> Berria: Erasoak > GEHITUREN EGOITZARI ERASO DIOTE, HIRUGARRENEZ

• Gehituren egoitzari eraso diote, hirugarrenez
• Berria, 2010-01-19

Iragan larunbatean hautsi zituzten Gehituk Donostian duen egoitzaren atariko beirak. Gay, lesbiana eta transexualen eskubideen aldeko elkartearen egoitzak jasandako hirugarren erasoa da hilabetean. Abenduaren 26an atariko beirak hautsi eta elkartearen gutunontzia hautsi zuten. Hilaren 4an suziria sartu zieten postontzian. Ertzaintza ikertzen ari da gertaera.

> Berria: Sariak > GEHITU ELKARTEAK JASOKO DU AURTEN GIPUZKOAKO GIZA ESKUBIDEEN SARIA

• Gehitu elkarteak jasoko du aurten Gipuzkoako Giza Eskubideen saria
• Gay, lesbiana, bisexual eta transexualen eskubideen aldeko lana aitortzen diote. Hilaren 11n jasoko dute errekonozimendua Donostiako Kursaal jauregian burutuko den ekitaldi batean
• Noticias de Gipuzkoa, 2009-12-02 # Arantzazu Zabaleta . Donostia

Gehitu elkarteak jasoko du aurten Gipuzkoako Foru Aldundiak urtero banatzen duen Giza Eskubideen saria. Gay, lesbiana, bisexual eta transexualen eskubideak errespetatuak izan daitezen eta guztien normaltasuna lortzeko hamabi urte darama-tza lanean taldeak eta denbora guzti honetan egindako lana aitortu nahi diote sariarekin. Hilaren 11n jasoko dute errekonozimendua Donostiako Kursaal jauregian egingo den ekitaldian.

"Ilusio handiarekin jasoko dugu", aitortu zuen Josean Zapirain Gehituko presidentziako kideak, albistea ezagutu bezain laster. "Bide onetik goazela esan nahi du, orain artean egindakoaren aitortza da", gaineratu zuen. Izan ere, urte hauetan gogor aritu direla lanean gogoratu zuen, eta ordutik gizartea bera asko aldatu dela ere bai. "Duela 20 urteko Gipuzkoa ez zen gaur egungoa, eta eraldaketa horretan guk ere lagundu dugu, berdintasuna eta giza eskubideen errespetuan aurrerapenaren partaide gara", azaldu zuen Zapirainek.

Hala, sariarekin batera, bide horretan guztian lan egin dutenei eskerrak eman zizkion atzo bertan, bazkide, erakunde eta baita administrazioari ere. Izan ere, askotan legeak gizartea baino errazago aldatzen direla aipatu zuen eta, horregatik, administrazioa bidelagun izatea ezinbestekoa dela esan zuen.

Dena den, bidea ez dela bukatu ere garbi dauka, eta oraindik asko dagoela egiteko berdintasuna eta normalizazioa benetan lortzeko gaineratu zuen. Bereziki, hezkun-tzan eta lan munduan diskriminazioarekin bukatzeko, eta horretan lanean jarraitzeko animoa eta bultzada ere bada Foru Aldundiaren saria.

1997an sortu zuten Gehitu 40 lagunek, eta gaur egun 300 bazkide inguru ditu. Homosexualitatearen normalizaziorako bidean, orientazioa eskaintzen dio hori behar duenari, prebentzioa lan-tzen du eta gazteekin lan egiten du, eskoletara joan eta han garatutako tailer eta hitzaldietan. Sozializazioa ere jorratzen du, eta horretarako urte hauetan sortu ditu, besteak beste, mendi eta an-tzerki taldeak edo Gehitu abesba-tza.

Horrez gain, hainbat alor zehatz ere lantzen dituzten batzordeak osatu ditu: hezkuntza batzordea, lesbikoa, hiesarena, nazioarteko lanarena, mugaz gaindikoa eta zahar taldeak daude, guztietan homosexualitatearen normalizazioa helburu. "Hori dela bidea dirudi, saria oso positiboa da zen-tzu horretan", aipatu zuen Zapirainek.

Giza Eskubideen Saria Hilaren 11n jasoko duten sari hau 2004. urtean sortu zuen Giza Eskubideetarako, Enplegurako eta Gizarteratzeko Departamentua zenak. Giza eskubideen alde diharduen jendeari aitorpena egin nahi dio eta gizarte osoaren aurrean eredutzat jarri, "horrelako elkartasuna eta konpromisoa duten herritarrak behar baititu Gipuzkoak", Kiroletako eta Kanpo Ekintzako foru diputatu Iñaki Galdosek atzoko aurkezpenean aipatu zuenez.

Saria sortu zuten urtean Txema Auzmendik lortu zuen, premia handian eta gizartean baztertuta bizi diren kolektiboen duintasunaren alde egindako lanagatik. Ondorengo deialdietan Agipad Gipuzkoako Drogomenpekotasunen Ikerketarako eta Prebentziorako Elkartea (2005), Francisco Etxeberria EAEko Kriminologia Institutuko zuzendariorde eta Aranzadiko kidea (2006), hiesaren aurkako Harri Beltza elkartea (2007) eta Mary Irazusta Donostiako Gizarte Laneko Unibertsitate Eskolako zuzendaria (2008) aukeratu dituzte.

> Berria: Erakusketak > HOMOSEXUALITATEARI BURUZKO ERAKUSKETA EKARRI DU GEHITU ZUMAIARA

• Homosexualitateari buruzko erakusketa ekarri du Gehituk Zumaiara
• 16 gizonezko eta 15 emakume homosexualen biografiak jasotzen dira bertan Hezitzailea izateaz gain, erreferenteak ematea du helburu erakusketa honek
• El Diario Vasco, 2009-10-18 # J.L. Romatet . Zumaia

“Emakume eta gizon homosexualak historian zehar” izeneko erakusketa zabalduko da bihar Foronda kultur etxean. 31 panelez osatutako erakusketa hau urriaren 31 bitartean ikusi ahal izango da kultur etxeko ohiko ordutegian: astelehenetik ostiralera, 9:00etatik 20;00etara, eta 9:30etik 13:30era larunbatetan.

16 gizonezkoen eta 15 emakumezkoen biografiak jasotzen dira Gehitu erakundeak antolatuta erakusketa honetan. Safo olerkariarekin hasi eta Alejandro Amenabar zinemagilearekin amaitzen da. Tartean Alejandro Magno, Miguel Angel, Marguerite Yourcenar edo Jodie Foster bezalako pertsona ospetsuen bizitzen berri jakin daiteke. «Beraien arlo profesionalean oso ezagunak diren pertsonak izan dira. Denak, gainera, homosexualak dira. Erakusketa honen helburuetako bat pertsona hauen homosexualitatea agerian uztea da, askotan ezkutuan egon baita», zioen Gehituko koordina-tzaile Koldobike Mujikak Foronda kultur etxean egin zen aurkezpen ekitaldian. Bere esanetan, «justizia egin behar da pertsona hauekin, askotan sufritu egin zuten eta beraien sexualitateagatik».

Mujikaren esanetan, erakusketa «hezitzailea» da eta «erreferenteak» ere ematen ditu. «Gazte nerabeak bakarrik senti daitezke homosexualitaterako bidea hartzen badute. Baina, ikusten badute pertsona ezagun eta garrantzitsu hauek homosexualak izan zirela, hor erreferenteak aurki ditzake».

Erakusketa eratzerakoan emakumezko eta gizonezkoen arteko parekotasuna bilatzen saiatu zirela gaineratu zuen. «Garai guztiak jasotzen ere saiatu gara. Kristoren aurreko IV. mendeko Safo olerkariarekin hasten gara eta gaur egun hain ezaguna den Alejandro Amenabar zinemagilearekin amaitzen dugu». Aipatu zuenez, nahiko zaila izan da emakumezkoak aurkitzea: «Horrek eramaten gaitu galdetzera ea zer gertatu den emakumezkoekin».

Gaineratu zuenez, Zumaian ikusi daitekeena mustra bat besterik ez da, «Pertsona gehiagoren biografiekin osatzen saiatuko gara». Mujikak eskerrak eman zizkion Udalari eta, bereziki, kultura zinegotziari Foronda uzteagatik erakusketa jartzeko.

