errealitatean homosexualak, transexualak eta atzerritarrak daude, besteak beste, eta hori eskolatik asimilatu behar dute.

Egun desberdintasunaren eta aniztasunaren aldeko apologia egiten da, baina benetan uste duzu gizarte hau tolerantea dela desberdina denarekin?
Gertuko kasua denean kolpe antzeko bat gertatzen da, baina lehen ez bezala orain familiak ere gure eskubideen borrokan parte hartzen du. Orain arte umezurtzak izan gara, ez baitzegoen inor babestuko gintuenik. Zorionez, guri laguntzen ikasten ari dira.

> Berria: Maiatzak 17 > ARABA: 7menos20 ETA EHGAM ELKARTEEK ALDAKETAREN ERAGILE IZAN NAHI DUTE

• LGTB elkarteek aldaketaren eragile izan nahi dute
• Homofobia, lesbofobia eta transfobiaren aurkako eguna dela-eta heterozentrismoarekin bukatzeko eskatu dute
• Berria, 2009-05-14 # Jon Rejado • Gasteiz

Lesbianen, homosexualen, transexualen eta bisexualen elkarteek azpimarratu dute gizarte berri bat sortzeko eragile izan behar dutela homofobiaren kontrako borrokan. 7menos20 eta EHGAM Araba elkarteek adierazi dute helburu horren alde egin behar dutela mugimendu sozialekin, sindikalekin eta pentsaera politiko guztiekin lan eginez. Dei hori egin dute maiatzaren 17an egingo den homofobiaren, lesbofobiaren eta transfobiaren kontrako egunaren atarian.

Egungo sistema heterozentrista dela nabarmendu dute elkarteek, eta homofobiaren arazoa sortzen duela kritikatu dute heterosexualitatea ardatz duen sistema den neurrian. Lesbianek, homosexualek, transexualeek eta bisexualek sufritzen dituzte beldur eta aurreiritzi horiek, eta hori oinarritzat hartuta, sufritzen dutenek izan behar dute aldaketa eragileak.

Ideia hori aldarrikatuko dute maiatzaren 17an egingo diren ekimenetan. Aldarrikapen horrez gain Eliza Katolikoaren jarrera salatuko dute. Celestino Migliori Vatikanoko ordezkariak Nazio Batuen Erakundean egindako adierazpenak gogora ekarri dituzte, homosexualitatea ez despenalizatzeko eskatu zuen.

Hainbat ekimen
Maiatzaren 17a dela-eta hainbat ekimen antolatu dira Euskal Herrian. Maiatzaren 16an eskultura baten inaugurazioa egingo da, eta elkarretaratze nazionala deitu dute 18:30ean. Maiatzaren 17an bertan, manifestazioa egingo da Gasteizen, eta 12:30ean aterako da Babesgabetuen Andre Mari Zuriaren plazatik. Horrez gain Transfobia, lesbofobia eta homofobiaren aurpegiakerakusketa gaurtik aurrera ikusgai egongo da Gasteizko Hikaateneon.

> Berria: Ekitaldiak > ABIAN DA EHGAMEK ANTOLATUTAKO LEHENENGO MADELON LITERATURA LEHIAKETA

• Abian da EHGAMek antolatutako lehenengo Madelon literatura lehiaketa
• Gara, 2009-04-21 # A.A. • Donostia

Euskal Herriko Gay-Les Askapenerako Mugimenduak «Madelon» gazteentzako literatura lehiaketa jarri du martxan. «Dena lortua dugula esaten diguten garai hauetan, gazteriaren ikuspuntua ezagutzeko modu egokiena iruditu zitzaigun», azaldu zuen Ander Gisasola EHGAMeko kideak. Bide batez, Xanti Altxu, Madelon, EHGAM-Gipuzkoako fundatzaile izandakoa gogoan izango dute.

Gaia librea izango da, baina gay, lesbiana, bisexual edota transexualen arteko harremanak edo beste edozein «erlazio ez-normalizatu» islatu beharko du. Bi maila izango dira: 14-17 urte artekoak eta 18-25 artekoak. Kontakizunak euskaraz zein gaztelaniaz aurkez daitezke eta bost eta hamar orri bitarteko luzera izan beharko dute.

Lanak EHGAMen Gipuzkoako egoitzara bidali behar dira maiatzaren 29a baino lehen. Sari banaketa ekainaren 26an izango da Donostiako Koldo Mitxelena kulturgunean. Gisasolaren esanetan, «saria ez da azken unera arte jakitera emango, garrantzitsuena gaiaren inguruko hausnarketa iruditzen baitzaigu». Argibide gehiago, www.ehgam.org-en.

> Berria: Ekitaldiak > MADELON SARIAK LITERATURA LEHIAKETA ANTOLATU DU EHGAMEK

• Madelon Sariak Literatura Lehiaketa antolatu du EHGAMek
• Xanti Altxuren omenezko literatura lehiaketa hau 1 8 eta 25 urte arteko gazteei zuzenduta dago
• Oarsoaldeko Hitza, 2009-04-21 # Jon Gonzalo

Xanti Altxu herritarraren omenezko Madelon Sariak Literatura Lehiaketa antolatu du EHGAM-ek. Antolatzaileek jakinarazi dutenez, Xanti Altxuk bere bizitzan bultzatu zituen baloreak sendotzea eta zabaltzea izango du helburu lehiaketa honek, batez ere, homosexualen eta transexualen bizimoduaren normalizazioa.

Madelon Sariak Literatura Lehiaketa 18 eta 25 urteko gazteei zuzenduta dago. Gaia librea da, baina gay, lesbiana, transexual edo beste edozein motatako erlazio afektiboei tartea egin beharko die.

