2006/03/01

> Elkarrizketa: KEPA GALLEGO > "AKTOREAK IDAZLE BILAKATZEN BAGARA, ZEOZER GERTATZEN DA"

  • Kepa Gallego, VI Serantes Antzerki Sarien Irabazlea
  • "Aktoreak idazle bilakatzen bagara, zeozer gertatzen da"
  • Idazle, zuzendari, maisu edota bikoztaile lanetan jardun izan duen arren, Kepa Gallego antzezlea dela azpimarratzen du behin eta berriz. Halere, “oxigeno bila” eszenatik aldendu den urte honetan, Serantes Antzerki Saria irabazi du euskera sailean “Eingo al deu?” komediarekin
  • Artez, 2006-03-01, 107. alea # Borja Relaño

Horra idatzi dituzun zenbait lan: Eingo al deu?, Saló de chat o la ciberlujuria, sexua.org.asmoa, Salir del armario, Desamores... obsesiorik bai?

Ez, beharra da. Txortan egiten ez dugunok, zeozertan eman behar dugu denbora eta niri idaztea sartu zait buruan. Egunen batean zorte handiagoa izanez gero, idazteari utziko diot. Seriotan, gai dibertigarria dela deritzot eta, ni kafe-teatroan hezi naizenez, friboloa ez den gaia friboltasunez tratatzea gustatzen zait.

Orduan, zure lanetan, sexua bidea ala helmuga da?

Bidea, beti. Euskaldunon gabezietaz ari naiz, egotzi diguten topikoei barre eginez, hauek egiaren zerbait dutela kontutan izanda. Oso komenigarria da norberaren buruaz hitz egitea, eta euskaldunok joera gutxi daukagu, nahiko transzendente izaten baikara. Esate baterako, ‘Salir del armario’ aurreko antzezlanean ironia handiz eginiko kritika sakona agertzen zen, kontu honen aurrean batzuk zein besteek izan ohi ditugun konportamenduak azaleraziz. Ironia ideologia egiteko tresna egokia dela deritzot. Maneiatzen dudan kabaret eta fartsa klabeetaz baliatuz nire pentsamoldea agertu izan ohi dut.

Antzerki zein telebistan, denetarik egin duzu. Zelan ikusten duzu zure burua?
Aktorea naiz, duda barik. Gertatzen dana da, herri eta ofizio honetan zelan edo hala bizirauteko denetarik egin behar dela. Euskal aktore gehienak Madrilen bizi dira dagoeneko.

Ba al dago, hortaz, euskal antzerkirik?
Galdera, nire ustez, honako hau litzateke: euskal antzerkia izatekotan nori inporta zaio? Kartelerari begirada bat botatzearekin nahikoa da egoeraren berri izateko. Hamlet eta La Tempestad egin behar ditu Arriagak, eta antzoki publikoa izanda euskeraz ere zeozer egin beharko luke. Euskara muntaia txikietarako erabiltzen da, antzerki herrikoian, merkeak diren antzezlanetan...

Idazterakoan kontutan izaten duzu hori?
Kontua da ni ez naizela teatro idazlea, argi gera dadila. Aktorea naiz, eta ondorioz, idazten ditudanak eszenaratzeko asmatuta daude. ‘Eingo al deu?’ hau gure muga guztiak aintzat hartuta sortu nuen. Ezin da hogei antzezleentzako antzezlana idatzi, antzerkia egiteko dirua behar delako.

Pesimista zaude. Hori al da azken urtean antzerkia utzi eta irakaskuntzara bueltatu izanaren arrazoia?
Hogeita bat urtez izan naiz antzerkia egiten eta borroka horretan egoteaz nekatu xamar sentitzen nintzen. Euskal Herrian antzezlea beti dago zerotik hasten eta hori oso neketsua da. Haize pixkat behar nuen, burua freskatu eta atsedena hartu ondoren, indarrez bueltatzeko.

Santurtziko deialdiaren oinarrietan saritutako antzezlana taularatzeko aukera paregabea ematen du. Horrekin bueltatzeko asmorik duzu?
Aukera badago eta prozesua martxan dago. Halere, nahiz eta antzezlanean mutil bat agertu, ez nintzateke ni izango. Idatzi nuenean estrenatzeko asmoarekin eta izen-abizenak dituen lantalde batean pentsatuz egin nuen, baina egitasmoa bertan behera gelditu zen. Zerbait gertatzen da herri honetan aktoreak idazle bilakatzen garenean. Zerbait gertatzen da idazleek antzerkia idazten ez dutenean. Eta hasierara bueltatzen gara. Ez dago industriarik, militantziaz eginiko lana da eta jendea nekatu egin ohi da.

‘Eingo al deu?’ euskeraz soilik antzezteko idatzita dago eta euskal kulturako izen handiei egindako omenaldiz josita. Erderazko bertsiorik egongo ote da?
Euskeraz sortutakoa da eta itzuli ezina. Moldaketa sakona beharko luke. Badaude bai, bestalde, keinu batzuk, hala nola, Andu Lertxundiri, berarekin lan egin dudalako eta miresten dudalako, edota Goenkaleri, gigoigile eta zuzendari jardun izan baitut zenbait urtez, edota antzezlanaren azpituluan, non ‘Koltxoi guztien gainetik, izara guztien azpitik’ dioen. Geure kulturaz ere sanoki barre egin dezakegu.