Pili Etxabe kultura zinegotziak Berdintasun planaren barruan kokatu zuen erakusketa hau. «Garaia da bidetik oztopoak kendu eta homosexualitatea normaliza-tzeko», aldarrikatu zuen.

> Berria: Ekainak 28 > DONOSTIA: TRANSEXUALEN LAN PREKARIETATEA AZTERTUKO DUTE ASTEARTEAN

• Transexualen lan prekarietatea aztertuko dute asteartean
• Gay Harrotasunaren Egunaren harira, udaletxea eta hiriko autobusak ortzadarren ikurrinaz jantziko dituzte
• Irutxuloko Hitza, 2009-06-26 # X.E.

Gay, Lesbiana eta Transexualen Harrotasunaren Eguna ospatuko da igandean eta elkarteek hainbat ekitaldi antolatu dituzte egun horren harira. Bihar, EHGAMek, Garaipenek eta Medeakek deituta, manifestazioa abiatuko da Bulebarretik, 19:00etatik aurrera. Ordu erdi beranduago, Gehituk egingo du mobilizazioa, Eskoletan armairurik ez lelopean. Egunari amaiera emateko, Udaleko Giza Eskubideak eta Donostia Kulturak lesbiana, gay, transexual eta bisexual -LGTBkolektiboekin batera, festa antolatu dute Gazteszenan. Festan, Ana Elena Pena artistak bere ikuskizuna eskainiko du.

Asteburuan zehar, aldarrikapen ekitaldiekin bat eginez, udaletxea ordatzar banderarekin jantziko dute. Donostiabuseko autobusek ere bandera eramango dute zintzilik.

Astearterako Udaleko Berdintasun atalak mahai ingurua antolatu du, 19:00etatik aurrera, Kutxak Arrasate kalean duen aretoan. Guk ere jaten dugu! Pertsona transexualen lan prekarietatea izenburupean, hainbat LGTB kolektibotako kidek egoeraren inguruan hitz egingo dute.

> Berria: Ekainak 28 > DONOSTIA: BERDINTASUN BIDEAN, AURRERA

• Berdintasun bidean, aurrera
• Munduko txoko askotan homosexualen harrotasunaren eguna ospatuko dute datorren igandean. Data horri lotuta beren eskubideen aldeko manifestazioak izango dira, larunbatean, Donostian.
• Irutxuloko Hitza, 2009-06-25 # Maitane Aldanondo

Igandean 40 urte beteko dira New Yorkeko Stonewall Inn tabernan polizia bertan zeuden homosexual eta transexualak iraintzeko eta atxilotzeko sartu zenetik. Eraso homofoboekin nazkatuta, transexualek eta homosexualek erantzun egin zieten. Gau hartan hasi ziren herri matxinadetatik sortu ziren pertsonen eskubideak eta berdintasuna aldarrikatzen zuten taldeak; eta 1970etik, ekainaren 28a homosexualen harrotasunaren eguna da. Geroztik, herriz herri ateratzen dira kalera, beren eskubideak aldarrikatzeko eta gizarteari erakusteko, oraindik ere, egiazko berdintasuna erdiesteko bide luzea falta dela.

Hilabete osoan zehar egun honen harira hainbat ekitaldi egin dituzte hirian, baina nagusienak datorren larunbatean egingo dituzten manifestazioak dira. Lehena, hirian errotuta dauden EHGAMek, Garaipen-ek eta Medeak-ek deitua, Bulebarretik irtengo da 19:00etan, Transmarikabollo eta gauza guztien gainetik harro! lelopean. Ondoren, 19:30ean, Gehituk deitutako mobilizazioa izango da. Eskoletan armairurik ez lelopean abiatuko dira leku beretik. Gauean, aldiz, elkarrekin ospatuko dute eguna, 23:30etik aurrera, Egia kultur etxean aurrera eramango duten festan.

Hezkuntzaren garrantzia
Normalizazio legala lortu bada ere, gizarte normalizazioa gauzatzeko hezkuntza ezinbesteko esparrua dela uste dute. Horregatik, gay, lesbiana, bisexual eta transexualek osatutako 50 elkarte baino gehiagok 2009a aniztasun afektibo-sexualaren urtea izendatu zuten. Testuinguru horretan, Gehituk hezkuntzaren garrantzia azpimarratuko du bere mobilizazioan, «bidezkoago eta anitzagoa izan behar duela» gogoratuz.

Larunbateko egitaraua ezagutzera emateko egindako prentsaurrekoan Gehituko koordinatzaile Koldobike Mujikak adierazi zuenez, «berebiziko erronka da aniztasun afektibo-sexualarena». Laguntza edo aholku eske elkartera jotzen duten irakasle eta ikastetxeen kopurua asko hazi da azken urteetan eta hezitzaileen aldetik gabezia handiak daudela nabaritu dute.

Gehituk otsailean ezagutzera eman zuen txostenak bildutako emaitzen argitan, ikastetxeak ez dira lesbiana, gay, transexual edo bisexualak -LGTB¬ diren gazteentzat leku seguruak. Ikerketak harrera ona izan duela adierazi zuen Sergio Iñiguezek: «Errealitatearen argazki txiki bat da, eta ordura arte ez zegoen». Egoera honen aurrean, hainbat neurri proposatu zituzten «aniztasunari errespetua eta arreta jartzeko». «Irakasle eta hezitzaileek formakuntza bat behar dute ematen ari diren egoera horien aurrean zer egin ez dakitelako eta erakundeek plangintza bat prestatu behar dute, baliabideez gain, irakasleek nahiz ikasleek nora jo izan dezaten», gehitu zuen Mujikak. Horrekin batera, LGTB seme-alabak dituzten gurasoei «gazte hauek duten zamarekin ohartu eta, marjinatu beharrean, beren laguntza eskaintzeko» eskatu zieten.

Zilarrezko saria
Urtero bezala, Gehituk LGTB direnen eskubideak ondoen defendatu dituen pertsona edo erakundeari Gehitu Zilar saria emango du bihar. Aurten, Nafarroa Bai plataformari emango diote, «Foru parlamentuan transexualitate lege ekimen aitzindaria aurkeztu izanagatik, transexualen aldarrikapen guztiak bilduz», azaldu zuen Mujikak.

> Berria: Ekainak 28 > MAITASUN IZENEAN MIARRITZEN

• Maitasunaren izenean
• Gay eta lesbianen harrotasun eguna. Giro atseginean milatik gora lagun bildu dira Miarritzeko Gay Pride besta kari, 'Askatasuna, berdintasuna eta senidetasuna' aldarrikatzeko, haurrik ezin ukan eta ezkontzak ukatzen dituen eremuan.
• Berria, 2009-06-21 # Nora Arbelbide · Miarritze

Askatasuna, hau da, bakoitzak ukan dezan, molde askean, ezberdin izateko eskubidea, nahi duenaren maitatzeko eskubidea. Berdintasuna, eskubide aldetik baita, bazterrean uzten direnek eskubide berak ukan ditzaten, bai ezkontzeko, bai haurren ukaiteko edo adoptatzeko, baita odolaren emateko ere. Eta, azkena, Senidetasuna, «herritar gehiegi bazterrean uzten delako, elkarren laguntzea ezinbestekoa delako». Christophe Stephany Miarritzeko (Lapurdi) gay eta lesbianen elkarteko (LGP) lehendakariak hitz hauekin esplikatu du Frantziako Errepublikaren leloa hautatu izana Miarritzen atzo iragan Gay Pride bestaren lelotzat: «Leloak guztiei zuzendua izan beharko luke, baina gaur egun ez da horrela».

Milatik gora lagun bildu ziren bestaren karietara, faroan hasita. Miarritzeko Faroak segitzen baitu leku sinbolikoa izaten. Luzaz homosexualen aurkako errepresioari ihes egiten ziotenen bilgune izan zen. Bederatzigarren aldikotz antolatu dute Gay Pride-a Miarritzen, aldarrikapen sakonak ahoan, baina umorea beti lagun. Adibidez, Betiereko Barkamenaren Seroren elkartekoak plazaz baliatu dira Betty eta Tina bezala, zenbait bikote ezkontzeko: «Tabuak hausteko eta noizbait egiazki ezkontzen ahalko garelakoan», Tinak laburbildurik.