«Aukera polita iruditzen zaigu gazteek gay-en, lesbianen eta transexualen errealitateari buruz gogoeta egiteko. Halaber, gazteek duten ikuspuntua jaso eta erradiografia antzeko bat egin nahi dugu. Horrela, aurrera begirako ekintzetan haien ikuspuntua kontuan hartuko dugu», azaldu zuen lehiaketaren aurkezpenean Ander Gisasola EHGAMeko kideak.

Antolatzaileek jakinarazi dutenez, lehiaketara aurkezten diren lanak bost orrialdeko gutxieneko luzera eta 10eko gehienezkoa izango dute. Lanak jasotzeko azkeneko eguna maiatzaren 29a izango da.

Lehiaketari buruzko informazioa gehiago www.ehgam.org webgunean aurki daiteke.

• Oinarriak
• Parte-hartzaileak. 14 eta 25 urte arteko gazteek parte har dezakete.
• Hizkuntzak. Lanak euskara eta gazteleraz aurkeztu ahal dira.
• Mailak. Bi maila izango dira. 14-17 urteko gazteena, eta 18-25 urtekoena.
• Sariak. Maila bakoitzeko lan hoberena sarituko da, eta baita maila bakoitzeko bi finalistak ere bai
• Gaia. Gaia librea izango da, baldintza bakar batekin: gay-en, lesbianen, bisexualen edo transexualen harreman afektibo-sexualak islatzea.
• Luzera. Lanek bost eta hamar orrialde bitarteko luzera edukiko dute, espazio bikoitzean, Times New Roman 12an.
• Aurkezpena. Lan originala eta bi kopia aurkeztu beharko dira.
• Epeak. Lanak 2009ko maiatzaren 29a baino lehen bidali behar dira.
• Helbidea. EHGAM, Gaztegune-CRAJ, Anoeta 28, Txuri Urdin, 20014 (Donostia).
• Datu pertsonalak. Irabazleekin harremanetan jartzeko erabiliko dira soilik.
• Argitalpena. EHGAMek irabazleen lanak argitaratzeko eskubidea gordeko du.
• Sari banaketa. Ekainaren 26an.

> Laburrak: Ekitaldiak > EHGAMEK MADELON GAZTE LEHIKETA ANTOLATU DU

• EHGAMek Madelon gazte lehiaketa antolatu du
• Berria, 2009-04-21

EHGAM elkarteak Madelon literatur lehiaketa antolatu du, 14 urtetik 17ra eta 18tik 25era arteko gazteentzat. Gay, lesbiana, bisexual eta transexualekin lotutako gaiak jorratu behar dituzte narrazioek, euskaraz edo gaztelaniaz. Maiatzaren 29a baino lehenago igorri behar dira narrazioak.

> Berria: Ekitaldiak > EHGAMEK MADELON LITERATUR SARIAK PRESTATU DITU LEHEN ALDIZ

• EHGAMek Madelon literatur sariak prestatu ditu lehen aldiz
• Gay, lesbiana, bisexual, transexual edo beste edozein motako harreman afektiboak islatu behar dituzte parte hartzaileek.
• Irutxuloko Hitza, 2009-04-21

Euskal Herriko Gay-Les Askapen Mugimenduak Madelon Sariak Literatura Lehiaketa antolatu du. Sari hauei Xanti Altxu Madelon, Gipuzkoako EHGAMeko fundatzaile zenaren izena eman diete, bera izan baitzen Euskal Herrian gay, lesbiana, transexual eta beste adierazpen sexualen mugimenduaren gizarteratzaileetako bat. Sari hauek helburu bera dute, gazteen artean mugimenduaren «bisibilitatea bultzatu eta normalizatzea».

Bi kategoria izango ditu lehiaketak. 14 eta 17 urte bitartekoa bata eta 18 eta 25 urte bitartekoa bestea. Lehiaketaren gaia librea bada ere, beharrezkoa da gay, lesbiana, bisexual, transexual edo beste edozein motako erlazio afektiboak bertan islatzea.

Lanak euskaraz zein gaztelaniaz aurkeztu daitezke eta maiatzaren 29a bukatuko da epea. Lehiaketaren oinarriak eta informazio gehiago, www.ehgam.org webgunean edo 667435570 telefonoan.

> Berria: Ekitaldiak > MADELON SARIAK LITERATURA LEHIAKETA ANTOLATU DU EHGAMEK

• Madelon Sariak Literatura Lehiaketa antolatu du EHGAMek
• Xanti Altxuren omenezko literatura lehiaketa 18 eta 25 urte arteko gazteei zuzenduta dago
• Oarsoaldeko Hitza, 2009-04-19 # J. Gonzalo

Xanti Altxuren omenezko Madelon Sariak Literatura Lehiaketa antolatu du EHGAMek. Antolatzaileek jakinarazi dutenez, Xanti Altxuk bere bizitzan bultzatu zituen baloreak sendotzea eta zabaltzea izango du helburu lehiaketa horrek, batez ere, homosexualen eta transexualen bizimoduaren normalizazioa.

Madelon Sariak Literatura Lehiaketa 18 eta 25 urteko gazteei zuzenduta dago. Gaia librea da, baina gay, lesbiana, transexual edo beste edozein motatako erlazio afektiboei tartea egin beharko die. Nolanahi ere, lehiaketari buruzko xehetasunak bihar Donostian egingo duten aurkezpenean emango dituzte antolatzaileek.

> Berria: Salaketak > EKINTZA GLOBALERAKO ASTEAK KAPITALISMOA ETA GERRA SALATUKO DITU BILBON

• Ekintza Globalerako Asteak kapitalismoa eta gerra salatuko ditu Bilbon
• Larunbatean abiatuko dituzten ekitaldi «bizi eta koloretsuetan» parte hartzeko deia egin dute gizarte eragileek
• Berria, 2009-03-26 # Miren Korta • Bilbo

Hainbat sindikatuk eta gizarte erakundek kapitalismoaren eta gerraren aurka Ekintza Globalerako Astea egingo dute Bilbon larunbatetik aurrera. Belem do Para hiriko (Brasil) IX. Munduko Gizarte Foroak hala eskatuta, «mundu osoko ekintza eta mobilizazio astearekin bat egitea» erabaki dute antolatzaileek, Euskadiko Gazteriaren Kontseiluko ordezkari David Lopategik aurreratu duenez.

Ekitaldi sorta hasteko, larunbatean elkarretaratze «bizi eta koloretsua» egitera deitu dute, Kapitalismoaren aurka. Premiazkoa da beste mundu bat lelopean. Bilboko Plaza Biribileko BBVAren egoitza parean izango da hori, 20:00etan. Kontzentrazioan bi helburu dauzkate: krisi ekonomikoa salatzea eta G-20 taldeak apirilean Londresen egingo duen bileraren kontra egitea.

Lopategik gogor kritikatu du G-20 taldeak duen jarrera: «Krisiari aurre egiteko abian jartzen diren salbazio plan guztiek logika berbera dute; alegia, mozkin pribatuak bermatzeko, galerak sozializatzea». Aldi berean, gogora ekarri du apirilaren 4an Estrasburgon (Frantzia) NATOk egingo duen bilera. «NATOren 60. urtemugaren harira, guk ez dugu ezer ospatzerik. Bakea ez da inolaz ere armagintza politikaren eta esku-hartze militarra indartzearen ondorio izango», gaineratu du. Aitzitik, «berdintasunean, askatasunean eta justizia sozialean» sakontzeko eskaera egin die Lopategik agintariei.

Ekitaldiz jositako egitaraua
Bizkaiko 30 talde inguruk babestu dute Ekintza Globalerako Astea. Hala, ekitaldi ugari izango dira Bilbon apirilaren 4a arte. Astean, manifestazioak, elkarretaratzeak, tailerrak eta hitzaldiak egingo dituzte, «krisia, gerra, biolentzia eta arrazakeria» salatzeko.

Antolatzaileen artean honako hauek daude, besteak beste: ELA, LAB, ESK, EILAS eta EHNE sindikatuak, Bizkaiko Emakumeen Asanblada, Ekologistak Martxan, SOS Arrazakeria eta Kakitzat, Anitzak eta Harresiak Apurtuz elkarteak.

> Berria: Salaketak > ARABA: ELIZAK ETA PPK JARRERA HOMOFOBOA DUTELA SALATU DU EHGAMEK

• Elizak eta PPk jarrera homofoboa dutela salatu du EHGAMek
• Gay, lesbiana, bisexual eta transexualak elkartzen dituen erakundearen adarra sortu dute Araban
• Berria, 2009-03-26 # Erredakzioa • Gasteiz

«Homofobiaren botoak onartuko ditu alderdi sozialistak Euskal Autonomia Erkidegoan?». Galdera hori eginez aurkeztu zuen bere burua Arabako EHGAMek, atzo, Gasteizen. Talde horretako kide Jaione Martinez de Albenizek eta Aritz Martinezek adierazi dute PPk emakume, gay, lesbiana eta transexualen eskubideei dagokienez daukan jarrera «aski ezaguna» dela. PSE-EEri galdetu diote ea garrantzi handiagoa duen Lehendakaritza eskuratzeak gay, lesbiana eta transexualen eskubideak errespetatzeak baino.

Elizak gay, lesbiana, bisexual eta transexualen aurka daraman «gurutzada» ere salatu du Arabako EHGAMek lehen agerraldian. «Homofobia, lesfobia eta transfobia bultzatzen dituen erakunde antolatua» da Eliza, EHGAMentzat. Hiesa bultzatzea eta sexu joerarengatik zigorrak jarri nahi izatea ere aurpegiratu diote. «Noiz arte jarraituko dute jarduera kriminal horrekin gure gobernuen oniritziarekin eta diru publikoa ere erabiliz?», galdetu dute.

Arabako EHGAM gisa horretako erasoei aurre egiteko sortu dela jakinarazi dute taldeko kideek: «Erasotik sortu gara, homofobiatik; kaletik sortu gara, eta kalean aritzeko». EHGAMek lanean 32 urte daramatzan arren, antolatzen jarraitzeko beharra nabarmendu dute, «orain inoiz baino gehiago». Larunbatean aurkezpen festa egingo dute, 22:00etan, Gasteizko Mur Mur tabernan.

> Berria: Zinema > ERRENTERIA: EHGAMEN ESKUTIK, LES.GAY.TRANS ZINEMALDIA IZANGO DA HERRIAN

• EHGAMen eskutik, Les.Gay.Trans Zinemaldia izango da herrian
• Etzi eta etzidamu zortzi lan ikusteko aukera izango da Errenteria Hiria Kulturgunean; bi emanaldiak 19:30ean dira
• Oarsoaldeko Hitza, 2009-02-12 # Urko Etxebeste

EHGAMek antolatuta, etzi eta etzidamu Les.Gay.Trans Zinemaldia izango da Errenteria-Oreretan. Bilbon urtarrilaren 30etik otsailaren 9ra egin zen Zinegoak-en jarraipena da zinemaldia, eta Donostiarekin batera tartekatu dituzte jarraipen honetako emanaldiak. Etziko eta etzidamuko saioak Errenteria-Hiria Kulturgunean izango dira, eta bi emanaldiak 19:30ean hasiko dira.

Denera, gayekin, lesbianekin edo transexualekin zerikusia duten zortzi lan aurkeztuko dituzte Errenteria-Oreretako Les.Gay.Trans Zinemaldian; hiru etzi, eta beste bostak igandean. Film laburrak dira gehienak, etziko Improvvisamente l'inverno scorso ezik, 58 minutuko lana delako. Zinemaldi honen antolaketa lana EHGAMena izan bada ere, Errenteriako Udalak laguntza eman du. Ondoko koadroan ikus daitezke bi egunetan emango dituzten sorkuntzak.