20 bat elkarte eta sindikatu elkartu ditu bestak. CGT, CFDT, EHGAM, Gehitu, SOS homophobie, feminismo aldizkako baten aldeko PAF! elkarte gaztea, baita, mendi ibilaldiak antolatzen dituen Euskal ibiltariak. Sexu aukera guztiei irekia, kirola eta homosexualitatea uztartzea bektore bikaintzat dauka, normaltasunaren bidean: «Ez dugu deus ikaragarririk, denak bezalakoak garela!», ulertarazi nahian, elkarteko Beñat Gachen urruñarra (Lapurdi) bezala. Mendi ibilaldietan askatasun osoz sexu berekoak musuka daitezkeela, adibidez. Homofobiarik jasan gabe.

Homofobiaren arazoa eguneroko bizian oraindik indartsu dagoela salatzeko baliatu dute atzoko eguna, hain zuzen. Bere buruaz beste egiteko arrazoietako bat baita oraino, eta eraso fisikoak errealitate izaten segitzen dutelako. Duela hamar egun Baiona Ttipian ekintza homofobo larri bat gertatu da. Oraindik xehetasunak ez dira publiko egin. Miarritzeko faroan, berriz, apirilaren 14an zazpi bat gaztek gizon bat zanpatu zuten. Larriki zauriturik erietxean egon zen luzaz. Salaketa jarri du auzitegian.

Beste salaketa bat ere izan da aste honetan. Baionako, eta Biarnoko Oloroe eta Leskarreko Marc Aillet apezpikuak Gay Pride-aren antolatzaileen aurka agiri bat idatzi du. Betiereko Barkamenaren Seroren elkartea bestara gomitatu izana «zinezko bidegabekeria» da fede katolikoaren aurka, haren iduriko. Gaitzespen ugariren artean, serora berezi horietako bat den Myrtarena: «Ez du beste egitekorik, ala? Gu errespetu osoz gabiltza. Elizak betetzen ez duen lana betetzen dugu, baztertuei laguntza ekartzen diegu, besteak beste, ihesa duten gaixoei». Didier Borotra Miarritzeko auzapezak ere gaitzetsi du agiria, esanaz apezpikuak ez duela zertan horretaz arduratu.

• 40 urte borrokan
• Stonewall. LGBT kolektiboen askapen borrokaren abiapuntu jotzen dira New Yorkeko Stonewall tabernaren inguruan orain 40 urte izandako liskarrak. Urteurren hori dela eta ospatzen da gay eta lesbianen harrotasun eguna hilaren 28an.
• Mobilizazioak. Miarritzen atzo egin bezala, heldu den asteburuan manifestazioak izango dira Hego Euskal Herriko hiriburuetan. Donostian hilaren 27rako deitu dute manifestazioa. Gainerako hiriburuetan 28an bertan dira hitzorduak.

> Berria: Sexismoa > HIZKUNTZA BAINO, HIZTUNA BERA DA SEXISTA, LLEDO FILOLOGOAREN HITZETAN

• Hizkuntza baino, hiztuna bera da sexista, Lledo filologoaren hitzetan
• Gara, 2009-03-05 # Janire Arrondo

Gehitu Euskal Herriko Lesbiana, Gay, Transexual eta Bisexualen elkarteko lesbianen sailak antolatuta, hitzaldia emango du bihar Eulalia Lledo Cunill filologoak Donostiako Arrasate kaleko Kutxa aretoan iluntzeko zortzietan. «Lengoaia ez sexista» du izenburu hitzaldiak eta bertan hizlaria hizkuntza sexista eta emakumeen aurkako indarkeriari hedabideetan zein trataera ematen zaion azaltzen saiatuko da.

Lledo Filologia Erromanikoan doktorea da eta Derrigorrezko Bigarren Hezkuntzako irakasle eta Tarragona eta Lleidako hainbat unibertsitaterekin lanean aritua da. Urteak daramatza hizkuntzaren erabilera aztertzen eta hizkuntza komunikaziorako tresna baino zerbait gehiago dela ikasi du.

Filologoak hizkuntzaren erabilera androzentriko eta sexistaren zergatia aztertu du. Lledok GARAri adierazi zionez, «hizkuntza ez da baztertzailea edo sexista, erabiltzen duen pertsona baizik». Bestalde, pertsonen ideologia edo pentsaera «erakusten» du hizkuntzak hizlariaren ustez. «Izan ere, inor arrazista, homofobo edo sexista bada, hautatzen dituen hitz eta esamoldeetan nabarmenduko zaio».

«Arazoa emakumeak itzalpean uzten dituen esamoldeak erabiltzen direnean agertzen da», adierazi du filologoak. Maiz, genero maskulinoaren erabilera lehenesten da, genero femeninoa baztertuz. Hiztegia hautatzerakoan maskulinoa hautatzen bada, ordea, «gizartearen erdia albora uzten ari gara», Lledoren iritziz. Beraz, ez da hautaketa soil bat, hor «diskriminazioa» gertatzen da.

Bestalde, emakumeak gizartean duen papera aldatzen joan den heinean, «hizkuntzan isla izan du horrek» hizlariaren esanetan. Hala ere, oraindik «gizonezkoaren papera nagusiagoa da», azaldu zuen. Lledoren hitzetan, «emakumea lan munduan egotea ez da berdintasunerako tresna», izan ere, oraindik «etxeko kargak emakumeen gain jarraitzen du».

Komunikabideak
Orokorrean, gizartearen pentsaera aldatzen joan den moduan, komunikabideetako hizkuntzaren erabilera ere aldatuz joan da. Lledok hedabideek emakumeen kontrako indarkeriaren gaineko albisteei zer-nolako trataera ematen dieten ere aztertu du. Filologoaren ustez, hainbat aurrerapauso eman dira alor horretan. Esaterako, «'pasio krimen' esamoldea alde batera utzi eta 'genero indarkeria' erabiltzen dute orain».

Alabaina, oraindik ere «badira bazterrean uzten diren informazioak», Lledoren ustez.

> Elkarrizketa: Percy Fernandez > "HEMEN, INTERNETEN ERABILTZAILEEK KONFIDANTZA GUTXIAGO IZATEN DUTE"

• «Hemen, Interneten erabiltzaileek konfiantza gutxiago izaten dute»
• Percy Fernandez • Psikologoa: Gizonekin sexu harremanak izateko Internet erabiltzen duten gizonen ohiturak ikertu ditu Percy Fernandezek 'Intersex2006' azterketan. Atzo aurkeztu zituen ondorioak Donostian.
• Berria, 2009-02-20 # Mikel Peruarena. • Donostia

«Internet, berez ez da arriskutsua», zehaztu du Percy Fernandez psikologoak (Lima, Peru, 1972). Baina sarean gizonekin sexua bilatzen duten gizonentzat arrisku gehiago egon daitezkeela ohartarazi du. InterSex2006 ikerketa gidatu du Fernandezek; gizonekin sexu harremanak dituzten gizonen Internet ohiturak aztertu ditu, eta sarean ere prebentzioa bultzatzeko beharra dagoela nabarmendu du. Internetek hazten jarraituko baitu: «Errazagoa, azkarragoa eta erosoagoa da».

Nola hasi zinen ikerketa hau egiten?
Nik egina nuen azterketa bat, gizon homosexual eta bisexualen praktika arriskutsuei buruz, beste herrialde batzuetan -AEBetan, Kanadan eta Ingalaterran, adibidez- agertu zelako praktika horien gorakada eta, ondorioz, sexu bidezko gaitzak harrapatzeko arrisku handiagoa. Egin nituen elkarrizketetan, gizon gehienek esan zuten Internet erabiltzen zutela sexu harremanak bilatzeko. Eta jakin-mina sortu zitzaidan, Internetek zer eragin izan zezakeen praktika arriskutsuen hedatzean.

Internetek aldaketa handia ekarri du harremanak egiteko moduan?
Begibistakoa da. Internetek bizitza sozialean eragina du, eta bereziki gizonekin sexu harremanak dituzten gizonen artean. Nik ez dut aurkitu ikerketarik, jakiteko biztanleria heterosexualean eragin bera duen Internetek, sexua aurkitzeko orduan. Baina gay batentzat aski da Interneten solasgune batean sartzea, eta bost minutura aukera izan dezake gizon batekin sexua egiteko gelditzeko.