«Bazterketaren kontrako borroka»
EHGAMetik jakitera eman dute bi egunetan erakutsiko diren lanek jatorri eta ikuspuntu ezberdinak dituztela: «Zinemaren bidetik, bere jarrera sexualagatik baztertuak izaten direnen borrokak aurkeztu nahi ditugu», esan dute.

Era berean, herritarrei emanaldietara agertzeko eskatu diete, «aurreiritziak baztertzeko bidean».

• Egitaraua
  

• Otsailak 14, larunbata
• 'Depois de tudo'. Brasil, 2008. Iraupena: 12 minutu; Zuzendaria: Rafael Saar; Sinopsia: Agure bikote batek (haietako bat ezkondua dago) isilpean elkar maite du. Izan ere, elkar maite dutenek elkarren ondoan egotea besterik ez dute nahi eta horretarako itxaron beharrak suposatzen duen esfortzuak pena merezi du.
• 'El mueble de las fotos'. Espainia, 2008. Iraupena: bi minutu; Zuzendaria: Giovanni Macelli; Sinopsia: Gure egongelan dagoen argazkien altzaria nire familiaren erakusleihoa da. Denak daude bertan, ... izan ezik.
• 'Improvvisamente l'inverno scorso'. Italia, 2008. Iraupena: 58 minutu; Zuzendariak: Gustav Hofer eta Luca Ragazzi; Sinopsia: Bapatean, joan den neguan Gustav-en eta Lucaren bizitza aldatu egin zen, Italiako Gobernuak sexu bereko bikoteei zenbait eskubide eskaintzen dizkien lege aurreproiektua aurkeztu zuenean, baina aldi berean, Italia osoan homofobia korronte orokor bat sortzen da.
  

• Otsailak 15, igandea
• 'Bajo mi mirada'. Euskal Herria, 2008. Iraupena: sei minutu; Zuzendaria: Ainara Torres; Sinopsia: Neska batek bere etxe aurreko zerbitzaria zelatatzen du. Beregana gerturatu eta interesa azaldu ondoren, zerbitzaria tabernatik aterako da bere mutil-lagunarekin, norbait begira duela sumatu gabe.
• 'De compras con mi madre'. Euskal Herria, 2008. Iraupena: 18 minutu; Zuzendaria: Yolanda Martinez; Sinopsia: Sarak, bere ama aberatsarekin eta bitxiarekin eroskerak egitera joatea onartuko du, nahiz eta amak bere orientazio sexuala ez onartu.
• 'La espinita'. Euskal Herria-Frantzia, 2008. Iraupena: zortzi minutu; Zuzendaria: Tania Arriaga; Sinopsia: Marije, osasun arazo larria duela jakin ondoren, bere lagun arrain-saltzailearengan babesa bilatzen saiatuko da.
• 'La Yesi TV'. Euskal Herria, 2008. Iraupena: 22 minutu; Zuzendaria: Asier Irazabal; Sinopsia: 22 minutuko erokeria arrosa. Kanal tematiko batean du oinarri lan honek: prentsa arrosa, estetika klinikak eta ospearen menpe bizi diren pertsonaiak dira telebista katearen edukiak. Yessica da katearen gidaria.
• 'Yo solo miro'. Espainia, 2008. Iraupena: 18 minutu; Zuzendaria: Gorka Cornejo; Sinopsia: Juliana eta Eduardo ezkonduta dagoen bikote arrunta da, itxuraz. Baina itxura horien atzean, pentsaezinezko egiak ezkutatzen dira eta elkarri dioten maitasuna horren gibelean.

> Berria: Abenduak 1 > HIESAREN AURREAN "ERNE" EGOTEKO ESKATU DUTE HIESAREN AURKAKO TALDEEK

• Hiesaren aurrean «erne» egoteko eskatu dute hiesaren aurkako taldeek
• GIB birusa garatzea errazten duten gaixotasunak bikoiztu egin dira azken bost urteetan
• Berria, 2008-11-28

Gipuzkoan hiesak 700 pertsona ingururi eragiten die, eta heldu diren urteetan kopuru hori gehitu egingo dela ohartarazi dute hiesaren aurka lanean dabiltzan erakundeek. Hori dela eta, «erne» egoteko eskatu dute.

Sexu harremanen bitartez kutsatzen diren hainbat gaixotasun -sifilia, gonokozia eta klamidiasia, besteak beste- gehitu egin direla ohartarazi du Mikel Martinek, EHGAM Euskal Herriko Gay-les Askapenerako Mugimenduko ordezkariak, Donostian atzo egindako agerraldian. Gonokoziari dagokionez, esaterako, azken hiru urteetan bikoiztu egin dira gaixotasun horren kasuak, 2003an bost pertsonak edukitzetik iaz hamar pertsonak edukitzera pasatu zen.

GIBaren inguruan egiten diren diagnostikoen %30 berandu egiten direla nabarmendu du Asier Lekuonak, Acasgi Hiesaren Kontrako Gipuzkoako Elkarte Hiritarreko kideak. Datozen urteetan kasu gehiago azalduko direla adierazi du.

Gehitu Euskal Herriko Gay, Lesbiana, Transexual eta Bisexualen Elkarteko kide Sergio Iñigezek, administrazio publikoei eskatu die ez dezatela erabil krisi ekonomikoa hiesaren aurka lan egiteko zuzendua dagoen inbertsioa gutxitzeko.

Astelehenean, Hiesaren Aurkako Nazioarteko Eguna dela eta, herritarrak elkarretaratzera deitu ditu Arritxu Marañon Donostiako Udaleko zinegotziak. Elkarretaratzea Teresa de Calcuta plazan egingo dute, 19:30ean.

> Berria: Trans > TRANSEXUALITATEA BURUKO ERITASUNEN ZERRENDATIK ATERATZEKO ESKATU DUTE

• Transexualitatea buruko eritasunen zerrendatik ateratzeko eskatu dute
• Bilbon eta Donostian elkarretaratzeak egin dituzte gizartean nagusi den «gizon-emakume binarismoa» amaitzeko
• Berria, 2008-10-12 # Ainhoa Sarasola · Donostia

DMS-IV. Hizki horiekin dago jasota buruko eritasunen Europako zerrendan transexualitatea. AEBetako zerrendan ere jasota dago, beste kode batekin. Hizkiak hizki, transexualitatea buruko eritasun gisa hartzen du egun Osasunerako Mundu Erakundeak (OME). Horrek, osasun zerbitzuetara jotzen dutenean transexualentzat prozesu «oso gogorra» dakarrela uste dute Euskal Herriko Gay eta Lesbianen Askapen Mugimenduak (EHGAM) eta Medeak kolektibo feministak. Transexualitatea buruko gaitzen zerrendatik kentzeko eskatu zuten Donostian eginiko elkarretaratzeetan, atzo.

Josebe Iturrioz Medeak-eko kideak azaldu zuenez, transexualek osasun zerbitzuetara jotzen dutenean, psikiatra baten eskuetatik pasatu behar izaten dute lehenik, eta «prozesu gogorra» da hori haientzat. «Arazoren bat baduzu, depresioa esaterako, ez dizute uzten aurrera jarraitzen». Medikuntzak halako kasuetan jarraitzen dituen metodologia eta testak ere ez direla batere egokiak deritzo. «Nola neurtzen da gizontasuna eta emakumetasuna? Amaren zapatak jartzen ote dituzun edo makillatzen zaren galdetuta?».

Osasun sistemak, gizartean nagusi diren gizon-emakume bi polo hegemonikoak indartzen dituela uste du Iturriozek, eta ez dago horren alde. «Zergatik emakume batek ezin du zakilik izan? Guk diogu sexua bera eraikia dela, eta gorputzak askotarikoak direla; hor daude intersexualak, adibidez». Ordea, intersexualei jaiotzez ebakuntza egiten zaiela, eta normalean gainera ezkutatu egiten zaiela dio Iturriozek. «Beraz, errealitate hori ez dugu ezagutzen. Beti izango dira gutxiengo bat, erreprimitzen dugun heinean».

Hala, «gizon-emakume binarismoa» gainditu, eta horietatik harago, gorputzen aniztasuna aitortzeko eskatzen du. «Horregatik diogu gure gorputzak ez daudelagaixorik edo ez direla erratzen, baizik eta gizartea erratzen dela». Tokian tokiko erakundeei transexualitatea eta intersexualitatea modu integralean eta transbersalki lantzeko ere eskatzen die. Iturriozen esanetan, ez baita berdintasunerako departamentuetan lantzen diren gaietatik aparte dagoen zerbait, «sexualitatearen barruan eta sexismoarekin erlazionatua» dagoen auzia baizik.

Iritzi berekoa da Julen Zabala EHGAMeko kidea. Instituzioetatik auzia modu osoagoan landu beharko litzatekeela dio. Urtetan transexualitatearen auzia baztertuta egon dela uste du, baina ari direla, gay eta lesbianen eskubideen aldeko mugimendutik, errealitate hori azaleratzen saiatzen. Auzia gay eta lesbianen borroka agendan dagoela dio.

Eta transexualek izan ditzaketen arazo zehatzetatik harago ere, bi sexu nagusiren binarismoak ez duela zertan hala izan behar uste du, gizartean eredu hori oso errotuta badago ere. «Dena dago guztiz markatua; komunak neskentzat eta mutilentzat, nortasun agirian sexua jartzea... adibideak baino ez dira, baina garbi erakusten dutenak egunero estereotipo oso indartsuak sortzen dituztela, eta horrek eragina badu». Ordea, inguruan kasu latzen bat gertatzean soilik jabetzen da gizartea errealitate horretaz, Zabalaren ustez. Horregatik eskatzen du arlo guztietako erakundeen esku-hartzea.

Eskaera zehatzak
Transexualitatea buruko gaitzen zerrendatik ateratzeko eskatzeaz gainera, beste hainbat eskaera egin zituzten bi elkarteek atzoko protestetan. Hormona tratamendu eta ebakuntza «askeak» aldarrikatu zituzten, psikiatraren tutoretzarik gabekoak. «Genital anbiguoekin» jaiotakoei egun gutxira egin ohi zaien ebakuntza egiteari uzteko, agiri ofizialetatik «sexua» eta «ezertarako balio ez duten antzeko datuak» ezabatzeko, eta transexualen babeserako legeak sustatzeko ere eskatu zuten.

Hala, Osakidetzako lehen artatzean «erabateko hobekuntza» eta Gizarte Segurantzan tratamendu eta ebakuntzak onartzea aldarrikatu zuten. Eusko Jaurlaritzari, berriz, Generoaren Saila sortzeko eta transexualitatea berdintasunerako departamentu eta arloetan lantzeko eskatu zioten.

Donostian bezala, Bilbon ere elkarretaratzea egin zuten Trans Koordinakundeak deituta, eskaera berberak plazaratzeko. Gaurko, berriz, Gasteizen 7menos20 eta Las Invertidas taldeek deitu dute hitzordua, 13:00etan, Andra Mari Zuriaren plazan.