Ikerketa egin ostean, arriskuak handiagoak direla ondoriozta liteke?
Oro har, ez da aurkitu praktika arriskutsuetan alde handirik, baina aurkitu ditugu beste aldagai batzuk. Adibidez, Interneten erabiltzaileen artean, azken urtean sexu bidezko gaitzen bat eduki duen jende gehiago dago, eta drogaren kontsumoa handiagoa da. Babestu gabeko sexu harremanen eta droga kontsumoaren arteko harreman handia ere nabaritu dugu. Eta jende gehiago dagoela hiesaren probak egin ez dituena. Aldagai horiek pentsarazi digute arrisku gehiago dutela Interneten sexua bilatzen duten gizonek.

Internet bidez zitak egiten dituztenen artean erlaxazio handiagoa dagoela esan duzue aurkezpenean...
Kontua da konfiantza sortzen dela. Interneten sartu, solasean hasi... Eta zitara zoaz konfiantza batekin, pentsatuz pertsona hori sano dagoela, ezagutzen duzula.

Bartzelonan, Madrilen, Bilbon eta Donostian egin duzue ikerketa. Aurkitu duzue ezberdintasunik?
Hiri bakoitzak baditu bere ezaugarriak. Bartzelonak antza gehiago du beste herrialdeekin; Internet arrisku faktore izan liteke han. Madrilen, sexu bikotekideak aurkitzeko orduan, ez du hainbesteko pisua Internetek. Euskal Herrian ere ez, Internetek ez ditu baztertu giroko lokalak. 2006ko ikerketa da; ordutik aldatuko ziren gauzak seguruenik, baina.

Bilbon eta Donostian egindako azterketak ere baditu berezitasunak...
Bai, adibidez, sexu bikotekide gutxiago egotea. Babesik gabeko sexu praktika gutxiago ere bai, Madrilen eta Bartzelonan baino. Eta uzkitik sartzeko praktika gutxiago daude. Hemengo gizon askorentzat uzkitik sartzea ez da hain erakargarri edo atsegina. Nik uste, hemen, alderantziz gertatzen direla gauza batzuk: hemen Interneten erabiltzaileek konfiantza gutxiago izaten dute. Ez dakit, baina uste dut ezaugarri kulturalengatik izan litekeela.

• Homosexualek «sexu segurua» baztertu dutela ohartarazi du Gehituk
• Internet bidez sexua bilatzen duten gayen artean arriskuak ugaritzeko bidean direla uste du Stop Sidak

«Sexu segurua alde batera utzi du homosexualen kolektiboak». Koldobike Mujika eta Sergio Iñigez Gehituko kideek kezka agertu dute, gizonezko homosexualen artean praktika arriskutsuak ugaritzen ari direlakoan. Araban, Bizkaian eta Gipuzkoan, gizon homosexualek hartu dituzte azken urteetako sifili kasuen %78 eta GIB giza immuno-eskasiaren birusaren kasuen %33. «Eredu izan ginen hiesa agertu zen lehen urteetan; identifikatu behar dugu zer gertatu den, zuzentzeko», adierazi du Iñigezek.

Internet, sexua eta gizonekin sexua duten gizonei buruzko jardunaldiak aurkeztu zituzten, atzo, Donostian, Mujikak eta Iñigezek. Haiekin egon zen Kati Zaragoza Stop Sida taldeko kudeatzailea, eta InterSex2006 txostenaren ondorioak aurkeztu zituen. Gizonekin sexu harremanak dituzten gizonen Internet ohiturak ikertu dituzte txosten horretan, eta inkestak egin dituzte Bartzelonan, Madrilen, Bilbon eta Donostian. Ikerketaren arabera, Bilbon eta Donostian, gizonek gutxiago erabiltzen dute Internet beste gizonekin sexu harremanak izateko. Babestu gabeko sexu harreman gutxiago izaten dituzte, eta, ondorioz, GIBdun gutxiago dago. Hala ere, Zaragozak nabarmendu du harremanetarako Internet erabiltzen duten gay guzien ia erdiek ez dutela inoiz GIB probarik egin.

«Internet harremanak egiteko esparrua berria da, eta sexu osasuna bultzatu behar dugu esparru horretan», Zaragozaren esanetan. Internetek ez duela arrisku gehiago edo gutxiago azaldu du, baina sexu praktika babestuen eta prebentzioaren beharra oroitarazi ditu: «Ez da datu esanguratsua, baina joera da Internet bidezko harremanetan sexu seguru gutxiago izatea».

> Berria: Homofobia > NESKEK ERRAZAGO ONARTZEN DUTE SEXUALITATEAREN ANIZTASUNA

• Neskek errazago onartzen dute sexualitatearen aniztasuna
• Gehitu-ren ikerketaren arabera, nerabeek ondo ikusten dute homosexualitatea, baina bestela jokatzen dute
• Berria, 2009-02-13 # Ainara Arratibel • Donostia

Neskei errazagoa zaie sexualitatearen aniztasuna onartzea mutilei baino, Gehitu-k 14 eta 18 urte bitarteko ikasleen artean sexualitatearen aniztasunaren inguruan egindako ikerketa baten arabera. Gehitu-k kezka agertu du ikastetxeetan gertatzen ari diren jarrera homofoboengatik. Izan ere, galdekatutako ikasleen %83k aitortu dute eskola ez dela inguru ziurra gazte homosexual, lesbiana, transexual eta bisexualentzat. Horren aurrean neurriak hartzeko eskatu du. «Jarrera homofoboen aurrean dagoen pasibotasuna eta permisibitatea salatu nahi ditugu, batez ere. Etorkizunean hartu behar diren neurriei begira, oso kontuan hartzeko datua da portzentaje hori», diote Gehitu-ko Koldobide Mujikak eta Jesus Estonbak.

Galdeketa iazko ikasturtean egin zuten, Hitz egin dezagun homosexualitateaz heziketa programaren karietara. Guztira 323 ikasle galdekatu zituzten: 168 neska eta 155 mutil. Gehienak Donostiako ikastetxeetakoak dira. «Ikerketa mugatua da, baina orokortu egin daiteke. Izan ere, berezitasunak berezitasun, lurralde gehienetan antzeko emaitzak jasoko lirateke».

Estonbak nabarmendu duenez, ikerketan desberdintasunak ikusten dira neska eta mutilen erantzunetan. «Neskek jarrera irekiagoa dute, oro har. Mutilei gehiago kostatzen zaie sexualitatearen aniztasuna onartzea». Galdera gehienetan ikusi du jokabide hori.

Sexuen arteko alde hori agerian geratzen da ikaskide homosexualen aurrean izango luketen jarreraz galdetzen zaienean. Hala, ia neska gehienek ikaskide gay bat izatea onartuko lukete, baina mutilen %60k ez lukete ondo hartuko: %35 deseroso sentituko litzateke eta. %25, berriz, lekuz aldatuko litzateke.

Ikaskide lesbianen kasuan, mutilen jarreran eman da aldaketarik esanguratsuena, ikerketaren arabera. Izan ere, haien deserosotasuna nabarmen gutxitzen da. Hala, %6 baino ez lirateke lekuz aldatuko. Datu hori nesken datuen parekoa litzateke. Mutilen %8,39k ikaskide horrekin ligatzen saiatuko liratekeela aitortu dute».

Transexualen eta bisexualen kasuan, aurkako jarrerak areagotu egiten dira. Kasu horretan ere, kontrako jarrerak gehiago ematen dira mutilen artean nesken artean baino.

Antzeko zerbait gertatzen da sexu bereko bi pertsonen arteko maitasun jarrera ikusten dutenenean nola jokatzen duten galdetzen zaienean.

Kontraesana
Mujikaren eta Estonbaren ustez, ikerketak ere kontraesan bat utzi du agerian ikasleek pentsatzen eta egiten dutenaren artean. «Homosexualak, lesbianak, transexualak eta bisexualak onartzen dituztela diote. Baina jarrerei buruzko galderetan ikusten da nerabeek jokabide homofoboak dituztela». Hala, hamarretik ia bederatzi homosexualen kontrako mespretxu jarreren kontra ageri dira. %11k, ordea, halako jarrerak zuritzen edo babesten dituzte.

Galdekatutako ikasleen artean, lauk aitortu dute noizbait jipoiren bat jaso dutela, beren sexu nortasunagatik. Hamahiru izan dira, berriz, mehatxuren bat jaso dutela diotenak.