> Berria: Ekitaldiak > EHGAM KANPALDIA: HOMOFOBIAREN KUTSADURATIK APARTE

• Homofobiaren kutsaduratik aparte
• Ostiralean hasi zen, Oiartzungo Arritxulo aterpean, EHGAMen Les-Gay kanpaldia, eta gaur amaituko da. «Eguneroko bizimodu merkantilistatik» irten, eta aniztasunean elkarrekin bizitzen ahalegindu dira bi egunez.
• Berria, 2008-09-21 # Mikel Perurena · Oiartzun

Txirrindulariek malda gogorrak gainditu behar dituzte Aritxulegiko mendatea (Oiartzun, Gipuzkoa) garaitzeko. Malda gogorragoak izan ohi dituzte, egunerokoan, lesbiana, gay eta transexualek. Mikel Martin Conde EHGAM Euskal Herriko Gay-Les Askapen Mugimenduko kideak gogoratu duenez, «pertsonak eta sexualitatea askatzeko» gunea zabaltzen dute, hala ere, urtero: Les-Gay kanpaldia. «Egunerokotasunean dugun kutsadura homofobikotik irten eta elkarrekin bizitzeko beste modu batzuk probatzen ditugu», dio Martin Condek. Aurten Aritxulegiko mendatearen bidean dagoen aterpean antolatu du kanpaldia EHGAMek, Arritxulon.

Ostiral arratsaldean hasi ziren topaketak, eta, ordurako, 85 lagun elkartu ziren. Aterpeak 120 lagunentzako lekua du eta atzo gauean dena betetzea espero zuten antolatzaileek. Euskal Herri osotik bildu da jendea aurtengo kanpaldira, baita Leondik, Zaragozatik, Salamancatik (Espainia), Lyondik (Frantzia), Mauritaniatik eta Txiletik ere, besteak beste.

Martin Conde pozik agertu da aurtengo ekitaldiarekin: «Antolatzen ari zarenean, beti pentsatzen duzu ea dena ondo joango den; atzo [ostirala], afaldu eta egitaraua aurkeztu genuenean, aurpegiak ikusi, eta oso pozik jarri nintzen». Iaz baino jende gehiago elkartu dela, eta asko berriak direla, nabarmendu du EHGAMeko kideak.

Herri txikietako presioa
Aurten lehen aldiz etorri direnen artean, bat bereizi du Martin Condek: Gipuzkoako herri txiki bateko 50 urte inguruko emakume bat. Kezkaturik eta urduri omen zegoen izena emateko deitu zuenean. «Atea zabaldu diogu eta garrantzitsua da atea irekita uztea, eta berak ere beste batzuentzat atea irekita edukitzea». Kasu horretan, kanpalekura etortzeko erabakia hartzea jabetzeko edo boterea hartzeko modua dela adierazi du EHGAMeko kideak: «Urratsa egiten duenak hor egon behar du gero, beste batzuek urrats bera egin nahi dutenean laguntzeko». Albotik, Medeak elkarteko Josebe Iturriozek adierazi du lesbianen bazterketa oso gauza berezia dela: «Askoz gogorragoa da, herri txikietan batik bat». Hala ere, EHGAMek urtero antolatzen duen kanpaldia «arraroa» da, gizon baino emakume gehiago biltzen ari direlako azken urteetan. «Hori ez da batere normala, emakume lesbianak askoz ere ezkutatuago daudelako».

Iturriozen ustez, EHGAM punta-puntako erronkak aurkezten ari da, eta «neskentzako» eskaintza politiko erakargarria egiten ari da: «Instituzioak lantzen hasi dira gauza batzuk, baina gaur egun, hemen, ez dago beste gunerik gai hauetaz hitz egiteko». Gai horien artean daude, esaterako, transexualitatea, pornografia, queer teoriak edo drag-king-ak.

Iturriozek nabarmendu du transexualitatea «mende honetako erronka» izango dela. Izan ere, hormonak hartzeari utzi diote batzuek, beste batzuek uko egin diote ebakuntzak egiteari, teoria berriak agertzen ari dira... Iturriozen arabera, «iraultza» gertatzen ari da arlo horretan. Kanpaldian Post porno tailerra egin dute aurten, adibidez.

Hausnartzeko ez ezik, ondo pasatzeko eta elkar ezagutzeko topagunea da Les-Gay kanpaldia. Atzo goizean Bianditzera mendi itzulia egin zuen talde batek, beste batek yoga egiten zuen bitartean. EHGAMeko Amaia Gonzalezek argitu du ez dela derrigorra ekintzetan parte hartzea: «Norberak nahi duena egin dezake». Aukera zabala da: hitzaldiak, txalaparta eta sado-masokismo tailerrak, transfobiari buruzko erakusketa, Arditurriko meategietarako irteera... Atzo gaueko maribollotrans festaren ostean, gaur arratsaldean amaituko dira topaketak, datorren urtera arte.

> Berria: Ekainak 28 > BERGARA: HITZALDIA ETA ZINE EMANALDIA GAY, LESBIANA ETA TRANSEXUALEN ASKAPENERAKO EGUNEAN

• Hitzaldia eta zine emanaldia gay, lesbiana eta transexualen askapenerako egunean
• Goiena.net, 2008-06-18 # Maider Arregi

Ekainaren 28an gay, lesbiana eta transexualen askapenerako eguna da. Hala, Udalak hainbat ekintza antolatu ditu. Besteak beste, "La memoria de los peces" filma eskainiko da gaztetxean ekainaren 25ean, eguaztenean. Hitzaldia eta erakusketa ere izango da. Hona hemen egingo diren ekintzak:

• Erakusketa: "Historiako pertsonaia gay, lesbiana eta transexualak". Ekainaren 30etik uztailaren 11n kultura etxean.
• Hitzaldia: "Askatasun sexuala", EGHAMek antolatuta. Ekainaren 25ean, eguaztenean, osoko bilkura aretoan, 19:00etan.