Gazte askok aitortu dute ekintza homofoboetan parte hartu izana. Atal horretan jaso dituzten datuen artean, Estonbak jipoiei lotutakoa nabarmendu du. Izan ere, ikasleen %4k aitortu dute noizbait jipoiren bat eman izana. «Kezkatzeko moduko datua da».

Ikasleen erdiek baino gehiagok diote ekintza homofoboen lekuko izan direla. %52k erasoak ikusi dituzte, eta %74k isekak eta irainak. «Oso datu esanguratsuak dira».

• Zenbakia
• %70. Bi gizonen arteko maitasun jarreren aurreko jokabidea. Gehitu-ren ikerketan parte hartu duten hamar ikasletik zazpik jarrera ona dute bi gizonen maitasun jokabideen aurrean. Kopurua antzekoa da bi emakumeen arteko maitasun jokabideen inguruan galdetuz gero.
• %80. Guraso homosexualak dituzten ikasleekiko jarrera. Galdekatutako ikasleen %80k ondo hartuko luke haren ikaskide baten aita edo ama homosexuala izatea. Gehitu-ren ustez, horren arrazoia zera da: ikaskideen gurasoak homosexualak izateak ez diela eragiten.

> Berria: Hezkuntza > CURRICULUMAREN AURKA EGIN ZUTENEK ATZERA EGIN BEHARKO LUKETELA ESAN DU CAMPOSEK

• Curriculumaren aurka egin zutenek atzera egin beharko luketela esan du Camposek
• Jaurlaritzako Hezkuntza sailburuaren ustez, argi geratu da curriculumak ez duela oinarrizko eskubiderik hurtasen
• Berria, 2009-01-29 # Ainara Arratibel

«Euskal curriculuma horrenbeste kritikatu zutenek atzera egin beharko lukete», adierazi zuen atzo Tontxu Camposek, Eusko Jaurlaritzako Hezkuntza sailburuak. Campos pozik agertu zen EAEko Auzitegi Nagusiak euskal curriculumaren alde egin duelako. «Garbi geratzen da curriculumak ez duela oinarrizko eskubiderik urratzen».

Eusko Jaurlaritzak 2007ko urrian onartu zuen derrigorrezko hezkuntza osorako curriculum berriaren dekretua. PSE-EE, PP eta Ezker Abertzalea aurka agertu ziren. Dekretuak elebitasunaren alde egiten du, eta baita derrigorrezko hezkuntza amaituta ikasle guztiek B2 hizkuntz gaitasuna izatearen alde ere. Ikastetxeei ordutegiak antolatzeko autonomia ematen zaie, baina ordu gutxiago ematen zaio heziketa fisikoari eta gehiago zientziei.

Hilabete geroago herritar talde batek helegitea jarri zuen, euskal curriculuma baliorik gabe uzteko eskatuz. Herritar talde horren aburuz, Herritartasunerako Hezkuntza irakasgaiak oinarrizko hainbat eskubide urratzen ditu: ideologia askatasuna eta gurasoek seme-alaben heziketa moral eta erlijiosoa aukeratzeko duten eskubidea, tartean. EAEko Auzitegi Nagusiak, ordea, atzera bota du herritar taldearen helegitea. Epaitegiak ebatzi duenez, «Herritartasunerako Hezkuntza irakasgaiak ez du norberaren ideia moral eta erlijiosoekin talka egiten duen elementu proselitista eta hezitzailerik».

Halaber, Europako Giza Eskubideen Epaitegiaren jurisprudentzia aintzat hartuta, zera dio: «Herritartasunerako Hezkuntza irakasgaiak ez ditu Estatuari eskatu behar zaion alderdikeriarik ezaren mugak gainditzen». Camposen ustez, hainbat talde eta alderdi politikok ez zioten behar adinako balioa eman hezkuntza eragileek lortutako akordioari. «Konturatu beharko lukete lan egiteko modua egokia zela, eta lortutako akordioak beraiek adierazi zuten baino balio handiagoa zuela».

Objekzioa, debekatua
Espainiako Auzitegi Gorenak, bestalde, ukatu egin zuen atzo Herritartasunerako Hezkuntza irakasgaiaren kontrako objekzio eskubidea. 22 epailek erabakiaren alde bozkatu zuten, eta zazpik kontra. Auzitegiaren arabera, irakasgaiaren edukiak ez du gurasoek beren seme-alaben heziketa moral eta erlijiosoa aukeratzeko duten eskubidea urratzen.

Gehitu elkarteak pozik hartu du Espainiako Auzitegi Gorenaren erabakia. Haien aburuz, irakasgaiak «pertsona ororen giza eskubideak aitortzen eta erakusten ditu». Dena den, ezinbestekoa ikusten dute irakasgaiaren edukiak zabaltzea.

> Komunikatua: Gehitu > GEHITU HERRITARTASUNERAKO IRAKASGAIARI BURUZ AUZITEGI GORENAK EMAN DUEN EPAIAREN AURREAN

• Gehitu Herritartasunerako Irakasgaiari buruz Auzitegi Gorenak eman duen epaiaren aurrean
• Gehitu, 2009-01-28

Gehitu osatzen dugunak biziki poztu gara gaur Auzitegi Gorenak herritartasunerako eta giza eskubideetarako hezkuntza irakasgaiarekiko kontzientzia eragozpenari buruz emandako epaiagatik.

Gehituk, lesbianen, gayen, transexualen eta bisexualen berdintasun legal eta sozialaren alde, haien gizarte normalizazioaren alde eta haien eskubide, duintasun eta askatasunaren alde lan egiten duen aldetik, epaia honi buruz oso iritzi ona du, Auzitegi Gorenak, epai honen bidez, irakasgai hau derrigorrezkoa dela bermatzen baitu; gogora ekarri nahi dugu herritartasunerako eta giza eskubideetarako hezkuntza irakasgaiak aitortzen eta erakusten dituela pertsona ororen giza eskubideak, eta Konstituzioak nahiz Giza Eskubideen Aldarrikapen Unibertsalak jasotzen dituzten balio demokratikoak.

Gurasoei aitortzen badiegu ere euren seme-alabak hezteko duten eskubidea, uste dugu badirela irakatsi beharreko printzipioak eta balio komunak, esaterako: berdintasuna, errespetua, askatasuna, indarkeria-eza… .Horiek guztiak herritartasunerako eta giza eskubideetarako hezkuntza irakasgaian jasotzen dira.

Egia da, bestalde, Gehituk, irakasgaiaren gutxieneko edukiak onartu zirenean, kritikatu zuela lesbiana, gay, transexual eta bisexualen eskubideen eta berdintasunaren defentsari buruzko edukiak gutxiegi izatea irakasgai honetan. Gazte eta nerabe lesbiana, gay, transexual eta bisexualek jasaten dituzten jazarpena eta erasoei buruzko egungo datuak kontuan harturik, premiazkotzat jotzen dugu errealitate horri lehenbailehen aurre egitea, eta populazioa heztea errespetuaren, berdintasunaren eta bazterkeriarik ezaren balioetan. Bestalde, ezinbestekoa dela uste dugu irakasgai honen edukiak zabaltzea, eta espero dugu epai honek irakasgaia berrikusi eta edukiak zabal daitezen balioko duela.

Epai honen aurka helegitea aurkeztuko dutela jakitun gara, baina espero dugu, azkenean, irakasgaiaren balioa eta egokitasuna aitortuko direla; izan ere, oinarrizko tresna dela iruditzen zaigu, berdintasunezko gizarte bidezkoagoa eta askeagoa izan dezagun.

> Berria: Homofobia > EHGAMEN ELKARRETARATZEA IZANGO DA BIHAR DONOSTIAN

• EHGAMen elkarretaratzea izango da bihar Donostian
• Oarsoaldeko Hitza, 2008-12-12

Eskualdeko EHGAMeko kideek bihar Donostian egingo den elkarretaratzean parte hartzeko deia egin dute. Frantziak NBEn homosexualitatea mundu mailan despenalizatzeko duen proposamenaren aurka Vatikanoak agertu duen jarreragatik egingo dute protesta MEDEAK, GEHITU eta EHGAM taldeek.