> Berria: Erakusketak > GOIERRIKO EHGAMEK BEASIANGO USURBE ANTZOKIAN ERAKUSKETA JARRI "HOMOFOBIAREN AURPEGIAK" IZENBURUPEAN

• Goierriko EHGAMek, Gay eta Lesbianen Askapenerako Mugimenduak, Beasaingo Usurbe Antzokian erakusketa jarri du 'Homofobiaren aurpegiak' izenburupean, bihar arte ikusgai egongo dena.
• Askatasuna aldarri
• Goierriko Hitza, 2008-06-14 # Maider del Olmo

“Homofoboa al zara?”, galdetzen die Beasainen erakusketa bisitatzen dutenei inkesta batek. Erantzun ondoko galderak. Aretoan dauden inkesta-orrietan 15 galdera daude, banan-banan erantzun ondoren emaitzaren arabera ematen dute berediktoa: homofoboa zaren ala ez. Alegia, gay, lesbiana eta transexualak errespetatzen dituzun. Javier Saez soziologoak diseinatutako inkesta da (hartza.com).

EHGAMek 30 urte bete ditu. Urteurrenaren harira Homofobiaren aurpegiak izenburupean Goierriko Gay eta Lesbianen Askapenerako Mugimenduko kideek erakusketa jarri dute Beasaingo Usurbe Antzokiko erakusketa aretoan. Bihar arte egongo da zabalik.

Hogeita hamar urte atzera egin dute EHGAMeko kideek, eta oraindik ere gay, lesbiana eta transexualen eskubideen alde egiteko asko dagoela esan dute: «Denboraldi horretan gauza batzuk aldatu dira, dudarik gabe. Hala ere, homofobia, lesbofobia eta transfobia adierazpenak oraindik ere gertatzen dira, mehatxua izaten jarraitzen dute. Arazo honetan sakontzeko EHGAMek erakusketa hau antolatu du, fobia hauei buruzko zenbait aspektu erakusteko».

Ehun bat kasu aukeratu dituzte bere garaian entzute mediatiko handiagoa edo txikiagoa izan zutenak. Dokumentatutako kasu horiekin zenbait egoera, jarrera eta adierazpen homofobo, lesbofobo eta transfobo erakutsi nahi dituzte. EHGAMetik esan dutenez, «erakusketa honetara hurbiltzen direnak ezingo dira axolagabe geratu, eta gutxienez kezka sortuko zaie homosexualitate, lesbianismo eta transexualitatearen aurkako hainbeste deklarazioren aurrean».

Panelak, esanekin
Usurbe Antzokiko erakusketa aretoan panelak jarri dituzte, euskaraz batzuk eta gaztelaniaz beste batzuk. Horietako panel bakoitzean EHGAMek homofobotzat jotzen duen esaldi bat azpimarratu dute; hala, pertsonaia ezagunen eta ezezagunen ahotan entzundakoak jarri dituzte erakusgai. Ezagunen artean daude, beste batzuen artean, Jose Javier Esparza telebista kritikaria, Jose Maria Aznar, Sabino Arana, Jaime Ignacio del Burgo, Fidel Castro, Stalin... Horiez gain, erakusketaren bitartez Elizaren hainbat ordezkarik gay, lesbiana eta transexualekiko duten jarrera salatzen dute.

Erakusketan, panelekin batera, irudiak eta argazkiak ikus daitezke. Aretora sartu eta berehala bisitariei ongietorria egiten die arrosa biziz dotore jantzitako maniki batek.

Biharko eguna izango da Beasainen erakusketa ikusteko azken aukera. Goizez eta arratsaldez egongo da zabalik, 12:00etatik 14:00etara eta 19:00etatik 21:00etara bitartean.

• Erakusketa
• Antolatzailea. Goierriko EHGAM.
• Izenburua. 'Homofobiaren aurpegiak'.
• Eguna. Bihar.
• Ordutegia. 12:00etatik 14:00etara eta 19:00etatik 21:00etara.
• Tokia. Usurbe Antzokiko erakusketa aretoa.

> Berria: Ekainak 28 > EHGAMEK HAINBAT EKITALDI ANTOLATU DITU EKAINEAN ZEHAR, E-28 EGUNA OSPATZEKO

• EHGAMek hainbat ekitaldi antolatu ditu ekainean zehar, Nazioarteko Askapen Gay eta Lesbianoaren Eguna ospatzeko
• Europa Press, 2008-06-06

Urtero bezala, ekainaren 28an Nazioarteko Askapen Gay eta Lesbianoaren Eguna ospatuko da ohiko manifestazio eta festarekin, eta hilabete osoan zehar hainbat ekitaldi antolatu ditu Bilbon Euskal Herriko Gay Askapen Mugimenduak (EHGAM).

Horrela, elkarteko arduradunek prentsa ohar bidez gaur jakinarazi dutenez, "Zine giroan - Cine que entiende" zikloa izango da Basuriko Social Antzokian, ostegunetan, 20:00etan eta 22:00etan. Hilaren 12an, Tudor Giurgiu errumaniarraren "Love Sick" (2004) pelikula ikusi ahal izango da; hilaren 19, Lucia Puenzoren "XXY" (Argentina/Espainia, 2007) izango da ikusgai; eta hilaren 20an, azkenik, Gus van Santen "Bad Night" (AEB, 1985) emango dute.

Hitzaldiak ere izango dira EHGAMek antolatu duen egitarauan. Ekainaren 10ean, La Bolsa eraikinean, 19:30etan hasita, "La lucha trans" gaiaz arituko dira Eric Silva eta Miquel Misse Bartzelonako La Guerrilla Travolaka taldeko kideak.

Hilaren 17an, 19:30etan eta Safo liburutegian, Raul Lopez historiografoak "Del gheto a la calle" liburuaren aurkeztuko du, eta ekainaren 24an, Gaztehgam taldea aurkeztuko du La Bolsa eraikinean, 19:30etatik aurrera.

Ekainaren 28an, Nazioarteko Askapen Gay eta Lesbianoaren Egunean, EHGAM, Aldarte, BiziGay, Euskal Hartzak, Hegoak, Queer Ekintza, Mass Medeak taldeek deituriko manifestazioa abiatuko da 20:00etan Moyua Plazatik, Santiago Plazan bukatzeko.