> Berria: Abenduak 1 > XINGOLA GORRIAK, EZ AHAZTEKO

• Xingola gorriak, ez ahazteko
• Hiesaren aurkako egunean zenbait jarduera egin dituzte
• Irutxuloko Hitza, 2008-12-02

Eguraldiak ez zuen batere lagundu, eta hori dela-eta, Bulebarreko arkupeetan jarri behar izan zituzten beren mahaiak Ehgam eta Acasgi elkarteetako kideek. Eguerdian informazioa banatzen aritu ziren. Informazioaz gain, kondoiak eman zizkieten mahaira hurbildu zirenei. Eta nola ez, hiesaren aurkako egunaren ikurra, xingola gorria ere, banatu zuten. Eguraldi txarra egin bazuen ere, material asko eman zuten elkarteok. Gehituk Bretxan jarri zuen karpa eta clown-ikuskizun baten bidez hiesaz ohartarazi zituen inguru horretan zebiltzan herritarrak. Arratsaldean elkarretaratzea egin zuten Egian, Teresa de Calkuta plazan.

Joan den astean hiesaren aurka atzo egin beharreko jardueren berri ematean Gehitu, Ehgam eta Acasgi elkarteetako kideek dei egin zieten erakundeei, krisiak krisi, osasun arloari bideratu beharreko dirua ez gutxitzeko. Hain zuzen ere, ildo horretatik jo zuen atzo Rafaela Romero Batzar Nagusietako presideneteak. Ikerketa lanekin eta prebentzioan eragiten duten hezkuntza programekin jarraitu behar dela nabarmendu du Romerok. GIBa -Giza Immunoeskasiaren Birusa- 700 gipuzkoarrek dutela azpimarratu du Batzar Nagusietako presidenteak eta «katastrofe hori» gelditu behar dela erantsi du.

Prebentzioa izan da aurtengo abenduaren 1aren aurreko egunetan gehien entzun den hitza. GIB birusak kutsatutakoez gain, sifili edo gonokozia kasuek gora egin izana oso kezkagarritzat jo dute, gaixotasun horiek azken finean hiesa bera ezkutatzen dutelako. Hain zuzen ere, prebentzioan eragiteko, otsailetik aurrera GIBaren froga botiketan doanegin ahal izango dela iragarri dute. Gipuzkoako sei botiketan egin ahal izango da, hain justu.

• David Brun · Acasgi elkarteko kidea
• «Ez dago erlaxatzerik; hiesak hor darrai»

Gehitu, Ehgam, Acasgi... Hainbat elkartetako kideak aritu ziren atzo Hiesaren inguruko informazioa, xingola gorriak eta preserbatiboak banatzen atzo. Acasgi Hiesaren Aurkako Gipuzkoako Herritar Taldea da, eta Groseko David Brun talde horretako kide da.


Hiesaren kontrako eguna kontzientziazio eguna al da?
Ez. Egun bakar batean ez dago kontzientziatzerik. Hemen gaudela esan nahi diogu jendeari, hiesa denborarekin aldatzen doan pandemia dela; egia da botikak agertu direla, baina era berean gaixotasunak botikei iskin egiten die denboraren podeioz

Hiesa duten herritarren kopuruari buruz kezkatzeko moduko datuak eman dituzue elkarteek.
Mundu guztiak du informazioa, baina gero... Hiesak ez du eragina bakarrik garapen bidean dauden herrialdeetan.


Zer aholku emango zenieke herritarrei?
Ez dezatela pentsa bereziak direla eta gaixotasuna ezin dela haiengana iritsi. 25 urte dira hiesa agertu zela eta denboraren poderioz, batez ere hedabideetan etengabe ez dagoelako hainbatek ez dio beldurrik; hala ere, arriskuak bere horretan darrai. Ez dago erlaxatzerik.

> Berria: Abenduak 1 > HIESAREN AURREAN "ERNE" EGOTEKO ESKATU DUTE HIESAREN AURKAKO TALDEEK

• Hiesaren aurrean «erne» egoteko eskatu dute hiesaren aurkako taldeek
• GIB birusa garatzea errazten duten gaixotasunak bikoiztu egin dira azken bost urteetan
• Berria, 2008-11-28

Gipuzkoan hiesak 700 pertsona ingururi eragiten die, eta heldu diren urteetan kopuru hori gehitu egingo dela ohartarazi dute hiesaren aurka lanean dabiltzan erakundeek. Hori dela eta, «erne» egoteko eskatu dute.

Sexu harremanen bitartez kutsatzen diren hainbat gaixotasun -sifilia, gonokozia eta klamidiasia, besteak beste- gehitu egin direla ohartarazi du Mikel Martinek, EHGAM Euskal Herriko Gay-les Askapenerako Mugimenduko ordezkariak, Donostian atzo egindako agerraldian. Gonokoziari dagokionez, esaterako, azken hiru urteetan bikoiztu egin dira gaixotasun horren kasuak, 2003an bost pertsonak edukitzetik iaz hamar pertsonak edukitzera pasatu zen.

GIBaren inguruan egiten diren diagnostikoen %30 berandu egiten direla nabarmendu du Asier Lekuonak, Acasgi Hiesaren Kontrako Gipuzkoako Elkarte Hiritarreko kideak. Datozen urteetan kasu gehiago azalduko direla adierazi du.

Gehitu Euskal Herriko Gay, Lesbiana, Transexual eta Bisexualen Elkarteko kide Sergio Iñigezek, administrazio publikoei eskatu die ez dezatela erabil krisi ekonomikoa hiesaren aurka lan egiteko zuzendua dagoen inbertsioa gutxitzeko.

Astelehenean, Hiesaren Aurkako Nazioarteko Eguna dela eta, herritarrak elkarretaratzera deitu ditu Arritxu Marañon Donostiako Udaleko zinegotziak. Elkarretaratzea Teresa de Calcuta plazan egingo dute, 19:30ean.

> Iritzia: IÑIGO AIERTZA > HOMOFOBIA

• Homofobia
• EHGAM-DOK, 2008-11-19 # Iñigo Aiertza
  

Aupa lagunok!

Berriz ere homofobia kasuak barra barra ditugu hedabideetan barrena.

Atzo E.H.G.A.M.-en webgunean Carlos III ospitaleak guregaitik duen irizpidea irakurri nuenean, jenio bizian ez jartzeagaitik, ia barrez lehertu nintzen.

Badira 3 urte homosexualen arteko ezkontzan legeztatu zirela, baina badirudi gizartearen gehiengo batek, eta okerrenak "osasun zerbitzuetako profesionalak, eta oso ezkertiar eta aurrerakoitzat dituztenak beraien buruak" Progresioaren bideak ez dituela 3 urteko fasean homofoboak gizarteratu.

Gehituko kide den Sergio Iñiguezek esaten zuen espainiar estatuan ez dagoela homofobiarik, egia da munduan zehar hainbat herrialdeetan homosexualitatea heriotz eta espetxe zigorrarekin amaitzen dutela, hemen lanak bukatzeke ditugu, eta ezin dugu besoak gurutzatuta geratu Sergio Iñiguez jauna.

> Laburrak: Oroitzapena > GEHITUK FRANKISMOAN HOMOSEXUALEK JASANDAKO JAZARPENA GOGORARAZIKO DU

• Gehituk frankismoan homosexualek jasandako jazarpena gogoraraziko du
• Berria, 2008-10-25 # Erredakzioa · Donostia

Gehitu gay eta lesbianen kolektiboak ekitaldi sorta antolatu du datorren astean homosexualek eta transexualek frankismoan jasan zuten jazarpena gogora ekartzeko. Donostian eta Miarritzen (Lapurdi) egingo dira jardunaldiak, eta memoria historikoa berreskuratze aldera, besteak beste, Fernando Olmeda idazleak eta Antonio Ruiz frankismo garaian preso egondakoek osatutako elkarteko ordezkariak hartuko dute parte. Jazarpena gordin jasan zuten Andres Garcia eta Silvia Reyesek ere hartuko dute parte jardunaldietan, bai eta Frantziako Triangles Roses elkarteko Jean Le Bitousek ere. Gogora ekarri nahi dute frankismoak homosexual eta transexualak pertsona «arriskutsu» modura tratatzen zituela, eta «sendatu» egin nahi zituela.

> Elkarrizketa: Joxean Zapirain > "HARRIGARRIA DA BI ERREALITATEAK HAN HIRBIL ETA HAIN EZBERDINAK IZATEA"

• Joxean Zapirain · Gehituko Hiesa batzordeko kidea
• «Harrigarria da bi errealitateak hain hurbil eta hain ezberdinak izatea»
• Berria, 2008-07-27 # Aitor Renteria Baiona

Lapurdin, Nafarroa Beherean eta Zuberoan Hiesaren aurkako borrokan diharduen Aides izeneko elkartearen aitzinean zuten hitzordua Gehitu elkarteko kideek. Hiesari buruzko informazioa hedatzea dute helburu udako eguzkiak jendeak hondartzetara bultzatzen dituen garaian. Zuzeneko informazioa zabaltzea eta iritziak partekatzea dute xede. Baina helburu horrekin batera, Aides eta Gehitu elkarteen esperientzia eta jardunak partekatzea dute jomuga. Droga menpekotasunaren aurka diharduen Arit elkartearekin ere ari dira elkarlanean Gehituko kideak. Aides presente egoteak erakundeen babesa duten bermea eskaintzen dio kanpainari.

Nola sortu zen udako kanpaina burutzeko xedea?
Aspaldian Aides elkarteak informazio kanpainak egiten ditu Frantziako hondartzetan. Katalunian ere, Stop Sida elkarteak antzeko ekimenak egiten ditu. Guk Gipuzkoa eta Bizkaiko kostaldera hedatu nahi dugu ekimena, eta horretarako egokia iruditu zaigu bertako esperientziatik ikastea. Lapurdi eta Gipuzkoako egoera, adibidez, arrunt ezberdina da. Bi taldeek esperientzia ezberdinak ditugu, eta trukaketa aberatsa sortzen da horretatik.

Hondartzetara zoazte eta jendearekin harreman zuzenak dituzue. Zein da halako ekimenen bidez lortu nahi duzuen xedea?
Hego Euskal Herrian ez dugu horrelako ohiturarik, baina Iparraldean bai, Frantzian ere bai. Hondartzetan jende mota guztiak atzeman ditzakezu, horien artean gizonekin sexu harremanak izan dituzten gizonak ere bai, homosexualak izan edo ez. Hitz egitean arriskuak aipatu eta trukean ezagutzen ez ditugun errealitateak eta esperientziak ere azaltzen dizkigute. Eta jendeak, oro har, ongi hartzen du urratsa. Mezu argia da, ez du bilatzen nehor epaitzea. Informazioa ematen dugu, eta gero bakoitzak erabakitzen du zer egiten duen. Baina guk ikusi ez ditugun hutsuneak nabarmentzeko ere balio digu, jendearen esperientzietan oinarritua. Goizeko hamarretan hasten gara informazioa hedatzen, eta iluntzeko zazpietan bukatu. Jantzi zuriak daramatzagu soinean, eta nor garen adierazten duten pegatinak. Atzo Seignaxeko hondartzan egon ginen, Landetan, eta gaur Tarnosen egongo gara. Iluntzean afari mintzaldiak egiten ditugu. Atzo Baionan, Aidesen egoitzan, eta gaur Miarritzeko ostatu batean.

Zer dakarkiozue Gehitukoek esperientzia honi?
Espainiako Estatuan beste errealitate bat dago, ohituretan eta bereziki lege mailan. Hegoaldean homosexualek ezkontzeko parada daukate, haurrak adopta ditzakete, eskoletan informazio kanpainak antola ditzakete. Lapurdin ezinezkoa da , pentsaezina. Harrigarria da bi errealitateak hain hurbil egon eta hain ezberdinak izatea. Bi taldeek praktikan ezartzen ditugun komunikazio eta lan estrategiak erkatzeko eta osatzeko parada ematen digute ekimen hauek. Atxikimendu jarrerak gainditu eta elkarlanaren urratsa egin dugu. Eta orain argi ikusten dugu gure esperientziak elkarren osagarriak direla. Ondoko urteetan Gipuzkoan ekimen bera praktikan ezartzeko esperientziak eskainiko dizkigu honek.

Bada Lapurditik Gipuzkoara eraman nahiko zenuketen bertze jarduerarik?
Ipar Euskal Herrian eta Frantzian eragile pribatuen engaiamendu handiagoa dago, eta hori garrantzitsua da. Joan den neguan, adibidez, informazio kanpainak egin ditugu ostatuetan. Jabeek erraztasun guztiak eman zizkiguten. Informazioa agerian jartzen dute ostatuko murruetan, eta jendeari naturala iruditzen zaio gu hurbiltzea. Angeluko sauna batean ere egon ginen neguan. Jendeak ordaintzen du leku horretara joateko, intimitatea atxikitzeko. Baina naturaltasun handiz onartu zuen gure presentzia. Kondoien banaketari dagokionez ere, errealitate ezberdinak daude. Aidesek, adibidez, ekoizleen laguntza dauka eta urririk lortzen ditu. Guk ekoizleenganako urratsa egin behar dugu.

Eta zer dute Lapurdin zuengandik ikasteko?
Bada, baliteke esperientzia militantea izatea, egitura sendoagoak edukitzea. Erakunde eta egitura administratiboekin aritzeko esperientzia handiagoa dugu, baliteke hurbilagokoa izatea ere. Esperientziak trukatuz, guztiek dugu zer irabazi eta, emeki-emeki, gainditzen ditugu trabak.

> Berria: Hiesa > HIESARI AURRE EGITEKO KANPAINA ANTOLATU DUTE HIRU KOLEKTIBOK

• Hiesari aurre egiteko kanpaina antolatu dute hiru kolektibok
• Lehenengo aldiz Iparraldeko eta Hegoaldeko gay eta lesbianen bi kolektibok bat egin dute
• Berria, 2008-07-24 # Xabier Otamendi · Donostia

Hiesaren arriskuak gutxitzeko kanpaina izena du Ipar Euskal Herrian eta Landetan (Frantzia) egingo duten kanpainak. Aurten lehenengo aldiz, Hego Euskal Herriko eta Ipar Euskal Herriko gay eta lesbianen bi kolektibok bat egin dute. Urtero antolatzen du AIDES Frantziako gobernuz kanpoko erakundeak kanpaina hori. Aurten Gehitu eta LGP Biarritz elkarteko boluntarioak ere parte hartuko dute bertan. Lehengo aldia du Gehituk, eta oso gustura agertu dira.

Uztailaren 24tik 27ra bitartean izango da kanpaina. Ipar Euskal Herriko eta Landetako hondartza eta taberna horiek gizon homosexualen topagune ohikoak dira. Hori dela eta, kanpainaren helburua Hiesa kutsatzeko izan ditzaketen arriskuak murriztean datza.

Horretarako, «elkarrizketa konfidentzialak» antolatu dituzte hiru elkarteetako kideek, haietara joaten den edozein gizonezkorekin informazioa trukatzeko eta haiek balizko arriskuez ohartarazteko. Saio horietan bildutako informazioa eta datuak lana abiatzeko ere erabiliko dituztela jakinarazi dute kanpainako arduradunek. Biltzen dutena proiektu berriak lantzeko baliatzea posible izango dela esan dute.

Koldobike Mujika Gehituko kidearen ustetan, garrantzitsua da Ipar eta Hego Euskal Herriko lesbiana, gay, bisexual eta transexualen elkarteek indarrak batu izana. Hau «lehenengo pausoa» baino ez dela esan dute bi elkarteetakoek. Izan ere, lehenik Donostian eta, ondoren, Baionan egingo duen erakusketa dagoeneko martxan da.

Elkarren arteko harremana
LGP Biarritz elkarteko Kriss Stephany kideak esan duenaren arabera, badute Hegoaldetik zer ikasia: «Adibide batzuk jartzearren, homosexualen arteko ezkontzarik ez dugu, eta ezin dugu homosexualitatearen inguruko kanpainarik egin ikastetxeetan».

Gehituko kideek ere badutela zer ikasi esan dute. Izan ere, Gipuzkoan ez da inoiz horrelako ezer egin. Hartara, Gehituko kideek ikastaro bat egin dute AIDES elkartearen eskutik. Kanpainari begira egin dute ikastaroa batik bat, eta etorkizunean Gipuzkoan ere horrelako kanpaina bat egitea espero dute.