Ondoren, 22:00etan hasita, afari, ikuskizun eta jaia izango da Kafe Antzokian. Ikuskizunean parte hartuko dute Antzart dantza taldeak, Euskabaretek eta Las Fellini taldeak. Bertan, 2008ko Urrezko Hirukia eta Trapuzko Espartina emango dira.

> Berria: Zinemaldia > LES-GAY-TRANS ZINE PROIEKZIOAK ANTOLATU DITU BIGARRENGOZ EHGAMEK

• Les-Gay-Trans zine proiekzioak antolatu ditu bigarrengoz EHGAMek
• Gizartea Gaur eta etzi izango dira emanaldiak kulturgunean, 19:30ean hasita; denera, hamar film ikus ahalko dira
• Oarsoaldeko Hitza, 2008-02-08 # Iban Iza

EHGAM Euskal Herriko Gay Askapenerako Mugimenduak 2. Les-Gay-Trans Zinemaldia antolatu du Errenteria-Oreretan eta Donostian, gaur hasi eta igandea bitarte. Hain zuzen, zinemaldi hau Errenteria-Oreretan hasi eta bukatuko da, Errenteria Hiria Kulturgunean, emanaldi banarekin. Bihar, aldiz, Donostian izango dira proiekzioak.

Bigarren urtez antolatu ditu zine emanaldi hauek EHGAMek, Bilbon egiten den Zinegoak-en jarraipen gisa. Bilboko Gay-Lesbo-Trans Nazioarteko Zinemaldia da Zinegoak, eta jaialdiaren bosgarren aldia orain gutxi izan zen, urtarrilaren 21etik 27ra. Hala, Zinegoak-en baitan proiektatu zituzten lanetako batzuk ikus ahal izango dira orain herrian eta Donostian.

Adibidez, gaurko emanaldian proiektatuko dituzten lan guztiak film laburrak dira. Denera, zortzi film labur. Etzi, aldiz, bi film emango dituzte kulturgunean, dokumentalak biak.

Sarrerak, gaurtik
EHGAMeko kideek OARSOALDEKO HITZAri jakinarazi diotenez, emanaldi bakoitzerako sarrerak lau euro balio du. Gaur bertan erosi ahalko dira sarrerak, kulturgunean: 10:00etatik 13:00etara goizean, eta 17:30etik aurrera arratsaldean.

Helburua
EHGAMeko kideak gustura gelditu ziren iaz, ekimenaren lehen aldiarekin. Aurtengo proiekzioetan ere ikusle dezente biltzea espero dute. «Jende guztiarentzako proiekzioak dira; baina, noski, homofoboentzako ez dira zabalik egongo ateak», adierazi dute EHGAMetik.

«Zinemaldiaren helburua da azaltzea gaur eguneko familia ereduak eta gay, lesbiana, bisexual eta transexualon errealitateari buruzko ikuspegi anitzak », erantsi dute.

Estreinaldiak Euskal Herrian
EHGAMeko kideek, halaber, proiekzioetan ikus ahal izango diren lanen «balioa» azpimarratu dute. «Film guztiek gay-les-trans edukiak lantzen dituztenez, era honetako filmak ikusteko aukera ona da; zoritxarrez, zinema komertzialetan ez dituztelako proiektatzen».

Hala, Zinegoak-en ondotik, film hauetako batzuren estreinaldia izango da Euskal Herrian. Halaber, bi euskal zuzendariren lanak ikus ahal izango dira gaur.

• Proiekzioak

• Gaur, ostirala 8
• 'Present perfect'. Zuzendaria: Mikel Rueda (Euskal Herria). Sinopsia: Present perfect-a, orainaldia iraganaren ondorioa bezala deskribatzen duen aditz forma da.
• 'La carta del amigo'. Zuzendaria: Jose Julian Bakedano (Euskal Herria). Sinopsia: Preso batek lagun baten gutuna jasoko du. Haien harremanaren gaineko balantzea egiten du bertan. Presoak uko egingo dio gutunari, eta entzun nahi izango lukeena ipintzen duen beste bat imaginatzen du.
• 'Yogurinha borova abduced by Mika'. Laburmetraia.
• 'Kali ma'. Zuzendaria: Somar Chainani (India). Sinopsia: Institutuko klaseko mutil eder batek indiar jatorriko gay gazte bat jipoitzen du. Erasoa jaso duen gaztearen amak mendekua hartuko du King Kong edo Godzilla moduan.
• 'Happenstance'. Zuzendaria: Joyce Draganosky. Sinopsia: adin ertaineko bikote batek bere semea eta honen neska-lagunaren bisita espero du. Amak, neska ikusitakoan modu arraro batean erreakzionatuko du.
• 'What hot guy. ¿Qué tio bueno?'. Zuzendaria: Mary Thompson (India). Sinopsia: hainbeste edatea ez da batere ona, batez ere esnatzerakoan gogora etortzen ez diren gauzak gerta daitezkeelako.
• 'We belong. Pertenecemos'. Zuzendaria: Dean Hamer. Sinopsia: bere ikastetxean dagoen intolerantzia eta fanatismoaren aurka egiten duen landa giroko nerabe ausarta baten istorioa kontatzen du filmak.
• 'Smalltown boy. Chico de pueblo'. Zuzendaria: Moby Longinotto (Erresuma Batua). Sinopsia: David 15 urteko mutiko homosexuala da, eta ez da inoiz gustura sentitu bizi den herrian. Bertakoek ez dute onartzen.

• Etzidamu, igandea 10
• 'La moma'. Zuzendaria: Samuel Sebastian (Espainia). Sinopsia: Castelló hiriko transexual lesbiana baten istorioa kontatzen du.
• 'Fora da lei'. Zuzendaria: Leonor Areal (Portugal). Sinopsia: Teresa eta Lena Portugalgo bi emakume lesbiana dira. 2005ean ezkontzen saiatu ziren, haien herriko legeei aurka eginez.