> Berria: Homofobia > IKASTETXEETAN ESKU HARTU, ZENBAITENTZAT INFERNU BILAKA EZ DADIN

• Ikastetxeetan esku hartu, zenbaitentzat infernu bilaka ez dadin
• Aniztasun afektibo-sexuala
• Gara, 2008-07-09 # Janire Arrondo

Ikastetxeetako erasoek gerora eragin itzela izan ohi dute ongizate psikologikoan. Norberaren sexu berekoekiko erakarpena dutenek arrisku berezia dute, ikasgelak maiz amesgaizto bilakatzen baita eurentzat.

Ikasgeletan izaten diren erasoak eta horiek gerora dituzten ondorioak hizpide hartu dituzte EHUren Udako Ikastaroetan, eta aniztasun afektibo-sexualari arreta berezia eskaini diote. Hain zuzen ere, ikastetxeetako erasoek ongizate psikologikoan eragiten dituzten kalteak aztertu ditu EHUko irakasle eta psikologo Aitor Martxuetak.

Gatazken sustraian izan litezkeen arrazoiak ugari badira ere, sexu bereko pertsonekiko erakarpena dutenen kasuan areago izan ohi dira. «Gizartean bazterketa jasateko arriskua duten pertsonak dira», nabarmendu zuen irakasleak. Horregatik, «beharrezkoa da egoera horiek saihesteko edo aurre egiteko planak abian jartzea».

Martxuetaren ustez, gutxi sakondutako gaia da hori, eta arreta handiagoa eskaini beharko litzaioke. Gainera, arazoa konpondu ahal izateko ikasleekin ez ezik, gurasoekin eta irakasleekin ere lan egin behar dela nabarmendu zuen.

Hala eta guztiz ere, lehenbizi, gizarteko aniztasun afektibo-sexuala aztertzea eta ulertzea beharrezkoa da, ondoren ikastetxeetakoa ulertu ahal izateko. Erasooi erantzun azkarra ematea ere ezinbestekotzat jo zuen: «Unean bertan esku hartu behar da, behar bezala konpondu nahi izanez gero». Horrelako kasuek, izan ere, gertatu bezain laster tratatu ezean, gerora ongizate psikologikoan kalteak eragin ohi dituzte.

Egoeraren azterketa egin ondoren, arazoa konpondu ahal izateko, buruko osasunean eragina duten faktoreak zein diren ezagutzea ere beharrezkoa da.

Martxuetaren esanetan, buruko osasuna eta ongizate psikologikoa ez dira bereiztu behar. Bata eta bestea bermatzeko, «beharrezkoa da norbere burua den bezala onartzea, eguneroko bizitzan autonomiaz jokatzen jakitea, jomugak izatea, pertsonalki garatzea, ingurunean mugitzen jakitea eta gizartean harreman ezberdinak izateko gai izatea».

Buruko osasun-egoera finkatzen duten lau aldagai nagusiak afektibitatea, depresioa, antsietatea eta autoestimua dira, eta faktore psikosozialek eragina dute batean eta bestean desorekak eragiteko. Ikastetxean jazarpena jasan dutenek, esaterako, antsietatea eta depresioa agertuko dituzte gerora.

EHUk gai horren gainean Gipuzkoan 2005. urtean egindako ikerketa baten emaitzak esku artean hartu zituen psikologoak. EHGAM, Gehitu eta Bost Axola elkarteekin batera buruko osasunaren aldagaiak, eta horretan eragina duten faktoreen konbinazio ezberdinak ikertu, eta ehundik gora pertsonen kasuak aztertu zituzten.

Lanean ondorioztatu zutenez, sexu berekoekiko erakarpena duten pertsonen ongizate psikologikoan kalteak eragiten dituzten faktore sozial horiek, eskoletako erasoez gain, zerikusia dute norbere buruaren onarpenarekin, familiakoen eta lagunen babesarekin, inguruko errealitate-sarearen pertzepzio egokiarekin eta genero identitatearekin. «Norbanakoarentzat eguneroko bizitzako erronkei aurre egiteko beharrezko da babesa duela sentitzea edo, beste modu batean esanda, laguntza soziala izatea». Haren esanetan, lagunak eta bikotekidea izaten dira horrelakoetan aurrera egiten gehien laguntzen dutenak. Kontrakoa gertatzen denean, ordea, senideek orientazio afektibo-sexuala onartzen ez duten kasuetan, esaterako, antsietatea eta depresioa agertzen dira horren ondorioz.

Eskoletako erasoak gogor eragiten die eta, maiz, ingurukoen laguntzarekin ere, zaila da halako egoerei aurre egitea. Erasoak ekiditea litzateke hoberena, eta «aniztasun afektibo-sexuala gizartean normaltasunez onartzea» da horretarako giltzarria.

> Berria: Homofobia > HOMOFOBIA ESKOLAN, HEMEN

• Homofobia eskolan, hemen
• Eskolako bullying homofobikoak, luzera, eragin psikosozial kaltegarriak ditu homosexualengan. Aitor Martxueta psikologoak ohartarazi du jazarpen hori depresio eta antsietate iturri dela.
• Berria; 2008-07-08 # Mikel Peruarena Ansa · Donostia

Gaur esaten da normalizatu egin dela homosexualen egoera. Egia da aldaketa dezente egon direla eta aurrerapausoak eman direla, baina eskoletan oraindik bullying kasuak daude, eta, batez ere, bestelako aukera afektibo-sexual batzuk dauzkaten ikasleek jasaten dituzte». Aitor Martxueta psikologia doktoreak gidaturik, “Aniztasun afektibo-sexuala eskolan: gatazkak eta konponbideak” ikastaroa ematen ari dira Euskal Herriko Unibertsitateko udako ikastaroetan. Martxuetak dio gero eta kasu gehiago agertzen ari direla eta beharrezkoa dela ikertzea eta eskoletan esku-hartze planak garatzea.

Martxuetak argitu du jazarpena ez dela gai berria, «baina orain agertzen ari da, batez ere, eskolako jazarpen homofobikoa deitzen dena». Hainbat elkarte aniztasun afektibo-sexuala eskoletara eramaten hasi direla jakinarazi du psikologoak, «ikasleek ikus dezaten badaudela beste aukera batzuk, afektibitatea eta sexualitatea anitzak direla eta errespetatu behar direla aukera guztiak».

Homosexualen ongizate psikosozialean eskolako jazarpenak duen eragina aztertu du Martxuetak. EHGAM, Gehitu eta Bost Axola elkarteen laguntzarekin, ikerketa egin zuen Gipuzkoan orain hiru urte, eta emaitzak argiak dira: eskolako jazarpenak eragin zuzena du ongizate psikosozialean. Martxuetaren hitzetan, buruko osasun arazoak izateko arriskua heterosexualen artean baino handiagoa da homosexualen artean. Baina, bullying-az gainera, beste aldagai batzuk ere eragiten dute. Lau aipatu ditu Martxuetak: norberaren aukera afektibo-sexualaren onarpena, gertuko harreman sarearen hautematea, genero nortasuna eta gizartearen babesa. «Ez dugu ikerketa eskolan egin, ez diegu galdetu jazarpen hau jasaten ari diren ikasleei». Martxuetak onartu du identitate sexual indartsua duten pertsonen erantzunekin osatu dutela ikerketa. Baina, halere, atera dituzten datuak «harrigarriak» direla esan du. «Ez dut pentsatu ere egin nahi nola bizitzen ari diren jazarpena orain jasaten ari direnak», dio Martxuetak.

Ongizate psikologikoa lau alderditatik azter daitekeela zehaztu du psikologoak: depresioa, antsietatea, autoestimua eta afektibitatea. Eskolan jazarpena jasan dutenek depresiorako eta antsietaterako joera garatzen dute. Familiak eta lagunek berekiko duten jarrera lagungarri edo traba izan liteke, baina sarri ez da nahikoa, jasandako egoerek buruko osasunean kalteak eragiten dutelako.

Gai horren gaineko ikerketa askorik ez dagoela eta konponbidea «ikertzen jarraitzea eta esku-hartzeak prestatzea» dela adierazi du Martxuetak. «Eskolan esku-hartzeak egin behar dira, baina hezkuntza komunitate osoarekin, gurasoekin, irakasleekin eta ikasleekin, aniztasun afektibo-sexuala lantzeko eta jendeak zerbait naturala bezala hartzen ikas dezan».